ຂ່າວຕ່າງປະເທດລາຍງານ ໃນທ້າຍອາທິດຜ່ານມາວ່າ: ທ່ານ ບາລິວ ລາຮາດາເລຍ ລັດຖະມົນຕີ​ກະຊວງ​ພະລັງງານ ​ແລະ ຊັບພະຍາກອນ​ບໍ່​ແຮ່ ອິນ​ໂດ​ເນ​ເຊຍ ​ໃຫ້​ຮູ້​ວ່າ: ອິນ​ໂດ​ເນ​ເຊຍ​ມີ​ແຜນ​ຈະ​ຢຸດ​ການ​ນຳ​ເຂົ້າ​ນ້ຳມັນ​ກາ​ຊວນ​ໃນ​ເຄິ່ງຫຼັງປີ 2026 ​​ຕາມ​ຄຳ​ສັ່ງ​ທີ່​ຈະ​ນຳ​ໃຊ້​ນ້ຳມັນ​ເຊື້ອ​ໄຟຊີວະພາບຊະນິດໃໝ່(B-50).

ທ່ານ ບາຣລິລ ຢືນຢັນ​ວ່າ: ປັດຈຸ​ບັນ, ລັດຖະບານ​ອິນ​ໂດ​ເນ​ເຊຍ​ກຳລັງທົດລອງການນໍາໃຊ້ນໍ້າມັນເຊື້ອໄຟ B-50 ​ໄລຍະ​ທີ 4 ເຊິ່ງເປັນ​ໄລຍະ​ສຸດ​ທ້າຍ​ ແລະ ຄາດ​ວ່າ​ຈະ​ສຳ​ເລັດ​ພາຍ​ໃນ 6-8 ​ເດືອນ. ໂດຍມີການທົດລອງກັບເຄື່ອງຈັກເຮືອ, ລົດໄຟ, ເຄື່ອງຈັກໜັກ ແລະ ອຸປະກອນອື່ນໆ.

​ທັງນີ້, ໂຄງການ​ນ້ຳມັນ​ເຊື້ອ​ໄຟ B-50 ເຊິ່ງເປັນການ​ປະສົມ​ນ້ຳມັນ​ກາ​ຊວນ​ທຳ​ມະ​ດາ 50% ກັບ​ນ້ຳມັນ​ປາມ​ດິບ 50% ​ຖືເປັນ​ສ່ວນ​ໜຶ່ງ​ຂອງ​ຍຸດ​ທະ​ສາດ​ໄລຍະ​ຍາວ​ຂອງ​ອິນ​ໂດ​ເນ​ເຊຍ ​ເພື່ອ​ເພີ່ມ​ທະວີ​ຄວາມ​ໝັ້ນຄົງ​ດ້ານ​ພະລັງງານ ​ແລະ ຫຼຸດຜ່ອນ​ການ​ເພິ່ງ​ພາ​ອາ​ໄສ​ນ້ຳມັນ​ເຊື້ອ​ໄຟ.

ນອກຈາກນັ້ນ, ໂຄງການນ້ຳມັນເຊື້ອໄຟ B-50 ແມ່ນສອດຄ່ອງກັບປະລິມານການນຳໃຊ້ນໍ້າມັນເຊື້ອໄຟ B-40 ໃນປັດຈຸບັນ ຊຶ່ງມີການໃຊ້ບັນລຸ 10 ລ້ານກິໂລລິດ, ກວມເອົາ 64.7% ຂອງເປົ້າໝາຍປີ 2025 ທີ່ກຳນົດໄວ້ 15.6 ລ້ານກິໂລລິດ. ກະຊວງ​ດັ່ງກ່າວລະບຸ​ຕື່ມ​ວ່າ: ການ​ນຳ​ໃຊ້​ນ້ຳມັນ​ເຊື້ອ​ໄຟ B-40 ​ໃນ​ທົ່ວ​ປະ​ເທດອິນໂດເນເຊຍ ​ໄດ້​ຊ່ວຍ​ປະເທດປະ​ຢັດ​ເງິນຕາ​ຕ່າງປະ​ເທດ​ປະມານ 9,3 ຕື້​ໂດ​ລາ​.

ສະແດງຄຳຄິດເຫັນ