ງານບຸນອອກພັນສາປະວໍລະນາ ແລະ ຊ່ວງເຮືອປະເພນີທີ່ທ່າວັດຈັນປະຈໍາປີ 2025 ຈະໄດ້ຈັດຂຶ້ນໃນລະ ຫວ່າງວັນທີ 4-8 ຕຸລາ 2025 ນີ້. ທ່ານ ແສງສາທິດ ພິມເມືອງ ຕາງໜ້າອົງການປົກຄອງເມືອງຈັນທະບູລີ ນະຄອນຫຼວງວຽງຈັນ (ນວ) ປະທານຄະນະກໍາມະການຈັດງານບຸນໄດ້ຖະແຫຼງຂ່າວການກະກຽມຄວາມພ້ອມຕໍ່ສື່ມວນຊົນໃນວັນທີ 2 ຕຸລານີ້ວ່າ: ປັດຈຸບັນເມືອງຈັນທະບູລີມີຄວາມພ້ອມຮອບດ້ານຈັດງານບຸນອອກພັນສາປະວໍລະນາ ແລະ ຊ່ວງເຮືອປະເພນີທີ່ທ່າວັດຈັນ ນວ.

ການຈັດງານບຸນຄັ້ງນີ້, ເພື່ອຮັກສາຮີດຄອງປະເພນີອັນດີງາມຂອງຊາດ ປະກອບສ່ວນດຶງດູດນັກທ່ອງທ່ຽວພາຍໃນ ແລະ ຕ່າງປະເທດໃຫ້ເຂົ້າມາທ່ຽວ ນວ ເພື່ອຊຸກຍູ້ສົ່ງເສີມການຜະລິດສິນຄ້າໜຶ່ງເມືອງໜຶ່ງຜະລິດຕະພັນທົດແທນການນໍາເຂົ້າ ແລະ ສົ່ງເສີມການຄ້າ-ຂາຍເຮັດໃຫ້ເສດຖະກິດດີຂຶ້ນ.

ພາຍໃນງານບຸນປະກອບມີກິດຈະກໍາ ທາງສາສະໜາ ແລະ ຮີດຄອງປະເພນີ: ວັນທີ 1 ຕຸລາ 2025 ເວລາ 7:00 ໂມງເຊົ້າມີພິທີຄອບໄຄ່ວສະຖານທີ່ສັກສິດ, ເລີ່ມເວລາ 3:00-4:00 ໂມງເຊົ້າຂອງວັນທີ 7 ຕຸລາ 2025 ມີພິທີສູດອອກພັນສາປະວໍລະນາ ເວລາ: 07:00 ໂມງ (ຕອນເຊົ້າ) ພິທີຕັກບາດຖວາຍສັງຄະທານຕາມປະເພນີລາວ, ເວລາ 19:00-19:40 ໂມງພິທີວຽນທຽນໄຫຼເຮືອໄຟໂຄກ.

ເຂດສວນເຈົ້າອານຸວົງ ແລະ ຜາມໄຊ (ທ່າວັດຈັນ) ເວລາ 20:00 ໂມງ ເປັນຕົ້ນໄປມີການຄົບງັນຈູດບັ້ງໄຟພຸ-ໄຟດອກ ແລະ ບັ້ງໄຟຕະໄລ, ມີການສະແດງສິລະປະວັນນະຄະດີ; ເຂດແຄມຂອງທ່າວັດຈັນ ມີການລອຍກະໂທງ ແລະ ບໍ່ອະນຸຍາດໃຫ້ອອກໄປໄຫຼຢູ່ກາງຂອງ.

ສຳລັບກິດຈະກໍາຊ່ວງເຮືອໃນວັນທີ 8 ຕຸລາ 2025 ເວລາ 08:30 ໂມງ (ຕອນເຊົ້າ) ເປັນຕົ້ນໄປເລີ່ມຈັດການແຂ່ງຂັນຊ່ວງເຮືອປະເພນີ 55 ສີພາຍ (ຍິງ-ຊາຍ) ແລະ ເຮືອສູດຊາຍເວລາ 16:00 ໂມງມອບລາງວັນເຮືອຊ່ວງ; ກິດຈະກຳວາງສະແດງ ແລະ ຊື້-ຂາຍສິນຄ້າ: ກໍານົດນັບແຕ່ວັນທີ 4-8 ຕຸລາ 2025 (ກຳນົດເວລາ 5 ວັນ) ມີການວາງສະແດງ ແລະ ຂາຍສິນຄ້າຢູ່ໃນຂອບເຂດສວນເຈົ້າອານຸວົງຢູ່ຕາມຂອບເສັ້ນທາງເຈົ້າຟ້າງຸ່ມ ແຕ່ວິທະຍາໄລເຕັກນິກປາກປ່າສັກລົງຮອດສີ່ແຍກໂຮງໝໍມະໂຫສົດ ກໍານົດໃຫ້ມີການຊື້-ຂາຍເຂົ້າຫຼາມປີ້ງໄກ່ທາງຄົນຍ່າງເບື້ອງເສັ້ນທາງແຕ່ທະນາຄານພັດທະນາລາວ ລົງມາສີ່ແຍກໄຟແດງສີຫອມ, ສີ່ແຍກໄຟແດງວັດອິນແປງ ເສັ້ນທາງເສດຖາທິລາດໄປຫາສີ່ແຍກໄຟແດງວັດສີສະເກດ ກໍານົດເປັນບ່ອນຝາກລົດຈັກ ແລະ ລົດໃຫຍ່ບາງຈຸດທີ່ສາມາດນໍາໃຊ້ໄດ້.

ສະເພາະເສັ້ນທາງເບື້ອງບ້ານວັດຈັນ, ມີໄຊ, ຊຽງຍືນ ແລະ ບ້ານສີຫອມ ແມ່ນກໍານົດໃຫ້ຂາຍເຂົ້າຫຼາມປີ້ງໄກ່ມີການຕັ້ັງບູດຂາຍເຄື່ອງຂາຍສິນຄ້າ ແລະ ຜະລິດຕະພັນ. ສໍາລັບການຕັ້ງຮ້ານຂາຍເຄື່ອງຕ່າງໆ ທັງເສັ້ນທາງເບື້ອງນອກ ແລະ ໃນຂອບເຂດສວນເຈົ້າອານຸວົງແມ່ນໃຫ້ຕັ້ງຮ້ານຢ່າງມີຄວາມເປັນລະບຽບສວຍງາມ.

ສະຖານທີ່ຝາກລົດແມ່ນມອບໃຫ້ຄະນະກຳມະການຈັດສັນສະຖານທີ່ ແລະ ອະນຸກໍາມະການ ປກສ-ປກຊ ຮັບ ຜິດຊອບເປັນຜູ້ຄົ້ນຄວ້າພິຈາລະນາຕາມຄວາມເໝາະສົມຄືຫຼາຍປີຜ່ານມາ.

ຂ່າວ: ຊິລິການດາ

ສະແດງຄຳຄິດເຫັນ