ກອງພັນໃຫຍ່ 605 ເປັນກົມກອງໜຶ່ງ ໄດ້ຮັບມອບໝາຍໜ້າທີ່ ເປັນກ້ອນປືນໃຫຍ່ໜ້າດິນ ເຂົ້າຮ່ວມເດີນຂະບວນສວນສະໜາມຂອງກຳລັງປ້ອງກັນຊາດສະເຫຼີມສະຫຼອງ ວັນສະຖາປະນາ ສປປ ລາວ ວັນທີ 2 ທັນວາ ຄົບຮອບ 50 ປີ, ພາຍຫຼັງໄດ້ຮັບຄຳສັ່ງຈາກກະຊວງປ້ອງກັນປະເທດ ກໍຄືກົມປືນໃຫຍ່ໜ້າດິນ ດັ່ງນັ້ນ ກົມກອງຈິ່ງຈັດຕັ້ງກຳລັງສຸມໃສ່ການຫັດແອບສວນສະໜາມຢ່າງຕັ້ງໜ້າ ແລະ ເປັນຂະບວນຟົດຟື້ນຕໍ່ເນື່ອງ ເພື່ອຮັບປະກັນໃຫ້ມີຄວາມເປັນເອກະພາບທາງດ້ານຈັງຫວະ, ບາດກ້າວ ການເຄື່ອນເໜັງ ແລະ ມີຄວາມເຂັ້ມແຂງທາງດ້ານພາລະກຳລັງ.

ສະຫາຍ ພັນໂທ ວົງເດືອນ ແກ້ວມະນີ ຫົວໜ້າການທະຫານ ກອງພັນໃຫຍ່ 605 ຄະນະຮັບຜິດຊອບຊີ້ນຳກ້ອນສວນສະໜາມປືນໃຫຍ່ໜ້າດິນ ໄດ້ໃຫ້ສຳພາດຕໍ່ນັກຂ່າວກອງທັບວ່າ: ກ້ອນປືນໃຫຍ່ໜ້າດິນ ມີຈຳນວນພົນເຂົ້າຮ່ວມຫັດແອບສວນສະໜາມຕົວຈິງ 122 ສະຫາຍ, ສຳຮອງ 13 ສະຫາຍ, ພາກສ່ວນຮັບໃຊ້ຮັບປະກັນ 13 ສະຫາຍ, ຄູຝຶກ 5 ສະຫາຍ, ຄະນະຊີ້ນຳລວມ 2 ສະຫາຍ, ລວມທັງຫມົດ 155 ສະຫາຍ.

ຜ່ານການຫັດແອບມາໄດ້ໄລຍະໜຶ່ງ, ເຫັນວ່າພວກເຮົາໄດ້ມີຄວາມພ້ອມທາງດ້ານມີພາຫະນະ, ສະຖານທີຝືກຊ້ອມ ແລະ ພັກເຊົ່າ, ສຳລັບການຝຶກຊ້ອມເບື້ອງຕົ້ນ ແມ່ນໄດ້ເອົາໃຈໃສ່ຈັດຕັ້ງຫັດແອບທາງດ້ານຈັງຫວະບຸກຄົນ, ລະບຽບວິໄນ, ໂດຍໃຊ້ເຊືອກຟາງຫັດແອບບຸກຄົນຄົງທີ່ ແລະ ເຄື່ອນທີ່ຕາມຕາຕະລາງ ທີ່ກົມໃຫຍ່ເສນາທິການກອງທັບ ວາງອອກ.

ສ່ວນໄລຍະຕໍ່ໄປ ແມ່ນຈະໄດ້ຈັດຕັ້ງຫັດແອບການເຄື່ອນທີ່ປະສານກ້ອນລວມໝູ່ ຢູ່ວິທະຍາຄານນາຍທະຫານບົກກົມມະດຳ ແລະ ຢູ່ເດີນສະໜາມຫຼວງເພື່ອຮັບປະກັນໃຫ້ມີຄວາມເປັນລະບຽບຮຽບຮ້ອຍ, ຈົບງາມ, ມາຮອດປັດຈຸບັນ ສາມາດຮັບປະກັນໄດ້ 70%.

ວິທະຍຸກະຈາຍສຽງກອງທັບ

ສະແດງຄຳຄິດເຫັນ