ບໍລິສັດຜູ້ໃຫ້ບໍລິການລົດໄຟລາຍໃຫຍ່ຂອງຍີ່ປຸ່ນກຽມສ້າງສະຖານີລົດໄຟແຫ່ງທຳອິດຂອງໂລກ ທີ່ໃຊ້ເຕັກໂນໂລຢີການພິມ 3 ມິຕິ ສ້າງແລ້ວສຳເລັດພາຍໃນເວລາພຽງແຕ່ 6 ຊົ່ວໂມງ

ສະຖານີລົດໄຟແຫ່ງໃໝ່ນີ້ຈະຖືກສ້າງຂຶ້ນແທນທີ່ໂຄງສ້າງໄມ້ເກົ່າທີ່ຊຸດໂຊມ ຂອງສະຖານີຮັດຊິມະ ຕັ້ງຢູ່ໃນຈັງຫວັດວາກາຢາມະ ທາງຕອນໃຕ້ຂອງປະເທດຍີ່ປຸ່ນ ຫ່າງຈາກໂອຊາກ້າປະມານ 96 ກິໂລແມັດD

ໂດຍໂຄງສ້າງສະຖານີໃໝ່ນີ້ຈະມີພື້ນທີ່ປະມານ 10 ຕາລາງແມັດ ໂດຍມີຄວາມສູງ 2.6 ແມັດ, ກວ້າງ 6.3 ແມັດ ແລະ ເລິກ 2.1 ແມັດ ຝາຂອງອາຄານຈະພິມນູນດ້ວຍຮູບໝາກກ້ຽງຊື່ດັງຂອງເມືອງອາລິດະ ແລະ ປາທະຊິອຸໂອະ ຊຶ່ງເປັນສັນຍາລັກຂອງວິຖີຊີວິດທ້ອງຖິ່ນ

ໂຄງສ້າງຂອງສະຖານີຈະຖືກສ້າງຂຶ້ນໂດຍໃຊ້ເຄື່ອງພິມ 3 ມິຕິທີ່ທັນສະໄໝ ຊຶ່ງຈະພິມຊິ້ນສ່ວນຫຼັກຂອງອາຄານລວມເຖິງຖານຮາກຖານອອກມາ ຈາກນັ້ນຈະເຮັດການເຕີມຄອນກຣີດລົງໄປໃນແຕ່ລະຊິ້ນສ່ວນກ່ອນນຳໄປສົ່ງຍັງສະຖານທີ່ກໍ່ສ້າງ.

ເມື່ອຮອດໜ້າງານ ຄົນງານຈະໃຊ້ເຄນຊ່ວຍປະກອບ ແລະ ເຊື່ອມຕໍ່ຊິ້ນສ່ວນຕ່າງໆ ຕັ້ງແຕ່ການລື້ຖອນສະຖານີເກົ່າໄປຈົນເຖິງການຕິດຕັ້ງສະຖານີໃໝ່ ຂັ້ນຕອນທັງໝົດຈະສຳເລັດພາຍໃນ 6 ຊົ່ວໂມງ ໂດຍການກໍ່ສ້າງຈະເລີ່ມຂຶ້ນໃນວັນທີ 25 ມີນາ ຫຼັງຈາກທີ່ລົດໄຟຂະບວນສຸດທ້າຍອອກຈາກສະຖານີ ແລະ ຈະສຳລັດກ່ອນທີ່ລົດໄຟຂະບວນທຳອິດຂອງເຊົ້າວັນຕໍ່ໄປຈະມາຮອດ

ເຫດຜົນທີ່ JR West ເລືອກສະຖານີຮັດຊິມະສຳລັບໂຄງການນີ້ ເນື່ອງຈາກຕຳແໜ່ງທີ່ຕັ້ງຕິດຊາຍທະເລ ຊຶ່ງຊ່ວຍໃຫ້ບໍລິສັດສາມາດທົດສອບຄວາມທົນທານຂອງອາຄານຕໍ່ສະພາບແວດລ້ອມທີ່ມີໄອທະເລໄດ້

ນອກຈາກນີ້ ບໍລິສັດຍັງວາງແຜນສຶກສາຕົ້ນທຶນການກໍ່ສ້າງ, ການບຳລຸງຮັກສາ ແລະ ການບໍລິຫານຈັດການ ເພື່ອຂະຫຍາຍໂຄງການນີ້ໃນອະນາຄົດ ໂດຍເຕັກໂນໂລຢີໃໝ່ນີ້ຍັງຖືກພິຈາລະນາໃຫ້ເປັນແນວທາງແກ້ໄຂບັນຫາການຂາດແຄນແຮງງານໃນອຸດສາຫະກຳກໍ່ສ້າງລະບົບລາງຂອງຍີ່ປຸ່ນອີກດ້ວຍ.

ສະແດງຄຳຄິດເຫັນ