ອະດີດປະທານາທິບໍດີຟິລິບປິນ ໂຣດຣິໂກ ດູແຕຣ໌ເຕ ຖືກຄວບຄຸມ ແລະ ສົ່ງຕົວຂຶ້ນເຄື່ອງບິນມຸ່ງໜ້າໄປຍັງກຸງເຮກ ປະເທດເນເທີແລນ ເມື່ອວັນທີ່ 18 ມີນາ ຜ່ານມາ.

 

ຫຼັງຈາກຖືກຈັບກຸມທີ່ສະໜາມບິນໃນກຸງມະນິລາ ຕາມໝາຍຈັບຂອງສານອາຍາລະຫວ່າງປະເທດ (ICC)

 

ມາຣ໌ຕິນ ເດລກຣາ ທະນາຍຄວາມຂອງ ດູແຕຣ໌ເຕ ເປີດເຜີຍວ່າ ອະດີດຜູ້ນຳວັຍ 79 ປີ ໄດ້ຂຶ້ນເຄື່ອງບິນເຊົ່າເໝົາລຳພ້ອມກັບຜູ້ຕິດຕາມອີກ 3 ຄົນຈາກສະໜາມບິນນານາຊາດມະນິລາ ເວລາປະມານ 21:00 ນ. ຕາມເວລາທ້ອງຖິ່ນ ແລະ ກຳລັງເດີນທາງໄປຍັງກຸງເຮກ ຊຶ່ງເປັນທີ່ຕັ້ງຂອງສຳນັກງານໃຫຍ່ ICC

 

ລັດຖະບານຟິລິບປິນລະບຸວ່າ ດູແຕຣ໌ເຕ ຖືກຄວບຄຸມຕົວເມື່ອຊ່ວງເຊົ້າວັນອັງຄານທີ່ 18 ມີນາ, ຂະນະເດີນທາງກັບຈາກຮ່ອງກົງ ເຂົາກຳລັງປະເຊີນຂໍ້ກ່າວຫາກໍ່ອາຊະຍາກຳຕໍ່ມະນຸດຊາດ ອັນເປັນຜົນມາຈາກສົງຄາມປາບປາມຢາເສບຕິດທີ່ດຳເນີນມາຕັ້ງແຕ່ປີ 2016-2022 ຊຶ່ງມີຜູ້ເສຍຊີວິດຫຼາຍພັນຄົນ

 

ຊາຣາ ດູແຕຣ໌ເຕ ຮອງປະທານາທິບໍດີຟິລິບປິນ ແລະ ລູກສາວຂອງອະດີດຜູ້ນຳ ອອກຖະແຫຼງການວ່າ ການສົ່ງຕົວບິດາຂອງທ່ານໄປຍັງ ICC ເປັນການກົດຂີ່ຂົ່ມເຫັງຫຼາຍກວ່າການເຮັດເພື່ອຄວາມຍຸຕິທຳ

 

“ໃນຂະນະທີ່ຂ້ອຍຂຽນຂໍ້ຄວາມນີ້ ພໍ່ຂອງຂ້ອຍກຳລັງຖືກບັງຄັບນຳຕົວໄປຍັງເຮກ ນີ້ບໍ່ແມ່ນຄວາມຍຸຕິທຳ ແຕ່ມັນຄືການກົດຂີ່ ແລະ ການຂົ່ມເຫັງ”

 

ລາວຍັງກ່າວເສີມວ່າ ພໍ່ຂອງລາວບໍ່ໄດ້ຮັບໂອກາດໃຫ້ຕໍ່ສູ້ຄະດີໃນສານທ້ອງຖິ່ນ ແລະ ເນັ້ນວ່າປະຊາຊົນຟິລິບປິນບໍ່ຄວນເຮັດຕາມຄຳສັ່ງຂອງຕ່າງຊາດທີ່ເຂົ້າມາແຊກແຊງ

 

“ພວກເຮົາແມ່ນຄົນຟິລິບປິນ ແລະ ພວກເຮົາບໍ່ແມ່ນຄົນຟິລິບປິນທີ່ບໍ່ມີຄວາມໝາຍ”

 

ຊາຣາ ຍັງປະຕິເສດລາຍງານທີ່ວ່າ ດູແຕຣ໌ເຕ ເຄີຍຮ້ອງຂໍລີ້ໄພຈາກລັດຖະບານຈີນລະຫວ່າງທີ່ເດີນທາງໄປຮ່ອງກົງ ໂດຍຢືນຢັນວ່າເຂົາບໍ່ໄດ້ພົບປະເຈົ້າໜ້າທີ່ຈີນແຕ່ຢ່າງໃດ

