ລັດຖະບານຈີນເດີນໜ້າຕອບໂຕ້ສະຫະລັດອາເມລິກາຢ່າງເຂັ້ມຂຸ້ນ ຫຼັງຈາກປະທານາທິບໍດີໂດນັລ ທຣໍາ ປະກາດຂຶ້ນພາສີນຳເຂົ້າສິນຄ້າຈາກຈີນລວມສູງສຸດເຖິງ 54%

ໂດຍຫຼ້າສຸດຈີນກຽມໃຊ້ມາດຕະການໃໝ່ ໄດ້ແກ່ ການຂຶ້ນພາສີສິນຄ້າຈາກສະຫະລັດອາເມລິກາອີກ 34%, ການຄວບຄຸມການສົ່ງອອກແຮ່ຫາຍາກ ແລະ ການຂຶ້ນບັນຊີດຳບໍລິສັດອາເມລິກັນຫຼາຍແຫ່ງທີ່ກ່ຽວຂ້ອງກັບການຂາຍອາວຸດໃຫ້ໄຕ້ຫວັນ, ຈຸດຊະນວນໃຫ້ສົງຄາມການຄ້າລະຫວ່າງສອງຊາດເສດຖະກິດຍັກໃຫຍ່ທະວີຄວາມຮຸນແຮງຍິ່ງຂຶ້ນ.

ເມື່ອວັນສຸກ (4 ເມສາ 2568) ກະຊວງການຄັງຂອງຈີນປະກາດວ່າຈະຮຽກເກັບພາສີນຳເຂົ້າສິນຄ້າຈາກສະຫະລັດອາເມລິກາເພີ່ມຂຶ້ນອີກ 34% ໂດຍມາດຕະການດັ່ງກ່າວຈະເລີ່ມບັງຄັບໃຊ້ຕັ້ງແຕ່ວັນທີ 10 ເມສານີ້ ຖືເປັນການຕອບໂຕ້ພາສີໃໝ່ຂອງລັດຖະບານສະຫະລັດອາເມລິກາທີ່ປະກາດເມື່ອຕົ້ນອາທິດ ໂດຍປະທານາທິບໍດີທຣໍາໄດ້ເພີ່ມອັດຕາພາສີຈາກ 20% ເປັນ 54%.

ກ່ອນໜ້ານີ້ ຈີນເຄີຍເກັບພາສີສິນຄ້າຈາກສະຫະລັດອາເມລິກາ ເຊັ່ນ: ຖ່ານຫີນ ແລະ ກ໊າດທຳມະຊາດເຫຼວ (LNG) ໃນອັດຕາ 15% ເພື່ອຕອບໂຕ້ການເກັບພາສີ 10% ຂອງສະຫະລັດອາເມລິກາທີ່ມີຕໍ່ສິນຄ້າຈີນ.

ຈີນຍັງປະກາດຄວບຄຸມການສົ່ງອອກແຮ່ຫາຍາກທີ່ຈຳເປັນຕໍ່ອຸດສາຫະກຳເທັກໂນໂລຢີ ເຊັ່ນ: ອຸປະກອນອິເລັກໂຕຣນິກ ແລະ ລະບົບອາວຸດ ໂດຍແຮ່ທີ່ຖືກຄວບຄຸມ ໄດ້ແກ່: ຊາມາເຣຍມ, ກາດອໂລເນຍມ, ເທີເບຍມ, ດິສໂພຣເຊຍມ, ລູເຕເທຍມ, ສະແກນເດຍມ ແລະ ອິດເທຣຍມ ຊຶ່ງລ້ວນແມ່ນແຮ່ທີ່ສະຫະລັດອາເມລິກາຕ້ອງພຶ່ງພາການນຳເຂົ້າຈາກຈີນຢ່າງຫຼາຍ, ໂດຍມາດຕະການນີ້ມີຜົນຕັ້ງແຕ່ວັນທີ 4 ເມສາເປັນຕົ້ນໄປ.

ກະຊວງການຄ້າຂອງຈີນໃຫ້ເຫດຜົນວ່າ ການຄວບຄຸມການສົ່ງອອກເຫຼົ່ານີ້ມີຂຶ້ນເພື່ອປົກປ້ອງຄວາມໝັ້ນຄົງຂອງປະເທດ ແລະ ປະຕິບັດຕາມພັນທະກໍລະນີລະຫວ່າງປະເທດດ້ານການບໍ່ແຜ່ຂະຫຍາຍອາວຸດ.

