ແຈ້ງການຂອງກະຊວງການຕ່າງປະເທດ

ລະຫວ່າງວັນທີ 24-26 ຕຸລາ 2025, ທ່ານ ທອງລຸນ ສີສຸລິດ, ປະທານປະເທດ ຈະເດີນທາງເຂົ້າຮ່ວມພິທີລົງນາມສົນທິສັນຍາ ອົງການສະຫະປະຊາຊາດ ວ່າດ້ວຍການຕ້ານອາດຊະຍາກໍາທາງໄຊເບີ ທີ່ນະຄອນຫລວງຮ່າໂນ້ຍ ສສ ຫວຽດນາມ, ເພື່ອເປັນແຂກກິດຕິມະສັກ ແລະ ເປັນສັກຂີພະຍານ ໃນການລົງນາມສົນທີສັນຍາດັ່ງກ່າວ ຂອງ ສປປ ລາວ.

ພິທີລົງນາມຄັ້ງນີ້ ໂດຍການເປັນເຈົ້າພາບຮ່ວມ ລະຫວ່າງຫວຽດນາມ ແລະ ອົງການສະຫະປະຊາຊາດ, ພາຍໃຕ້ການເປັນປະທານຮ່ວມຂອງ ທ່ານ ເລືອງ ເກືອງ, ປະທານປະເທດຫວຽດນາມ ແລະ ທ່ານ ອັນໂຕນີໂອ ກູເຕີເຣສ (Antonio Guterres), ເລຂາທິການໃຫຍ່ ອົງການສະຫະປະຊາຊາດ, ຊຶ່ງພົນເອກ ວິໄລຫລ້າຄໍາຟອງ ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນຄວາມສະຫງົບ ຈະຕາງໜ້າໃຫ້ລັດຖະບານລາວ ລົງນາມສົນທິສັນຍາດັ່ງກ່າວ, ເປັນການສະແດງໃຫ້ເຫັນເຖິງຄວາມເອົາໃຈໃສ່ ແລະ ຄວາມຕັ້ງໜ້າຂອງ ລາວ ໃນວຽກງານການສະກັດກັ້ນ ແລະ ຕ້ານອາດຊະຍາກຳທາງໄຊເບີ.

ສົນທິສັນຍາວ່າດ້ວຍ ການຕ້ານອາດຊະຍາກຳທາງໄຊເບີ ໄດ້ລິເລີ່ມຂຶ້ນ ໂດຍການເຈລະຈາສ້າງຮ່າງສົນທິສັນຍາ ນັບແຕ່ປີ 2021 ເປັນຕົ້ນມາ, ຊຶ່ງວົງຄະນະຍາດສາກົນໄດ້ຮ່ວມກັນປະກອບສ່ວນ ປະກອບຄຳຄິດເຫັນ ແລະ ເຫັນດີຕໍ່ຮ່າງສະບັບສຸດທ້າຍ ໃນນີ້ລວມທັງ ສປປ ລາວ.

ສະແດງຄຳຄິດເຫັນ