ວັນທີ 16 ເມສາ 2025 ທີ່ຜ່ານມາ, ສານສູງສຸດແຫ່ງສະຫະລາຊະອານາຈັກໄດ້ມີຄຳພິພາກສາສຳຄັນ ໂດຍລະບຸວ່າ ຄຳວ່າ “ແມ່ຍິງ” ແລະ “ເພດ” ຕາມພະລາຊະບັນຍັດຄວາມເທົ່າທຽມປີ 2010 ໝາຍເຖິງເພດຍິງໂດຍກຳເນີດເທົ່ານັ້ນ ບໍ່ລວມເຖິງແມ່ຍິງຂ້າມເພດ ເຖິງແມ່ນວ່າຈະມີໃບຮັບຮອງການປ່ຽນເພດກໍຕາມ.

ຄະດີນີ້ເລີ່ມຕົ້ນຈາກການທີ່ກຸ່ມ For Women Scotland ຍື່ນຟ້ອງລັດຖະບານສກັອດແລນກ່ຽວກັບກົດໝາຍປີ 2018 ທີ່ກຳນົດໃຫ້ມີສັດສ່ວນແມ່ຍິງ 50% ໃນຄະນະກຳມະການຂອງໜ່ວຍງານສາທາລະນະ ໂດຍລວມແມ່ຍິງຂ້າມເພດທີ່ມີໃບຮັບຮອງການປ່ຽນເພດໄວ້ດ້ວຍ. ກຸ່ມດັ່ງກ່າວເຫັນວ່າການນິຍາມເຊັ່ນນີ້ເກີນຂອບເຂດອຳນາດຂອງລັດຖະສະພາ ແລະ ອາດສົ່ງຜົນກະທົບຕໍ່ສິດທິຂອງແມ່ຍິງທີ່ເກີດມາເປັນເພດຍິງ.

ສານສູງສຸດມີມະຕິເປັນເອກະສັນວ່າ “ເພດ” ເປັນແນວຄິດແບບທະວິພາຄີ ຄືບຸກຄົນເປັນຊາຍຫຼືຍິງ ແລະ ການມີໃບຮັບຮອງການປ່ຽນເພດບໍ່ພຽງພໍທີ່ຈະໄດ້ຮັບການຄຸ້ມຄອງຕາມກົດໝາຍໃນຖານະເພດຍິງໂດຍກຳເນີດ. ເຖິງຢ່າງໃດກໍຕາມ, ສານຢືນຢັນວ່າຜູ້ຂ້າມເພດຍັງຄົງໄດ້ຮັບການຄຸ້ມຄອງຈາກການເລືອກປະຕິບັດຕາມພະລາຊະບັນຍັດຄວາມເທົ່າທຽມໃນຖານະຜູ້ທີ່ມີການປ່ຽນເພດ.

ຄຳພິພາກສານີ້ໄດ້ຮັບການສະໜັບສະໜູນຈາກກຸ່ມທີ່ເນັ້ນສິດທິບົນພື້ນຖານເພດກຳເນີດ ເຊັ່ນ ນັກຂຽນ J.K. Rowling ທີ່ເຄີຍບໍລິຈາກເງິນສະໜັບສະໜູນກຸ່ມ For Women Scotland ຂະນະທີ່ກຸ່ມສິດທິມະນຸດຊົນ ແລະ ຜູ້ສະໜັບສະໜູນສິດທິຜູ້ຂ້າມເພດສະແດງຄວາມກັງວົນວ່າຄຳຕັດສິນນີ້ອາດເປັນການຖອຍຫຼັງຂອງສິດທິທີ່ໄດ້ຮັບການຄຸ້ມຄອງມາແລ້ວ.

ຜົນກະທົບຂອງຄຳພິພາກສານີ້ອາດຂະຫຍາຍໄປເຖິງການເຂົ້າເຖິງບໍລິການສະເພາະເພດ ເຊັ່ນ ຫ້ອງນ້ຳ, ໂຮງໝໍ, ແລະ ທີ່ພັກພິງສຳລັບຜູ້ຖືກກະທຳຄວາມຮຸນແຮງ ລວມເຖິງການມີສ່ວນຮ່ວມໃນກິດຈະກຳທີ່ຈຳກັດສະເພາະເພດຍິງ ຊຶ່ງອາດຕ້ອງມີການປັບນະໂຍບາຍໃຫ້ສອດຄ່ອງກັບຄຳຕັດສິນນີ້.

ສະແດງຄຳຄິດເຫັນ