ຢ່າໄປແຊ່ເຂົ້າສານ! ນ້ຳເຂົ້າໂທລະສັບມືຖືໃນຊ່ວງປີໃຫມ່ລາວ ເອົານ້ຳອອກແນວໃດດີ (iPhone ແລະ Android)

 

ໃນຊ່ວມື້ປີໃຫມ່ລາວ ສິ່ງໜຶ່ງທີ່ພວກເຮົາຕ້ອງລະວັງເວລາອອກໄປນອກບ້ານ ນັ້ນກໍຄືນ້ຳ. ສຳລັບຜູ້ທີ່ຕັ້ງໃຈໄປຫຼິ້ນນ້ຳ ກໍຄົງຈະຊອກຫາວິທີປ້ອງກັນເຄື່ອງໄວ້ກ່ອນແລ້ວ ເຊັ່ນ: ຖົງກັນນ້ຳ.

 

ແຕ່ສຳລັບຄົນທີ່ບໍ່ຢາກຫຼິ້ນ ກໍອາດຈະສ່ຽງຖືກນ້ຳໄດ້ງ່າຍໆຢູ່ດີ. ດັ່ງນັ້ນ, ການກຽມຕົວຮັບມືກັບເຫດການທີ່ບໍ່ຄາດຄິດໃນຊ່ວງປີໃຫມ່ເຊັ່ນໂທລະສັບຖືກນ້ຳ ກໍເປັນເລື່ອງຈຳເປັນເຊັ່ນກັນ.

 

ປັດຈຸບັນ ສະມາດໂຟນສ່ວນຫຼາຍເກືອບຈະປ້ອງກັນນ້ຳໄດ້ໝົດແລ້ວ, ເບິ່ງໄດ້ຈາກມາດຕະຖານການປ້ອງກັນນ້ຳ ເຊັ່ນ: IP69 ເປັນຕົ້ນ.

 

ແຕ່ກໍບໍ່ເຖິງ 100% ເພາະເຄີຍມີເຫດການສະມາດໂຟນທີ່ມີມາດຕະຖານປ້ອງກັນນ້ຳແລ້ວນ້ຳເຂົ້າເຊັ່ນກັນ.

 

ແລ ະຖ້າສະມາດໂຟນຂອງທ່ານຖືກນ້ຳ, ທ່ານສາມາດເລືອກໃຊ້ 3 ວິທີຂ້າງລຸ່ມນີ້ໃນການເອົານ້ຳອອກຈາກເຄື່ອງໄດ້.

 

Apple ແລະ Samsung ແນະນຳດັ່ງນີ້

 

Apple

 

 

ສຳລັບຜະລິດຕະພັນ Apple ເມື່ອມີຂອງແຫຼວເຂົ້າໄປໃນຊ່ອງສາກ USB-C, ຈະມີການແຈ້ງເຕືອນທີ່ໜ້າຈໍວ່າມີຂອງແຫຼວຢູ່ໃນຊ່ອງສາກ.

 

ຖ້າທ່ານເຫັນການແຈ້ງເຕືອນລັກສະນະນີ້, Apple ແນະນຳໃຫ້ປະຕິບັດຕາມຂັ້ນຕອນຕໍ່ໄປນີ້:

 

1. ປິດເຄື່ອງ ແລະ ເຊັດໃຫ້ແຫ້ງດ້ວຍຜ້ານຸ່ມທີ່ບໍ່ເປັນຂຸຍ
2. ຫັນພອດສາກລົງລຸ່ມ, ເຄາະເຄື່ອງເບົາໆ ເພື່ອໄລ່ນ້ຳອອກຈາກພອດ
3. ວາງ iPhone ໄວ້ໃນບ່ອນທີ່ມີອາກາດຖ່າຍເທດີເປັນເວລາ 5 ຊົ່ວໂມງ

 

ຫຼັງຈາກຜ່ານໄປ 5 ຊົ່ວໂມງແລ້ວ, ໃຫ້ເປີດເຄື່ອງ, ໃຊ້ງານໄດ້ຕາມປົກກະຕິ. ແຕ່ຖ້າພົບຄວາມຜິດປົກກະຕິ, ບໍລິສັດແນະນຳໃຫ້ຕິດຕໍ່ Apple ຫຼື ຕົວແທນຫຼັງການຂາຍເພື່ອກວດອາການເພີ່ມເຕີມ.

 

Samsung

 

 

 

ວິທີການຂອງ Samsung ຈະຄ້າຍຄືກັບ Apple ໂດຍໃຫ້ປະຕິບັດຕາມຂັ້ນຕອນຕໍ່ໄປນີ້:

 

1. ນຳເຄື່ອງອອກຈາກແຫຼ່ງນ້ຳ, ປິດເຄື່ອງ
2. ເຊັດໃຫ້ແຫ້ງດ້ວຍຜ້າ
3. ນຳໄປວາງໄວ້ບ່ອນທີ່ມີອາກາດຖ່າຍເທຈົນເຄື່ອງແຫ້ງ (ບໍ່ໄດ້ລະບຸເວລາ)

 

ຖ້າປະຕິບັດຕາມວິທີຂ້າງເທິງແລ້ວຍັງພົບບັນຫາ, Samsung ແນະນຳໃຫ້ຕິດຕໍ່ຮ້ານຫຼືຜູ້ໃຫ້ບໍລິການຫຼັງການຂາຍເພື່ອກວດອາການເພີ່ມເຕີມເຊັ່ນກັນ.

 

ເມັດຊິລິກ້າເຈວ

 

 

ຊິລິກ້າເຈວແບບເມັດເປັນອີກວິທີໜຶ່ງທີ່ສາມາດໃຊ້ໄດ້. ຕາມ Gazelle, ມັນສາມາດດູດຊັບຄວາມຊຸ່ມອອກຈາກສະມາດໂຟນໄດ້ ແລະ ຍັງສາມາດຊື້ໄດ້ທົ່ວໄປ.

 

ໃຫ້ປະຕິບັດຕາມຂັ້ນຕອນຕໍ່ໄປນີ້:

 

1. ນຳເຄື່ອງອອກຈາກແຫຼ່ງນ້ຳ, ປິດເຄື່ອງ
2. ໃຊ້ຜ້າເຊັດເຄື່ອງເພື່ອໃຫ້ຂອງແຫລວຢູ່ທີ່ເຄື່ອງໜ້ອຍທີ່ສຸດ
3. ວາງ iPhone ລົງໃນກ່ອງ
4. ໃສ່ຊິລິກ້າເຈວລົງໃນກ່ອງ, ປິດຝາໃຫ້ແໜ້ນ
5. Gazelle ແນະນຳໃຫ້ໃສ່ໄວ້ໃນກ່ອງພ້ອມຊິລິກ້າເຈວ 72 ຊົ່ວໂມງ
6. ເມື່ອຄົບກຳນົດເວລາແລ້ວ, ໃຫ້ທົດລອງເປີດເຄື່ອງ

ສະແດງຄຳຄິດເຫັນ