ຂປລ. ແຫລ່ງຂ່າວຈາກ ແຂວງບໍລິຄຳໄຊ ໃຫ້ຮູ້ວ່າ: ພິທີມອບ-ຮັບເງິນນະໂຍບາຍ ໃຫ້ຜູ້ທີ່ມີຜົນງານ ແລະ ຄຸນງາມຄວາມດີ ໃນພາລະກິດຮັບໃຊ້ການປະຕິວັດຊາດ ປະຊາທິປະໄຕ ປະຈຳປີ 2025 ຕາມດຳລັດ 272 /ລບ ຈັດຂຶ້ນໃນວັນທີ 9 ຕຸລາ 2025 ທີ່ພະແນກແຮງງານ ແລະ ສະຫວັດດີການ-ສັງຄົມ (ຮສສ) ແຂວງບໍລິຄຳໄຊ ໂດຍການເປັນປະທານຂອງ ທ່ານ ຄຳສະຫວາດ ອູດທະຈັກ ຮອງຫົວໜ້າພະແນກແຮງງານ ແລະ ສະຫວັດດີການສັງຄົມແຂວງ, ມີບັນດາຫ້ອງການ ຮສສ ເມືອງ, ຕາງໜ້າຜູ້ໄດ້ຮັບເງິນນະໂຍບາຍ ແລະ ພະແນກການອ້ອມຂ້າງເຂົ້າຮ່ວມ.

ທ່ານ ອຸດອນ ຄໍາພຽນ ຮອງຫົວໜ້າພະແນກແຮງງານ ແລະ ສະຫວັດດີການສັງຄົມແຂວງ ໄດ້ຜ່ານຂໍ້ຕົກລົງຂອງທ່ານເຈົ້າແຂວງ ວ່າດ້ວຍການມອບເງິນນະໂຍບາຍ, ການອະນຸມັດເງິນອຸດໜູນເສຍສະລະຊີວິດ ໃນງວດ II ປະຈໍາປີ 2025 ຕາມດຳລັດ 272 /ລບ ວ່າດ້ວຍການມອບເງິນນະໂຍບາຍ ຕໍ່ຜູ້ທີ່ມີຜົນງານ ແລະ ຄຸນງາມຄວາມດີ ໃນພາລະກິດຮັບໃຊ້ການປະຕິວັດຊາດ ປະຊາທິປະໄຕ. ສຳລັບປີ 2025 ມີ 28 ທ່ານ ເປັນເງິນທັງໝົດ 592.548.000 ກີບ ແລະ ປະຕິບັດນະໂຍບາຍອຸດໜູນເທື່ອດຽວຜູ້ຍັງມີຊີວິດຜູ້ທີ່ມີຜົນງານ ແລະ ຄຸນງາມຄວາມດີ ໃນພາລະກິດການປະຕິວັດຊາດ ປະຊາທິປະໄຕ ຕາມດຳລັດ ສະບັບເລກທີ 57/ລບ, ລົງວັນທີ 27 ມັງກອນ 2025 ໃນງວດ II ປະຈໍາປີ 2025 ຈຳນວນ 27 ທ່ານ ຍິງ 6 ທ່ານ ລວມເປັນເງິນ 567.925.500 ກີບ.

ທ່ານ ຄຳສະຫວາດ ອຸດທະຈັກ ໄດ້ໃຫ້ທິດຊີ້ນໍາ ແລະ ໄດ້ຮຽກຮ້ອງໃຫ້ຕາງໜ້າຜູ້ທີ່ໄດ້ຮັບເງິນນະໂຍບາຍ ໃນຄັ້ງນີ້ ຈົ່ງໄດ້ນໍາໃຊ້ເງິນດັ່ງກ່າວ ໃຫ້ເຂົ້າເປົ້າໝາຍ ແລະ ເໝາະສົມກັບຄວາມເປັນຈິງ.

ຂ່າວ-ພາບ: ວຽງສະຫວັນ

ສະແດງຄຳຄິດເຫັນ