ເມື່ອວັນທີ 19 ມີນາ ທະນາຄານກາງສະຫະລັດ (ເຟດ) ມີມະຕິຄົງທີ່ອັດຕາດອກເບ້ຍ ໃນຂະນະທີ່ເຈົ້າໜ້າທີ່ທະນາຄານກາງກຳລັງພິຈາລະນາຜົນກະທົບຂອງນະໂຍບາຍເສດຖະກິດ ເຊີງຮຸກຂອງປະທານາທິບໍດີ ໂດນັລດ໌ ທຣຳ

 

ການຕັດສິນໃຈລ່າສຸດສະແດງໃຫ້ເຫັນວ່າ ເຈົ້າໜ້າທີ່ທະນາຄານກາງກຳລັງລໍຖ້າຫຼັກຖານວ່າ ອັດຕາເງິນເຟີ້ກຳລັງມຸ່ງໜ້າສູ່ເປົ້າໝາຍ 2% ຫຼື ເສດຖະກິດກຳລັງອ່ອນແອລົງຫຼາຍກວ່າທີ່ຄາດຄະເນໄວ້ ຜົນລັບທັງສອງປະການນີ້ຈະເຮັດໃຫ້ການປັບຫຼຸດອັດຕາດອກເບ້ຍກັບມາເປັນປະເດັນອີກຄັ້ງ

 

ເຈໂຣມ ພາວເວວ ປະທານທະນາຄານກາງສະຫະລັດ (ເຟດ)

 

ເຈົ້າໜ້າທີ່ຍັງຄົງຄາດວ່າຈະປັບຫຼຸດອັດຕາດອກເບ້ຍລົງ 2 ຄັ້ງໃນປີນີ້ ຕາມການຄາດການເສດຖະກິດລ່າສຸດທີ່ເຜີຍແຜ່ໃນວັນທີ 19 ມີນາ ເຖິງແມ່ນວ່າເຈົ້າໜ້າທີ່ 8 ຄົນຄາດວ່າຈະປັບຫຼຸດອັດຕາດອກເບ້ຍ 1 ຄັ້ງ ຫຼື ບໍ່ມີການປັບຫຼຸດເລີຍໃນປີນີ້

 

ປະທານເຟດ ເຈໂຣມ ພາວເວວ ຍອມຮັບກ່ຽວກັບຄວາມບໍ່ແນ່ນອນໃນພາກການບໍລິໂພກ ແລະ ທຸລະກິດໃນອາເມລິກາ ຊຶ່ງສ່ວນໃຫຍ່ເກີດຈາກ “ຄວາມວຸ້ນວາຍ” ຂອງລັດຖະບານທຣຳ ພາວເວວກ່າວວ່າ “ຍັງຕ້ອງເບິ່ງກັນຕໍ່ໄປວ່າການປ່ຽນແປງເຫຼົ່ານີ້ສົ່ງຜົນຕໍ່ການໃຊ້ຈ່າຍແລະການລົງທຶນໃນອະນາຄົດແນວໃດ”

 

ອັດຕາດອກເບ້ຍເງິນກູ້ຫຼັກຂອງເຟດຍັງຄົງຢູ່ທີ່ລະດັບ 4.25% ເຖິງ 4.5% ການຄົງອັດຕາດອກເບ້ຍໄວ້ຈະເຮັດໃຫ້ຜູ້ກໍານົດນະໂຍບາຍຂອງເຟດຄາດການເຫັນວ່າ ການປ່ຽນແປງນະໂຍບາຍຕ່າງໆ ຂອງລັດຖະບານທຣຳສົ່ງຜົນຕໍ່ເສດຖະກິດຂອງສະຫະລັດ ແນວໃດ ຊຶ່ງລວມເຖິງພາສີ ອາກອນ ທີ່ສູງຫຼາຍ ການເນລະເທດຜູ້ອົບພະຍົບຈໍານວນຫຼາຍ ແລະ ການຫຼຸດຂະໜາດກໍາລັງຄົນຂອງລັດຖະບານກາງ

 

ຜູ້ກໍານົດນະໂຍບາຍຂອງເຟດຄາດວ່າເສດຖະກິດຈະອ່ອນແອລົງໃນປີນີ້ຫຼາຍກວ່າທີ່ເຄີຍຄາດໄວ້ ຕາມການຄາດການ ພວກເຂົາຍັງຄາດການວ່າອັດຕາເງິນເຟີ້ຈະສູງຂຶ້ນໃນປີນີ້

 

ເວົ້າແບບງ່າຍໆ ກໍຄື ໃນຂະນະທີ່ລັດຖະບານທຣຳເລີ່ມດໍາເນີນການປ່ຽນແປງໂຄງສ້າງ ເຈົ້າໜ້າທີ່ເຟດຄາດວ່າ ເສດຖະກິດຂອງສະຫະລັດ ມີແນວໂນ້ມເຂົ້າສູ່ພາວະ “ເສດຖະກິດຕົກຕ່ໍາພ້ອມພາວະເງິນເຟີ້ສູງ” ຊຶ່ງເປັນການຜະສົມປະສານລະຫວ່າງການເຕີບໂຕທີ່ຊົບເຊົາ ຫຼື ຕິດລົບ ແລະ ອັດຕາເງິນເຟີ້ທີ່ເລັ່ງຕົວສູງຂຶ້ນ

 

ດັ່ງນັ້ນ, ຕ້ອງລໍຖ້າເບິ່ງວ່າ ເສດຖະກິດຂອງສະຫະລັດ ຈະເຂົ້າສູ່ພາວະເສດຖະກິດຖົດຖອຍພ້ອມພາວະເງິນເຟີ້ ຫຼື ບໍ່ ໂດຍຄັ້ງລ່າສຸດທີ່ເກີດພາວະດັ່ງກ່າວຄືໃນຊ່ວງທົດສະວັດ 1970

ສະແດງຄຳຄິດເຫັນ