ຫຼາຍຄົນຢາກວາງແຜນການເງິນ ແຕ່ພໍລົງມືຕົວຈິງກັບຮູ້ສຶກວ່າ “ເປັນຫຍັງມັນຍາກແທ້” ບາງຄົນອ່ານປຶ້ມການເງິນມາເປັນສິບຫົວ, ເບິ່ງຄລິບ YouTube ເປັນຮ້ອຍຄລິບ ຫຼື ດາວໂຫຼດແອັບຈົດບັນຊີໄວ້ເຕັມເຄື່ອງ, ແຕ່ສຸດທ້າຍ ແຜນການເງິນທີ່ຄິດໄວ້ ກໍຍັງຢູ່ແຕ່ໃນຫົວ ຫຼື ບໍ່ກໍພັງຕັ້ງແຕ່ສິ້ນເດືອນທຳອິດ ຖ້າເຄີຍພົບບັນຫາແບບນີ້ ລອງເລີ່ມຕົ້ນໃໝ່ດ້ວຍວິທີງ່າຍໆ ກັບ 3 ສູດພື້ນຖານການບໍລິຫານຈັດການເງິນລາຍເດືອນ ທີ່ຕັ້ງແຕ່ຄົນເລີ່ມຕົ້ນ ໄວເຮັດວຽກ ເຖິງກຸ່ມຄົນຢາກວາງແຜນບຳນານ ສາມາດນຳໄປປັບໃຊ້ໄດ້

3 ສູດອອມເງິນ ທິດສະດີພື້ນຖານ ທີ່ໃຜກໍເຮັດໄດ້

ສູດທີ 1:

20-30-50 (ເໝາະກັບສາຍ “ຫາກໍເລີ່ມຕົ້ນ” ບໍ່ຕ້ອງຄິດຫຼາຍ)

ວິທີການອອມເງິນງ່າຍໆ ທີ່ທຸກຄົນສາມາດເລີ່ມຕົ້ນເຮັດໄດ້ ບໍ່ຈຳເປັນຕ້ອງມີພື້ນຖານ ຫຼື ທັກສະທາງການເງິນ ໂດຍເລີ່ມຕົ້ນບໍລິຫານຈັດການໄດ້ຕາມນີ້:

• 20% ເງິນອອມສຳລັບອະນາຄົດ ເຊັ່ນ: ເງິນອອມສຳຮອງສຸກເສີນ, ເງິນອອມເພື່ອການກະສຽນ ເປັນຕົ້ນ
• 30% ເງິນໃຊ້ເພື່ອການດຳລົງຊີວິດ ເຊັ່ນ: ຄ່າອາຫານ, ຄ່າເດີນທາງ ເປັນຕົ້ນ
• 50% ເງິນໃຊ້ທີ່ຈຳເປັນ ເຊັ່ນ: ຄ່າໃຊ້ຈ່າຍທີ່ຈຳເປັນໃນຊີວິດປະຈຳວັນ ໄດ້ແກ່ ຄ່າເຮືອນ, ຄ່າລົດ, ຄ່າອາຫານ, ຊຳລະໜີ້ ເປັນຕົ້ນ

ສູດທີ 2:

ອອມເງິນຢ່າງໝັ້ນຄົງດ້ວຍສູດການເງິນ 6 ສ່ວນ

(ເໝາະສຳລັບຄົນທີ່ເລີ່ມຈັບທາງໄດ້ ແລະ ຢາກບໍລິຫານເງິນໃຫ້ຮອບດ້ານ) ສູດນີ້ເປັນການບໍລິຫານການເງິນທີ່ຈະແບ່ງລາຍຈ່າຍ ແລະ  ເງິນອອມດ້ວຍກັນ 6 ສ່ວນ:

• ກະປຸກທີ 1 ເງິນອອມສຳລັບຊີວິດຫຼັງບຳນານ 15%

• ກະປຸກທີ 2 ເງິນອອມໃນການລົງທຶນ 10%

• ກະປຸກທີ 3 ເງິນອອມເພື່ອໃຊ້ສະແຫວງຫາຄວາມຮູ້ 10%

• ກະປຸກທີ 4 ເງິນໃຊ້ເພື່ອຄວາມຈຳເປັນ 55%

• ກະປຸກທີ 5 ເງິນເພື່ອໃຫ້ລາງວັນແກ່ຕົນເອງ 5% ແບ່ງເງິນຈາກລາຍຮັບມາໃຫ້ລາງວັນຕົນເອງນ້ອຍໆ ເພື່ອຂອບໃຈທີ່ທຸ້ມເທ ແລະ ພະຍາຍາມມາໃນທຸກໆເດືອນ

• ກະປຸກທີ 6 ເງິນເພື່ອການບໍລິຈາກ 5% ແບ່ງເງິນເພື່ອບໍລິຈາກ ຫຼື ເຮັດບຸນໃນທຸກໆເດືອນ ເຊິ່ງສ່ວນນີ້ຈະສາມາດນຳມາຫຼຸດຫຍ່ອນພາສີໄດ້ດ້ວຍ

ສູດທີ 3:

ວາງແຜນໄລຍະຍາວຈົນບຳນານ (ເໝາະກັບຄົນທີ່ເລີ່ມຄິດເລື່ອງ “ຊີວິດຫຼັງໄວເຮັດວຽກ”)

ການວາງແຜນບຳນານຄວນຕັ້ງເປົ້າໝາຍທາງການເງິນ ແລະ ປະເມີນລາຍຈ່າຍໃນອະນາຄົດຂອງຕົນເອງຄ່າວໆ ວ່າ ຫາກບຳນານໄປແລ້ວຈະຕ້ອງມີເງິນເທົ່າໃດ ແລະ ຖ້າຈະຕ້ອງໃຊ້ເງິນຈຳນວນເທົ່ານີ້ ຈະຕ້ອງອອມເງິນຕໍ່ເດືອນເທົ່າໃດ ໂດຍຈະມີສູດການຄຳນວນໜ້ອຍໜຶ່ງ ໂດຍຄິດດັ່ງນີ້:

(ອາຍຸທີ່ຄາດວ່າຈະມີຊີວິດ – ອາຍຸກະສຽນ) x ລາຍຈ່າຍຕໍ່ປີ ÷ ໄລຍະເວລາທີ່ເຫຼືອໃນການຫາເງິນ = ຈຳນວນເງິນທີ່ຕ້ອງເກັບອອມ

ຕົວຢ່າງ: ຖ້າຢາກກະສຽນຕອນອາຍຸ 60 ແລະ ຢາກມີຊີວິດຮອດ 80 ປີ ເຮົາຕ້ອງໃຊ້ເງິນເທົ່າໃດ?

ສົມມຸດ ເຮົາຈະໃຊ້ປີລະ 200,000 ກີບ  (80-60) x 200,000 ÷ ຈຳນວນປີທີ່ຍັງເຮັດວຽກໄດ້ ເຊັ່ນ ເຫຼືອເວລາເກັບເງິນອີກ 30 ປີ = ຕ້ອງເກັບປີລະ 133,333ກີບ ຫຼື ເດືອນລະ 11,111ກີບ ນັ່ນເອງ

ສຸດທ້າຍແລ້ວ ແຜນການເງິນທີ່ດີທີ່ສຸດ ບໍ່ແມ່ນແຜນທີ່ວາງລະອຽດທີ່ສຸດ ແຕ່ອາດເປັນພຽງແຜນທີ່ເໝາະກັບເຮົາ ແລະ ສາມາດເລີ່ມລົງມືເຮັດໄດ້ທັນທີ

ສະແດງຄຳຄິດເຫັນ