ນັກທ່ອງທ່ຽວທີ່ຈະເດີນທາງໄປປະເທດໄທ ຕ້ອງກອກ TDAC ລ່ວງໜ້າ 3 ວັນ ກ່ອນເຂົ້າໄທທຸກຊ່ອງທາງ ເລີ່ມ 1 ພຶດສະພາ 2025 ນີ້

ສຳນັກກວດຄົນເຂົ້າເມືອງຂອງໄທປະກາດອັບເດດສຳຄັນສຳລັບນັກທ່ອງທ່ຽວທຸກຄົນທີ່ເດີນທາງເຂົ້າປະເທດ.

ຕັ້ງແຕ່ວັນທີ 1 ພຶດສະພາ 2025 ເປັນຕົ້ນໄປ, ນັກເດີນທາງທີ່ບໍ່ໄດ້ຖືສັນຊາດໄທຕ້ອງກອກແບບຟອມບັດຂາເຂົ້າດິຈິຕອລຂອງປະເທດໄທ (TDAC) ທາງອອນລາຍລ່ວງໜ້າກ່ອນເດີນທາງເຂົ້າປະເທດ.

ລະບົບໃໝ່ນີ້ຈະຊ່ວຍຫຼຸດລະຍະເວລາການກວດຄົນເຂົ້າເມືອງ, ເຮັດໃຫ້ຂັ້ນຕອນສະດວກແລະປອດໄພຍິ່ງຂຶ້ນ ໂດຍບໍ່ຕ້ອງໃຊ້ແບບຟອມເຈ້ຍອີກຕໍ່ໄປ.

ນັກເດີນທາງຕ້ອງລົງທະບຽນ TDAC ພາຍໃນ 3 ວັນກ່ອນເດີນທາງມາເຖິງ ແລະ ສາມາດສະໝັກໄດ້ທີ່ເວັບໄຊ tdac.immigration ເພື່ອຄວາມສະດວກສະບາຍ.

ທາງການໄດ້ຈັດທຳສື່ປະຊາສຳພັນໃນ 5 ພາສາ ໄດ້ແກ່: ອັງກິດ, ຈີນ, ເກົາຫຼີ, ຣັດເຊຍ ແລະ ຍີ່ປຸ່ນ ພ້ອມແຜ່ນພັບ ແລະ ຄລິບວິດີໂອແນະນຳການໃຊ້ງານ TDAC.

ນອກຈາກນີ້, ສຳນັກງານກວດຄົນເຂົ້າເມືອງຍັງໄດ້ບູລະນາການເຮັດວຽກຮ່ວມກັບໜ່ວຍງານທີ່ກ່ຽວຂ້ອງ ເຊັ່ນ: ລະບົບ E-Visa ຂອງກົມການກົງສຸນ, ລະບົບຄັດກອງພະຍາດຂອງກົມຄວບຄຸມພະຍາດ ແລະ ລະບົບຈັດເກັບຄ່າທຳນຽມນັກທ່ອງທ່ຽວຂອງກະຊວງການທ່ອງທ່ຽວແລະກິລາ ເພື່ອໃຫ້ການເດີນທາງເຂົ້າປະເທດໄທເປັນໄປຢ່າງລາບລື່ນແລະມີປະສິດທິພາບຫຼາຍຂຶ້ນ.

ທັງນີ້, ກະຊວງການທ່ອງທ່ຽວແລະກິລາເນັ້ນຢ້ຳເຖິງຄວາມສຳຄັນຂອງມາດຕະການໃໝ່ນີ້ໃນການຍົກລະດັບປະເທດໄທໃຫ້ເປັນ Smart Tourism Destination ທີ່ທັນສະໄໝແລະເປັນມິດກັບນັກເດີນທາງທົ່ວໂລກ. ນັກທ່ອງທ່ຽວທີ່ມີແຜນເດີນທາງມາໄທຢ່າລືມກຽມຕົວໃຫ້ພ້ອມ ເພື່ອປະສົບການເດີນທາງທີ່ລາບລື່ນແລະໄຮ້ກັງວົນ.

ຄິບສອນກອກແບບຟອມ

ສະແດງຄຳຄິດເຫັນ