ຂປລ. ນັກສຶກສາລາວຢູ່ນະຄອນຫລວງປັກກິ່ງ ນໍາເອົາອາຫານ, ສຽງ ແຄນ ແລະ ສິລະປະ-ວັດທະນະທໍາລາວມາສະແດງຜ່ານສາຍຕາຜູ້ຊົມ ຫລາຍຮ້ອຍຄົນ ໄດ້ສ້າງຄວາມສົນໃຈຢ່າງຫລວງຫລາຍໃນງານແລກ ປ່ຽນວັດທະນະທໍາສາກົນຄັ້ງທີ 17 ເຊິ່ງຈັດຂຶ້ນໃນວັນທີ 21 ກັນຍາ 2025 ຜ່ານມານີ້, ທີ່ມະຫາວິທະຍາໄລວິທະຍາສາດ ແລະ ເຕັກໂນໂລຊີປັກກິ່ງ

( University of Science and Technology Beijing ), ນະຄອນຫລວງປັກ ກິ່ງ, ສປ ຈີນ.

ໃນງານດັ່ງກ່າວມີນັກສຶກສາຈາກ ສປປ ລາວ, ບັນດາຊາດອາຊຽນ, ເຂດ ຢູຣາເຊຍ, ອາຟຣິກກາ, ເອີຣົບ ແລະ ຊາດອື່ນໆ ເຂົ້າຮ່ວມຢ່າງຫລວງຫລາຍ. ງານແລກປ່ຽນວັດທະນະທຳນາໆຊາດຄັ້ງນີ້ມີຈຸດປະສົງ ເພື່ອເປີດໂອກາດ ໃຫ້ນັກສຶກສາຕ່າງປະເທດ ໄດ້ເຜີຍແຜ່ວັດທະນະທໍາອັນດີງາມທີ່ເປັນເອກະ ລັກ ພາຍໃນປະເທດຂອງຕົນອອກສູ່ສາຍຕາສາກົນໄດ້ຮັບຮູ້ ແລະ ເຂົ້າໃຈ ໂດຍຜ່ານກິດຈະກໍາຕ່າງໆເຊັ່ນ: ງານວາງສະແດງອາຫານ-ເຄື່ອງດື່ມ, ການ ສະແດງສິລະປະ-ວັດທະນະທໍາ, ວິທີປຸງແຕ່ງອາຫານທີ່ເປັນເອກະລັກຂອງ ແຕ່ລະຊາດ ແລະ ອື່ນໆ. ນອກນັ້ນ, ບັນດານັກສຶກສາຍັງໄດ້ໃຊ້ເວລາໃກ້ຊິດ ຕິດແທດກັນຫລາຍຂຶ້ນເພື່ອຄວາມສາມັກຄີຮັກແພງເຊິ່ງກັນ ແລະ ກັນ ຕື່ມອີກ.

ສໍາລັບນັກສຶກສາລາວແມ່ນໄດ້ນໍາເອົາອາຫານລາວແບບດັ້ງເດີມທີ່ເປັນ ເອກະລັກຂອງຊາດເຊັ່ນ: ເຂົ້າໜຽວ, ລາບ, ຕໍາໝາກຫຸ່ງ ລວມທັງເຄື່ອງດື່ມ ປະເພດກາເຟ ລາວ, ເບຍລາວ ແລະ ອື່ນໆ ມາວາງສະແດງ ແລະ ເປີດ ໂອກາດໃຫ້ນັກທ່ອງທ່ຽວມາຊີມລົດຊາດອາຫານລາວແບບບໍ່ເສຍເງິນ (ຟຣີ), ຄຽງຄູ່ກັບບັນຍາກາດການດື່ມ-ກິນອາຫານທີ່ແຕກຕ່າງຈາກ ຫລາຍຊາດນັ້ນ, ນັກສຶກສາລາວຍັງໄດ້ຂຶ້ນເວທີສະແດງສິລະປະ ເປົ່າແຄນ, ຟ້ອນ ແລະ ຮ້ອງເພງລາວກັບການນຸ່ງຖືຊຸດປະຈຳຊາດລາວ ທີ່ໜ້າອອນ ຊອນ ເຊິ່ງສາມາດດຶງດູດສາຍຕານັກສຶກສານາໆຊາດ ແລະ ນັກທ່ອງທ່ຽວ ເປັນພິເສດ.