 

ເວໂຣນິກາ ດູແຕຣ໌ເຕ ລູກສາວລ້າ ຂອງອະດີດຜູ້ນຳ ໂພສຂໍ້ຄວາມຜ່ານອິນສຕາແກຣມ ລະບຸວ່າພໍ່ຂອງທ່ານຖືກນຳຕົວ ຂຶ້ນເຄື່ອງບິນໂດຍບໍ່ມີການແຈ້ງຈຸດໝາຍປາຍທາງໃຫ້ແກ່ຄອບຄົວ

 

“ພວກເຂົາພາຕົວພໍ່ໄປຈາກພວກເຮົາ ເອົາລາວໄວ້ເທິງເຄື່ອງບິນ ແລະ ບໍ່ຍອມບອກວ່າຈະໄປໃສ ກະລຸນາຕື່ນເຖີດ”

 

ຂະນະທີ່ສະຖານີໂທລະພາບ ABS-CBN News ຂອງຟິລິບປິນ ເຜີຍແຜ່ວິດີໂອຂະນະ ດູແຕຣ໌ເຕ ຂຶ້ນເຄື່ອງບິນເຈັດໃນມະນິລາ ແຕ່ບໍ່ໄດ້ລະບຸວ່າເຄື່ອງບິນລຳດັ່ງກ່າວກຳລັງມຸ່ງໜ້າໄປທີ່ໃດ

 

ທະນາຍຄວາມຂອງ ດູແຕຣ໌ເຕ ຫຼາຍຄົນອອກມາໂຕ້ແຍ້ງວ່າ ການຈັບກຸມຄັ້ງນີ້ບໍ່ຍຸດຕິທຳດ້ວຍກົດໝາຍ ເນື່ອງຈາກຟິລິບປິນໄດ້ຖອນຕົວຈາກ ICC ໄປແລ້ວໃນປີ 2019 ຂະນະທີ່ ດູແຕຣ໌ເຕ ຍັງດຳລົງຕຳແໜ່ງປະທານາທິບໍດີ

ເຖິງຢ່າງໃດກໍຕາມ ICC ຢືນຢັນວ່າ ສານຍັງຄົງມີອຳນາດພິຈາລະນາຄະດີ ເນື່ອງຈາກການຖອນຕົວບໍ່ມີຜົນຍ້ອນຫຼັງຕໍ່ອາຊະຍາກຳທີ່ເກີດຂຶ້ນກ່ອນເດືອນມີນາ 2019

 

ລັດຖະບານຟິລິບປິນລະບຸວ່າ ນະໂຍບາຍປາບປາມຢາເສບຕິດຂອງ ດູແຕຣ໌ເຕ ຕັ້ງແຕ່ປີ 2016 ເປັນຕົ້ນມາ ສົ່ງຜົນໃຫ້ມີຜູ້ເສຍຊີວິດປະມານ 6,200 ຄົນ ແຕ່ກຸ່ມສິດທິມະນຸດຊົນເຊື່ອວ່າຕົວເລກທີ່ແທ້ຈິງ ອາດສູງເຖິງ 12,000-30,000 ລາຍ

 

ນັກເຄື່ອນໄຫວດ້ານສິດທິມະນຸດຊົນມອງວ່າ ການຈັບກຸມ ດູແຕຣ໌ເຕ ຖືເປັນກ້າວສຳຄັນສູ່ຄວາມຍຸຕິທຳສຳລັບຄອບຄົວຂອງຜູ້ເສຍຊີວິດຈຳນວນຫຼາຍ ຊຶ່ງຕົກເປັນເຫຍື່ອຂອງນະໂຍບາຍທີ່ໃຫ້ຕຳຫຼວດ ແລະ ກຸ່ມມືປືນສັງຫານຜູ້ຕ້ອງສົງໄສຄະດີຢາເສບຕິດໂດຍບໍ່ມີການສອບສວນ

 

ພວກເຂົາຍັງຊີ້ວ່າ ຜູ້ເສຍຊີວິດສ່ວນໃຫຍ່ເປັນປະຊາຊົນທຸກຍາກໃນເມືອງ ບາງຄົນເປັນເຍົາວະຊົນ ຫຼື ແມ່ນແຕ່ຜູ້ທີ່ບໍ່ມີສ່ວນກ່ຽວຂ້ອງກັບຂະບວນການຄ້າຢາເສບຕິດແຕ່ຢ່າງໃດ

ສະແດງຄຳຄິດເຫັນ