ຂປລ. ແຫລ່ງຂ່າວ ແຂວງວະຫວັນນະເຂດ ໃຫ້ຮູ້ວ່າ: ທ່ານ ປີໂຕລ້າ ຄູນສັກສີ ຫົວໜ້າຫ້ອງການໂຍທາທິການ ແລະ ຂົນສົ່ງ (ຍທຂ) ເມືອງຈຳພອນ ພ້ອມຄະນະ ລົງຕິດຕາມແກ້ໄຂ ຫົວຂົວເບຕົງເສັ້ນທາງເລກທີ PR 6303 ເຂດບ້ານນາກະທ້າງ ເມືອງຈຳພອນ ທີ່ຍຸບລົງໃນວັນທີ 15 ຕຸລາ 2025 ໂດຍມີທ່ານ ສີສະໄຫວ ນາຍບ້ານນາກະທ້າງ ແລະ ພາກສ່ວນກ່ຽວຂ້ອງເຂົ້າຮ່ວມ.

ຂົວດັ່ງກ່າວແມ່ນຖືກຜົນກະທົບຈາກພະຍຸນາກາຊາ, ພະຍຸບົວລອຍ ເຮັດໃຫ້ປະລິມານນ້ຳເພີ່ມຂຶ້ນຫລາຍໃນການໄຫລຜ່ານກ້ອງຂົວ ແລະ ນ້ຳກັດເຊາະບໍລິເວນຖານຫົວຂົວຈຶ່ງເຮັດໃຫ້ດິນເຊາະເຈື່ອນລົງ ເປັນບໍລິເວນກວ້າງ ເຮັດໃຫ້ຫົວຂົວດັ່ງກ່າວຍຸບລົງ ໃນຂະໜາດ ຄວາມກວ້າງຂອງດິນຍຸບ 6 ແມັດ, ເລິກ 6 ແມັດ.

ຕໍ່ສະພາບການດັ່ງກ່າວ, ການນຳຂັ້ນເມືອງ ຈຶ່ງລົງແກ້ໄຂສຸກເສີນໃຫ້ສາມາດຜ່ານໄປ-ມາ ໄດ້ຊົ່ວຄາວ, ເຊິ່ງໜ້າວຽກທີ່ເຮັດແມ່ນ ຕອກເສົາເຂັມໄມ້ກັນດິນ, ຖົມດິນຫົວຂົວ, ຖົມຫີນໜ້າທາງ ໃຫ້ແໜ້ນໜາໄວ້ ໂດຍແມ່ນບໍລິສັດໄກ່ຄຳກໍ່ສ້າງ ຂົວທາງຈຳກັດເປັນຜູ້ຮັບສ້ອມແປງ ໃນມູນຄ່າ 350 ລ້ານກີບ, ເຊິ່ງປັດຈຸບັນສາມາດເດີນທາງໄປ-ມາໄດ້ແລ້ວ.

ສະແດງຄຳຄິດເຫັນ