ປະທານາທິບໍດີ ສີ ຈິ້ນຜິງຂອງຈີນ ແລະ ນາຍົກລັດຖະມົນຕີອັນວາຣ໌ ອິບຣາຮິມຂອງມາເລເຊຍ ອອກແຖລງການຮ່ວມຍຸດທະສາດຄວາມຮ່ວມມືເພື່ອເສີມສ້າງປະຊາຄົມຈີນ-ມາເລເຊຍລະດັບສູງທີ່ມີອະນາຄົດຮ່ວມກັນ

ຫຼັງຈາກສຳເລັດການປຶກສາ-ຫາລືເມື່ອວານນີ້ ທີ່ຕຶກບ້ານພັກຢ່າງເປັນທາງການຂອງນາຍົກລັດຖະມົນຕີອັນວາຣ໌ໃນນະຄອນປຸຕຣາຈາຍາ ເນື່ອງໃນໂອກາດປະທານາທິບໍດີສີຢ້ຽມຢາມມາເລເຊຍ, ປະທານາທິບໍດີສີ ຈິ້ນຜິງຂອງຈີນ ແລະ ນາຍົກລັດຖະມົນຕີອັນວາຣ໌ ອິບຣາຮິມຂອງມາເລເຊຍ ໄດ້ອອກແຖລງການຮ່ວມຍຸດທະສາດຄວາມຮ່ວມມື.

ໃນການພົບປະຫາລືກັບນາຍົກລັດຖະມົນຕີອັນວາຣ໌, ປະທານາທິບໍດີສີໄດ້ກະຕຸ້ນການຈັບມືລະຫວ່າງຈີນກັບມາເລເຊຍເພື່ອຕໍ່ຕ້ານສິ່ງເຫຼົ່ານີ້ ຄື: ຄວາມພະຍາຍາມແຍກຫ່ວງໂສ້ອຸປະທານ (decoupling), ການທຳລາຍຫ່ວງໂສ້ອຸປະທານ, “ສະໜາມນ້ອຍແຕ່ຮົ້ວສູງ” (small yard with high fences) ແລະ ການເກັບພາສີ-ອາກອນຕາມອຳເພີໃຈ.

ໂອກາດນີ້, ປະທານາທິບໍດີໄດ້ຜັກດັນຂໍ້ສະເໜີຍຸດທະສາດດ້ານຄວາມຮ່ວມມື ເພື່ອເສີມສ້າງປະຊາຄົມຈີນ-ມາເລເຊຍໃນລະດັບສູງທີ່ມີອະນາຄົດຮ່ວມກັນ 3 ຂໍ້ ດັ່ງນີ້:

ຂໍ້ໜຶ່ງ

ຈີນແລະມາເລເຊຍຄວນປະສານມືກັນຕໍ່ໄປ ເພື່ອເດີນໜ້າພັດທະນາໄປໃນເສັ້ນທາງທີ່ເໝາະສົມກັບເງື່ອນໄຂຂອງຈີນ ແລະ  ມາເລເຊຍເອງ ແລະ ຮັກສາອະນາຄົດຂອງພວກເຮົາໃຫ້ຢູ່ໃນມືຂອງພວກເຮົາ.

ປະທານາທິບໍດີສີຂໍໃຫ້ 2 ປະເທດຈັດຕັ້ງກົນໄກການຫາລືແບບ “2+2” (“2+2” dialogue mechanism) ທັງດ້ານການທູດແລະການປ້ອງກັນປະເທດ.

ຂໍ້ສອງ

ຈີນແລະມາເລເຊຍຄວນຜະນຶກກຳລັງກັນໃນການພັດທະນາ ແລະ ເປັນຕົວຢ່າງຂອງຮູບແບບຄວາມຮ່ວມມືດ້ານການພັດທະນາທີ່ມີຄຸນນະພາບສູງ. ຈີນຍຶດໝັ້ນໃນການເດີນໜ້າສູ່ຄວາມທັນສະໄໝໃນທຸກດ້ານຜ່ານການພັດທະນາທີ່ມີຄຸນນະພາບສູງ ຊຶ່ງສອດຄ່ອງກັບ “ກອບເສດຖະກິດມາດານີແຫ່ງມາເລເຊຍ” (Malaysia’s Madani Economy framework).

ໃນດ້ານເສດຖະກິດລ້ຳສະໄໝ 2 ປະເທດຄວນຈັບມືກັນສ້າງການເຕີບໂຕໃນເສດຖະກິດລ້ຳສະໄໝເຊັ່ນ: ເສດຖະກິດດິຈິຕອລ, ເສດຖະກິດສີຂຽວ, ເສດຖະກິດສີນ້ຳເງິນ (blue economy) ແລະ ປັນຍາປະດິດ.

