ທ່ານ ໜູຮັກ ພູມສະຫວັນ ເກີດເມື່ອວັນທີ 9 ເມສາ ປີ 1914 ເປັນ ປະທານປະເທດແຫ່ງ ສປປ ລາວ ຜູ້ທີ 3,

 

ທ່ານ ໜູຮັກ ພູມສະຫວັນ ໄດ້ຮັບການເລືອກຕັ້ງເປັນກຳມະການສູນກາງພັກ ໃນກອງປະຊຸມໃຫຍ່ ຄັ້ງທີ I, ຄັ້ງທີ II, ຄັ້ງທີ III ,ຄັ້ງທີ IV ແລະ ຄັ້ງທີ V ຂອງພັກ ໃນປີ 1955, ປີ 1972, ປີ 1982, ປີ 1986 ແລະ ປີ 1991,

 

ໄດ້ຮັບການເລືອກຕັ້ງເປັນກຳມະການກົມການເມືອງສູນກາງພັກ ນັບແຕ່ກອງປະຊຸມໃຫຍ່ ຄັ້ງທີ 2 ເຖິງກອງປະຊຸມໃຫຍ່ ຄັ້ງທີ V, ໄດ້ຮັບການແຕ່ງຕັ້ງເປັນທີ່ປຶກສາ ຂອງຄະນະບໍລິຫານງານສູນກາງພັກ ໃນກອງປະຊຸມໃຫຍ່ ຄັ້ງທີ VI ແລະ ຄັ້ງທີ VII ຂອງພັກ ໃນປີ 1996 ແລະ ປີ 2001.

 

ທ່ານໜູຮັກ ເສຍຊີວິດໃນວັນທີ 9 ກັນຍາ 2008, ສະຫາຍເປັນຜູ້ນຳພັກ-ລັດ, ການນໍາປະຕິວັດ ລຸ້ນທໍາອິດ ຂອງການປະຕິວັດລາວ, ແມ່ນຜູ້ໜຶ່ງທີ່ເປັນແບບຢ່າງທີ່ດີໃນການ ເສຍສະຫຼະເພື່ອປະເທດຊາດ ໜຶ່ງໃນການສະແດງອອກຂອງເພິ່ນ ເຊັ່ນ

 

ຕົວຢ່າງ: ສູນກາງພັກຕົກລົງຢາກສ້າງເຮືອນຫຼັງໃຫຍ່ງາມໆໃຫ້ເພິ່ນ ແຕ່ລຸງຕອບວ່າ: “ຂອບໃຈທີ່ມີ ຄວາມຫວັງດີຕໍ່ເຮົາ, ເຮົາວ່າຢູ່ຄືແນວນີ້ກໍດີແລ້ວ ຄິດເຖິງສະໄໝທຳການຕໍ່ສູ້ກູ້ຊາດ ພວກເຮົາຍັງພາກັນນອນຢູ່ໃນປ່າດົງ, ນອນຢູ່ໃນຖໍ້າ ຫຼື ກ້ອງກົກໄມ້ໃຫຍ່ ທາກກັດ ຍຸງກິນ ຝົນຕົກຮໍ່າໃສ່ຫົວກໍຍັງຢູ່ໄດ້.

 

 

ຢູ່ຄືແນວນີ້ ແມ່ນດີຫຼາຍແລ້ວ ກໍາແພງວ່າມັນເອນງ່ຽງຈະລົ້ມກໍເອົາໄມ້ແຂງໆໄປຄໍ້າໄວ້ບໍ່ໃຫ້ມັນລົ້ມ ເອົາເງິນກ້ອນນັ້ນໄປຊ່ວຍເຫຼືອປະຊາຊົນທີ່ພວກເຂົາຍັງທຸກຍາກຢູ່ ຈະດີກວ່າ ເນີ….ເນີ…!

 

 

ຖ້າປູກໃຫ້ເຮົາໃໝ່ໃຫຍ່ງາມ ເຮົາຈະບໍ່ຢູ່ ເພາະຄິດອາຍປະຊາຊົນ ເນີ…! “

 

 

ທ່ານ ໜູຮັກ ພູມສະຫວັນ ຜູ້ເປັນແບບຢ່າງໃຫ້ແກ່ ລູກຫຼານ, ພໍ່ແມ່ປະຊາຊົນ ໃນການໃຊ້ຊີວິດທີ່ລຽບງ່າຍ, ປະຢັດມັດທະຍັດ, ໃຊ້ຊີວິດຕິດແທດກັບປະຊາຊົນ ລົງເຖິງກົກເຖິງຮາກຖານ ແລະ ມີລະບຽບວິໄນ.

 

ສົມຄຳລໍ້າລືທີ່ວ່າ ພໍ່ເຖົ້າແສງສະຫວ່າງ ເປັນຜູ້ນຳທີ່ນຳເອົາແສງສະຫວ່າງເຂົ້າປະຊາຊົນໃນທຸກຫົນແຫ່ງ.

 

 

ປະຊາຊົນຍັງເວົ້າໃຫ້ເພີ່ນວ່າ ພໍ່ເຖົ້າມີເສື້ອຜືນດຽວ ນຸ່ງມາແລ້ວກະຊັກພ້ອມ ມື້ອື່ນໄປປະຊຸມ ກະນຸ່ງຜືນນັ້ນຕໍ່.

 

ເນື່ອງໃນໂອກາດວັນເກີດຂອງ ທ່ານ ໜູຮັກ ພູມສະຫວັນ ຄົບຮອບ 111 ປີ ( 09 ເມສາ 1914 – 09 ເມສາ 2025 ) ເພື່ອລະລຶກເຖິງຄຸນງາມຄວາມດີ ແລະ ຜົນງານອັນໃຫຍ່ຫຼວງຂອງ ທ່ານ ໜູຮັກ ພູມສະຫວັນ ທີ່ໄດ້ເສຍສະຫຼະອຸທິດຕົນເພື່ອປະເທດຊາດ ເພື່ອປະຊາຊົນໃນໄລຍະຜ່ານມາ.

 

ທ່ານສາມາດເຂົ້າໄປສຶກສາລະອຽດປະຫວັດການດຳລົງຊີວິດຂອງທ່ານໄດ້ທີ່ອະນຸສອນສະຖານຂອງທ່ານ ໜູຮັກ ພູມສະຫວັນຕັ້ງຢູ່ ບ້ານ ສະພານທອງເໜືອ, ເມືອງ ສີສັດຕະນາກ (ຮ່ອມ2), ນະຄອນຫຼວງ ວຽງຈັນ.

ເປີດເວລາ: 08:30-11:30-13:30-16:00.

 

ສະແດງຄຳຄິດເຫັນ