ທ່ານ ລັດດາພອນ ທໍາມະວົງ, ນັກສຶກສາປີ 3, ປະລິນຍາໂທສາຂາບໍລິຫານ ທຸລະກິດທີ່ມະຫາວິທະຍາໄລວິທະຍາສາດ ແລະ ເຕັກໂນໂລຊີປັກກິ່ງ ໃຫ້ຮູ້ວ່າ: ກິດຈະກໍາແລກປ່ຽນວັດທະນະທໍາຂອງນັກສຶກສາຕ່າງປະເທດໃນປັກກິ່ງນີ້ ແມ່ນຈັດຂຶ້ນທຸກໆປີ ໃນນັ້ນແຕ່ລະປະເທດຈະນຸ່ງຖືຊຸດປະຈໍາຊາດ, ນໍາເອົາ ອາຫານປະເພດຕ່າງໆທີ່ເປັນເອກະລັກຂອງໃຜມັນ ແລະ ສະແດງສິລະປະ- ວັດທະນະທໍາ ຜ່ານການຮ້ອງເພງ, ຟ້ອນ ແລະ ອື່ນໆ.

ທ່ານ ລັດດາພອນ ຍັງເວົ້າຕື່ມວ່າ: ການມາຮຽນຢູ່ຈີນເພື່ອຢາກຍົກລະ ດັບຄວາມຮູ້ຄວາມ ສາມາດຂອງຕົນເອງ, ເພີ່ມຄວາມຮູ້ທາງດ້ານພາສາຈີນ ເພື່ອນຳໃຊ້ໃນໜ້າທີ່ວຽກງານ; ການຮຽນການສອນຂອງຈີນແມ່ນເນັ້ນໃສ່ ນັກສຶກສາເປັນສູນກາງໂດຍໃຫ້ນັກສຶກສາມີສ່ວນຮ່ວມໃນການຄົ້ນຄວ້າ, ແລກປ່ຽນຄວາມຄິດເຫັນ; ອາຈານແມ່ນມີຄວາມເອົາໃຈໃສ່ນັກສຶກສາລາວ ເປັນຢ່າງດີ ໃຫ້ຄຳປືກສາ ແລະ ຊ່ວຍເຫລືອໃນດ້ານການຮຽນ, ການໃຊ້ຊີ ວິດ; ສຳລັບຂ້າພະເຈົ້າແມ່ນມີຄວາມສະດວກສະບາຍຫລາຍບໍ່ວ່າຈະເປັນ ການເດີນທາງ, ບ່ອນພັກເຊົາ ແລະ ອາຫານ ບໍ່ຄ່ອຍມີບັນຫາຫຍັງໂດຍ ລວມແມ່ນດີ; ຈີນ ເປັນປະເທດທີ່ມີການພັດທະນາຢ່າງກ້າວກະໂດ ແລະ ເຕີບໂຕໄວ, ຫລັກສູດການຮຽນແມ່ນນຳໃຊ້ກົນລະຍຸດຈາກສະພາບ ແວດ ລ້ອມໂຕຈິງຂອງປະເທດ ມາໃຊ້ໃນການຄົ້ນຄວ້າ; ດ້ານຄົມມະນາຄົມ ແມ່ນ ມີຄວາມສະດວກສະບາຍຫລາຍ ແລະ ປະເທດຈີນເປັນປະເທດໜຶ່ງທີ່ມີ ຄວາມປອດໄພທີ່ສຸດ.

ໂດຍ: ເກີດຂັວນໃຈ ມາລີຈັນສີ

ສະແດງຄຳຄິດເຫັນ