ຂະນະດຽວກັນ, ໃນດ້ານເສດຖະກິດດັ້ງເດີມ ຈີນແລະມາເລເຊຍຄວນຍົກລະດັບຄວາມຮ່ວມມືໃນເສດຖະກິດດັ້ງເດີມດ້ວຍການສົ່ງເສີມການລົງທຶນ 2 ທາງ, ຄວນກຽມພ້ອມລ່ວງໜ້າດ້ານການຄົມມະນາຄົມຂົນສົ່ງທາງທະເລແລະທາງລາງລະຫວ່າງ 2 ປະເທດ, ສົ່ງເສີມໂຄງການ “Two Countries, Twin Parks” ແລະ ຍົກລະດັບທ່າເຮືອສຳຄັນໆຂອງມາເລເຊຍ ເພື່ອໃຫ້ເປັນສູນກາງຂອງ “ລະບຽງການຄ້າເຊື່ອມທາງບົກກັບທາງທະເລສາຍໃໝ່” (New International Land-Sea Trade Corridor).

ຂໍ້ສາມ

ປະທານາທິບໍດີສີຮຽກຮ້ອງ 2 ປະເທດແລກປ່ຽນຮຽນຮູ້ຊຶ່ງກັນແລະກັນໃຫ້ເລິກເຊິ່ງລະຫວ່າງ 2 ອາລິຍະທຳ ຮ່ວມມືກັນໃນການຫາລືລະຫວ່າງອາລິຍະທຳຂົງຈື້-ມຸສລິມ. ຂໍ້ຕົກລົງຍົກເວັ້ນວີຊ່າຊຶ່ງກັນແລະກັນຈະຊ່ວຍສົ່ງເສີມການທ່ອງທ່ຽວແລະດ້ານອື່ນໆລະຫວ່າງ 2 ປະເທດ.

ປະທານາທິບໍດີສີກ່າວດ້ວຍວ່າ ຈີນແລະມາເລເຊຍເປັນມິດກັນມາຢ່າງຊ້ານານໃນປະຫວັດສາດ ແລະ ມິດຕະພາບຈີນ-ມາເລເຊຍຢືນຍາວນານນັບພັນປີ. ເມື່ອປີທີ່ແລ້ວ, ທັງ 2 ປະເທດເພິ່ງສະເຫຼີມສະຫຼອງການສະຖາປະນາຄວາມສຳພັນທາງການທູດຄົບ 50 ປີ. ສ່ວນອີກ 50 ປີຕໍ່ຈາກນີ້, ຈີນແລະມາເລເຊຍຈະຮ່ວມກັນສ້າງປະຊາຄົມຈີນ-ມາເລເຊຍທີ່ມີຄຸນນະພາບສູງແລະມີອະນາຄົດຮ່ວມກັນ.

ຫຼັງຈາກການປຶກສາຫາລືຂອງຜູ້ນຳທັງສອງ ຈີນແລະມາເລເຊຍໄດ້ແລກປ່ຽນເອກະສານຄວາມຮ່ວມມືຫຼາຍກວ່າ 30 ສະບັບ ຄອບຄຸມຄວາມຮ່ວມມືຕັ້ງແຕ່ເສດຖະກິດດິຈິຕອລ, ການຄ້າທາງດ້ານບໍລິການ, ປັນຍາປະດິດ, ທາງລົດໄຟ ໄປຈົນເຖິງການຄຸ້ມຄອງແພນດ້າຍັກ

ຈາກນັ້ນ, ປະທານາທິບໍດີສີ ຈິ້ນຜິງ ເຂົ້າຮ່ວມງານລ້ຽງອາຫານແລງທີ່ນາຍົກລັດຖະມົນຕີອັນວາຣ໌ ເປັນເຈົ້າພາບລ້ຽງຕ້ອນຮັບປະທານາທິບໍດີຈີນເມື່ອຄືນທີ່ຜ່ານມາ.

ປະທານາທິບໍດີສີຈະເດີນທາງອອກຈາກມາເລເຊຍ ໄປຢ້ຽມຢາມກຳປູເຈຍໃນມື້ນີ້ (17) ເປັນເວລາ 2 ວັນ. ກຳປູເຈຍຈະເປັນປະເທດສຸດທ້າຍໃນ 3 ປະເທດອາຊີຕາເວັນອອກສຽງໃຕ້ທີ່ປະທານາທິບໍດີສີເດີນທາງຢ້ຽມຢາມໃນຄັ້ງນີ້.

ສະແດງຄຳຄິດເຫັນ