ເຈົ້າໜ້າທີ່ທຳນຽບຂາວຢືນຢັນວ່າ ສະຫະລັດຈະເກັບພາສີສຸນລະກາກອນ 104% ຕໍ່ສິນຄ້ານຳເຂົ້າຈາກຈີນໃນວັນພຸດທີ 9 ເມສາ ເວລາ 00.01 ນ. ຕາມເວລາສະຫະລັດ ຫຼື ຕົງກັບເວລາ 11.01 ນ. ຕາມເວລາປະເທດລາວ

 

ດ້ານທ່ານສະກັອດ ເບສເຊັນ ລັດຖະມົນຕີຄັງສະຫະລັດ ກ່າວວ່າ ຈີນກຳລັງເຮັດຜິດພາດຄັ້ງໃຫຍ່ດ້ວຍການຄິດຕອບໂຕ້ສະຫະລັດ ຂະນະທີ່ຈີນເປັນຝ່າຍເສຍປຽບໃນການທຳສົງຄາມການຄ້າກັບສະຫະລັດ

 

“ຂ້ອຍຄິດວ່າການຕອບໂຕ້ຂອງຈີນຖືເປັນການເຮັດຜິດພາດຄັ້ງໃຫຍ່ ເພາະພວກເຂົາກຳລັງຖືໄພ 2 ໃບໃນມືທີ່ມີແຕ່ໃບລະ 2 ແຕ້ມ”

 

“ພວກເຮົາຈະເສຍຫາຍຫຍັງຈາກການທີ່ຈີນຂຶ້ນພາສີ-ອາກອນກັບພວກເຮົາ ເພາະພວກເຮົາສົ່ງອອກໄປຍັງຈີນພຽງ 1 ໃນ 5 ເມື່ອທຽບກັບທີ່ພວກເຂົາສົ່ງອອກມາຍັງພວກເຮົາ ດັ່ງນັ້ນພວກເຂົາກຳລັງຫຼິ້ນໄພໃນເກມທີ່ຈະຖືກກິນລວບ” ທ່ານເບສເຊັນກ່າວຕໍ່ສຳນັກຂ່າວ CNBC

 

ທັງນີ້, ຈີນປະກາດເກັບພາສີ 34% ຕໍ່ສິນຄ້ານຳເຂົ້າທັງໝົດທີ່ມາຈາກສະຫະລັດ ໂດຍເລີ່ມມີຜົນຕັ້ງແຕ່ວັນທີ 10 ເມສາ ເພື່ອຕອບໂຕ້ຕໍ່ການທີ່ປະທານາທິບໍດີໂດນັລດ໌ ທຣຳເກັບພາສີ-ອາກອນຕອບໂຕ້ (reciprocal tariff) ໃນອັດຕາ 34% ຕໍ່ສິນຄ້າທີ່ນຳເຂົ້າຈາກຈີນ ຊຶ່ງເມື່ອລວມກັບມາດຕະການເກັບພາສີທີ່ສະຫະລັດບັງຄັບໃຊ້ກັບຈີນທີ່ລະດັບ 20% ຈະເຮັດໃຫ້ຈີນຕ້ອງປະເຊີນກັບອັດຕາພາສີລວມຈາກສະຫະລັດສູງເຖິງ 54%

 

ນອກຈາກນີ້, ປທນ.ທຣຳໃຫ້ເວລາລັດຖະບານຈີນຈົນເຖິງວັນນີ້ (8 ເມສາ) ໃນການຍົກເລີກມາດຕະການເກັບພາສີ 34% ດັ່ງກ່າວຕໍ່ສິນຄ້ານຳເຂົ້າຈາກສະຫະລັດ ບໍ່ດັ່ງນັ້ນ, ຈີນຈະຖືກສະຫະລັດເກັບພາສີເພີ່ມເຕີມອີກ 50% ຊຶ່ງຈະເຮັດໃຫ້ຈີນຖືກເກັບພາສີລວມຈາກສະຫະລັດສູງເຖິງ 104%

 

ເຖິງຢ່າງໃດກໍ່ຕາມ, ຫຼ້າສຸດຈີນຢືນຢັນວ່າຈະຕໍ່ສູ້ຈົນເຖິງທີ່ສຸດ ແລະ ຈີນຈະບໍ່ຍົກເລີກການເກັບພາສີ 34% ຕໍ່ສິນຄ້ານຳເຂົ້າຈາກສະຫະລັດແຕ່ຢ່າງໃດ

 

 

ສະແດງຄຳຄິດເຫັນ