ນອກຈາກມາດຕະການທາງພາສີ ແລະ ການຄວບຄຸມແຮ່, ຈີນຍັງຕອບໂຕ້ເຊິງກົນລະຍຸດ ດ້ວຍການເພີ່ມບໍລິສັດສະຫະລັດອາເມລິກາລວມ 16 ແຫ່ງເຂົ້າສູ່ “ບັນຊີຄວບຄຸມການສົ່ງອອກ” ຊຶ່ງຈະຖືກຫ້າມເຮັດທຸລະກຳດ້ານການສົ່ງອອກສິນຄ້າເທັກໂນໂລຢີທີ່ອາດນຳໄປໃຊ້ໃນເຊີງທະຫານ. ໂດຍບໍລິສັດທີ່ໂດນເດັ່ນໃນລາຍຊື່ຄື Skydio Inc ແລະ BRINC Drones ຊຶ່ງກ່ຽວຂ້ອງກັບການຂາຍອາວຸດໃຫ້ໄຕ້ຫວັນ.

ຈີນກ່າວວ່າບໍລິສັດເຫຼົ່ານີ້ “ບ່ອນທຳລາຍອະທິປະໄຕ, ຄວາມໝັ້ນຄົງ ແລະ ຜົນປະໂຫຍດແຫ່ງຊາດຂອງຈີນຢ່າງຮ້າຍແຮງ” ຈຶ່ງຈະຫ້າມເຮັດການລົງທຶນ, ນຳເຂົ້າ ແລະ ສົ່ງອອກພາຍໃນປະເທດຈີນອີກຕໍ່ໄປ.

ນອກຈາກນີ້, ຍັງມີອີກ 11 ບໍລິສັດອາເມລິກັນທີ່ຖືກຂຶ້ນບັນຊີ “ໜ່ວຍງານບໍ່ໜ້າເຊື່ອຖື” ຊຶ່ງເປີດທາງໃຫ້ຈີນສາມາດໃຊ້ມາດຕະການລົງໂທດທາງເສດຖະກິດເພີ່ມເຕີມໄດ້ໃນອະນາຄົດ.

ໃນພາກກະສິກຳ, ຈີນປະກາດລະງັບການນຳເຂົ້າເຂົ້າເພືອງຈາກບໍລິສັດ C&D (USA) Inc ລວມເຖິງຜະລິດຕະພັນຈາກສັດປີກ ແລະ ກະດູກຈາກບໍລິສັດສະຫະລັດອາເມລິກາອີກ 3 ແຫ່ງ ໂດຍມີຜົນບັງຄັບໃຊ້ທັນທີ.

ຈີນຍັງດຳເນີນການຍື່ນເລື່ອງຮ້ອງຮຽນຕໍ່ອົງການການຄ້າໂລກ (WTO) ໂດຍລະບຸວ່າມາດຕະການພາສີຂອງສະຫະລັດອາເມລິກາຂັດຕໍ່ຂໍ້ຕົກລົງຂອງ WTO ແລະ ຮຽກຮ້ອງໃຫ້ເປີດການປຶກສາຫາລືຢ່າງເປັນທາງການ.

ມາດຕະການພາສີຂອງທຣໍາ ແລະ ການຕອບໂຕ້ຂອງຈີນສົ່ງຜົນກະທົບຕໍ່ຕະຫຼາດການເງິນທົ່ວໂລກຢ່າງຮຸນແຮງ ໂດຍຕະຫຼາດຮຸ້ນສະຫະລັດອາເມລິກາສູນເສຍມູນຄ່າລວມກວ່າ 2.4 ລ້ານລ້ານໂດລາສະຫະລັດ. ຮຸ້ນເທັກໂນໂລຢີຢ່າງ Apple ແລະ Nvidia ດິ່ງລົງເນື່ອງຈາກມີໂຮງງານຜະລິດໃນຈີນ ແລະ ໄຕ້ຫວັນ.

ຕະຫຼາດຮຸ້ນຍີ່ປຸ່ນ ແລະ ຢູໂຣບກໍໄດ້ຮັບຜົນກະທົບຢ່າງໜັກ.

ໂດຍສະເພາະໃນຍີ່ປຸ່ນ, ນາຍົກລັດຖະມົນຕີຊິເງຣຸ ອິຊິບະ ລະບຸວ່າມາດຕະການຂອງທຣໍາໄດ້ສ້າງ “ວິກິດລະດັບຊາດ” ໃຫ້ກັບຍີ່ປຸ່ນ ຂະນະທີ່ຕະຫຼາດຮຸ້ນໂຕກຽວປະເຊີນອາທິດທີ່ຮ້າຍແຮງທີ່ສຸດໃນຮອບຫຼາຍປີ.

ດ້ານສະຫະລັດອາເມລິກາ, ລັດຖະມົນຕີຕ່າງປະເທດ ມາໂກ ຣູບິໂອ ພະຍາຍາມຫຼຸດຄວາມກັງວົນ ໂດຍກ່າວວ່າ “ເສດຖະກິດບໍ່ໄດ້ພັງ ແຕ່ຕະຫຼາດກຳລັງປັບຕົວຕໍ່ການປ່ຽນແປງໃນລະບຽບການຄ້າໂລກ.”

ສະແດງຄຳຄິດເຫັນ