ອັດຕາເງິນເຟີ້ຂອງ ສປປ ລາວ ໄດ້ສືບຕໍ່ຊະລໍຕົວລົງຢ່າງໜ້າພໍໃຈ, ທ່າມກາງ ຄວາມທ້າທາຍທີ່ສຳຄັນຍັງຄົງມີຢູ່ ເນື່ອງຈາກລາຄາຂອງໝວດສິນຄ້າ ແລະ ບໍລິການທີ່ຈຳເປັນຕໍ່ການດຳລົງຊີວິດປະຈຳວັນ, ໂດຍສະເພາະ ພະລັງງານ, ນ້ຳປະປາ, ແລະ ໝວດສຸຂະພາບ, ຍັງສືບຕໍ່ເພີ່ມຂຶ້ນໃນອັດຕາທີ່ສູງຢູ່.

ໂດຍ ຕາມການລາຍງານຂອງ ສູນສະຖິຕິແຫ່ງຊາດ, ໃນເດືອນກັນຍາ 2025, ອັດຕາເງິນເຟີ້ລວມຂອງປະເທດຢືນຢູ່ທີ່ 4.5%, ເຊິ່ງເປັນການເພີ່ມຂຶ້ນທີ່ຊ້າກວ່າເດືອນຜ່ານມາ, ຊີ້ໃຫ້ເຫັນເຖິງແນວໂນ້ມໃນທາງບວກ.

ຈຸດທີ່ສຳຄັນທີ່ສຸດແມ່ນຜົນສຳເລັດໃນການຄວບຄຸມອັດຕາເງິນເຟີ້ສະເລ່ຍໃນຮອບ 9 ເດືອນຕົ້ນປີ 2025 ເຊິ່ງບັນທຶກຢູ່ທີ່ 8.8%. ຕົວເລກນີ້ໄດ້ຫຼຸດລົງຢ່າງຮຸນແຮງເມື່ອທຽບກັບໄລຍະດຽວກັນຂອງປີ 2024 ທີ່ເຄີຍສູງເຖິງ 24.8%. ການຫຼຸດລົງເກືອບ 16 ສ່ວນຮ້ອຍສະແດງເຖິງຄວາມຄືບໜ້າທີ່ຍິ່ງໃຫຍ່ໃນການສ້າງສະຖຽນລະພາບທາງດ້ານລາຄາ.

ເຖິງແມ່ນວ່າຕົວເລກລວມຈະດີຂຶ້ນ, ລາຍລະອຽດສະແດງໃຫ້ເຫັນວ່າປະຊາຊົນຍັງປະເຊີນກັບຄ່າຄອງຊີບທີ່ສູງຂຶ້ນໃນໝວດສິນຄ້າຈຳເປັນເຊັ່ນ:

• ໝວດສິນຄ້າ ແລະ ບໍລິການອື່ນໆ ເພີ່ມຂຶ້ນສູງທີ່ສຸດໃນເດືອນກັນຍາດ້ວຍ 18.2%, ໂດຍສະເພາະແມ່ນຄ່າບໍລິການຕ່າງໆ ແລະ ເຄື່ອງໃຊ້ປະຈຳວັນ.ທີ່ພັກອາໄສ, ນໍ້າປະປາ, ໄຟຟ້າ ແລະ ເຊື້ອເພີງຫຸງຕົ້ມ ເປັນໝວດທີ່ມີອັດຕາເງິນເຟີ້ສະສົມສູງກວ່າໝູ່ໃນໄລຍະ 9 ເດືອນ, ເພີ່ມຂຶ້ນເຖິງ 20.3%. ໃນເດືອນກັນຍາເພີ່ມຂຶ້ນ 14.8%. ການເພີ່ມຂຶ້ນນີ້ມີຜົນມາຈາກການປັບຂຶ້ນລາຄາ ໄຟຟ້າ ແລະ ນໍ້າປະປາ, ລວມທັງລາຄາຂອງວັດສະດຸກໍ່ສ້າງເຊັ່ນ: ເຫຼັກເສັ້ນ, ຫີນແຮ່, ດິນບັອກ ແລະ ດິນຈີ່.

• ໝວດຮັກສາສຸຂະພາບ ແລະ ຢາ ຍັງເພີ່ມຂຶ້ນສູງທີ່ 12.9% (ລາຍເດືອນ) ແລະ 18.3% (ສະເລ່ຍ 9 ເດືອນ), ເຊິ່ງພົ້ນເດັ່ນແມ່ນລາຄາ ຢາ ແລະ ຄ່າບໍລິການຈາກໂຮງໝໍເອກະຊົນ. ການສຶກສາ ມີການເພີ່ມຂຶ້ນທີ່ໜ້າສັງເກດຄື 9.7% (ລາຍເດືອນ) ແລະ 14.4% (ສະເລ່ຍ 9 ເດືອນ), ເຊິ່ງໄດ້ຮັບຜົນກະທົບຈາກລາຄາຄ່າອະນຸບານ, ປະຖົມ, ເຄື່ອງແບບນັກຮຽນ, ແລະ ປຶ້ມແບບຮຽນ.

ໂດຍຕາມ ສູນສະຖິຕິແຫ່ງຊາດ, ສາເຫດຕົ້ນຕໍທີ່ເຮັດໃຫ້ອັດຕາເງິນເຟີ້ຍັງສືບຕໍ່ຢູ່ໃນລະດັບທີ່ສົ່ງຜົນກະທົບຕໍ່ຊີວິດການເປັນຢູ່ແມ່ນຍ້ອນການປັບຂຶ້ນລາຄາພື້ນຖານໂຄງລ່າງ ແລະ ບັນຫາອັດຕາແລກປ່ຽນ. ການປັບເພີ່ມຂຶ້ນຂອງລາຄາ ໄຟຟ້າ, ນໍ້າປະປາ, ແລະ ນໍ້າມັນເຊື້ອໄຟ ໄດ້ເປັນປັດໄຈທີ່ຊຸກຍູ້ຕົ້ນທຶນການຜະລິດ ແລະ ລາຄາຂາຍສຸດທ້າຍຂອງສິນຄ້າຕ່າງໆ.

ນອກຈາກນີ້ການຕິດຕາມສະພາບລາຄາລາຍອາທິດຍັງໄດ້ເຫັນການປັບຂຶ້ນລາຄາສິນຄ້າຈຳນວນຫຼາຍຕາມການ ອ່ອນຄ່າຂອງເງິນກີບທຽບກັບເງິນບາດໄທ ໂດຍສະເພາະ. ນີ້ສະແດງໃຫ້ເຫັນວ່າສະຖຽນລະພາບຂອງອັດຕາແລກປ່ຽນຍັງຄົງເປັນປັດໄຈສຳຄັນທີ່ກະຕຸ້ນລາຄາສິນຄ້ານຳເຂົ້າ.

ສະຫຼຸບແລ້ວ ເຖິງແມ່ນວ່າອັດຕາເງິນເຟີ້ລວມຂອງ ສປປ ລາວ ໄດ້ສະແດງໃຫ້ເຫັນສັນຍານທີ່ດີຂອງການຊະລໍຕົວລົງຢ່າງເຫັນໄດ້ຊັດໃນປີ 2025, ແຕ່ຄວາມກົດດັນດ້ານຄ່າຄອງຊີບຕໍ່ປະຊາຊົນຍັງມີສູງຢູ່.

ສະແດງຄຳຄິດເຫັນ