ຄາວາຈາ ໂມຮັມມັດ ອາຊິຟ ລັດຖະມົນຕີປ້ອງກັນປະເທດປາກິສຖານ ໃນຊ່ວງຕົ້ນອາທິດ ຂູ່ວ່າຫາກອິນເດຍເປີດສາກລຸກລານທາງທະຫານ ແກ້ແຄ້ນເຫດໂຈມຕີກໍ່ການຮ້າຍນອງເລືອດສັງຫານນັກທ່ອງທ່ຽວ 26 ຄົນໃນດິນແດນແຄຊເມຍຂອງອິນເດຍເມື່ອອາທິດທີ່ແລ້ວ, ປາກິສຖານຈະເລືອກໜົນທາງແຫ່ງການໃຊ້ອາວຸດນິວເຄລຍ ໃນກໍລະນີທີ່ມັນກໍ່ໄພຂົ່ມຂູ່ຕໍ່ການຢູ່ລອດຂອງປະເທດຊາດ

ອາຊິຟ ເນັ້ນຢ້ຳວ່າໄດ້ມີການຕັດສິນໃຈທາງຍຸດທະສາດຕ່າງໆນາໆເປັນທີ່ຮຽບຮ້ອຍແລ້ວ ແຕ່ບໍ່ຂໍລົງລາຍລະອຽດໃນເລື່ອງກ່ຽວກັບໄພຂົ່ມຂູ່ທີ່ໃກ້ມາເຖິງແລ້ວ ຈາກຄວາມເປັນໄປໄດ້ທີ່ອິນເດຍຈະເປີດປະຕິບັດການທາງທະຫານລຸກລານປາກິສຖານ.

ອິນເດຍ ກ່າວໂທດ ປາກິສຖານ ສຳລັບການໃຊ້ການສະໜັບສະໜູນພວກກໍ່ການຮ້າຍ ແຕ່ອິສລາມາບັດປະຕິເສດຄວາມກ່ຽວຂ້ອງ ແລະ ຮຽກຮ້ອງຂໍໃຫ້ມີການສືບສວນຢ່າງເປັນທາງການ, ແລະ ທ່າມກາງຄວາມຕຶງຄຽດທີ່ລຸກລາມບານປາຍ, ອາຊິຟ ຢືນຢັນວ່າປາກິສຖານຢູ່ໃນພາວະລະມັດລະວັງຂັ້ນສູງ ແລະ ພ້ອມສຳລັບລົງມືທາງຍຸດທະສາດໃດໆ.

ເຫດໂຈມຕີຂອງພວກນັກຮົບທີ່ຂ້ານັກທ່ອງທ່ຽວໄປ 26 ຄົນ ໄດ້ສ້າງຄວາມເດືອດໃນອິນເດຍ ຊາດທີ່ມີຊາວຮິນດູເປັນຄົນກຸ່ມໃຫຍ່, ເຊັ່ນດຽວກັບສຽງຮຽກຮ້ອງໃຫ້ຈັດການກັບປາກິສຖານ ຊາດທີ່ຄົນສ່ວນໃຫຍ່ເປັນຊາວມຸສລິມ.

ທັງນີ້ທີ່ຜ່ານມາ ອິນເດຍ ກ່າວຫາ ປາກິສຖານ ໃຫ້ການສະໜັບສະໜູນພວກນັກຮົບໃນແຄຊເມຍ, ແຄວ້ນທີ່ທັງ 2 ຝ່າຍຕ່າງກ່າວອ້າງວ່າເປັນສ່ວນໜຶ່ງຂອງດິນແດນ ແລະ ເຄີຍສູ້ຮົບເຮັດສົງຄາມແຍ່ງຊິງກັນມາແລ້ວ 2 ຄັ້ງ.

“ພວກເຮົາໄດ້ເສີມກຳລັງກອງກຳລັງຂອງພວກເຮົາ ເພາະວ່າກຳລັງມີບາງຢ່າງເກີດຂຶ້ນແບບປັດຈຸບັນທັນດ່ວນ.

ດ້ວຍສະຖານະການດັ່ງກ່າວ, ຈຶ່ງຈຳເປັນຕ້ອງມີການຕັດສິນໃຈທາງຍຸດທະສາດບາງຢ່າງ.

ດັ່ງນັ້ນ, ການຕັດສິນໃຈເຫຼົ່ານີ້ຈຶ່ງເກີດຂຶ້ນ” ລັດຖະມົນຕີປ້ອງກັນປະເທດປາກິສຖານບອກກັບຣອຍເຕີ ລະຫວ່າງໃຫ້ສຳພາດໃນອິສລາມາບັດ.

ອາຊິຟ ບອກວ່າດ້ວຍການທີ່ອິນເດຍໃຊ້ວາທະກຳໜັກໜ່ວງຂຶ້ນເລື້ອຍໆ ທາງກອງທັບປາກິສຖານຈຶ່ງບັນຍາຍສະຫຼຸບແກ່ລັດຖະບານ ກ່ຽວກັບຄວາມເປັນໄປໄດ້ທີ່ອິນເດຍຈະລົງມືໂຈມຕີ.

ເຖິງຢ່າງໃດກໍຕາມ, ເຂົາບໍ່ໄດ້ໃຫ້ລາຍລະອຽດວ່າເປັນຫຍັງຈຶ່ງຄິດວ່າການລຸກລານຂອງອິນເດຍໃກ້ເຂົ້າມາແລ້ວ.

ຕາມຫຼັງເຫດໂຈມຕີນັກທ່ອງທ່ຽວໃນແຄຊເມຍ, ອິນເດຍລະບຸຕົວນັກຮົບຜູ້ຕ້ອງສົງໄສ 2 ຄົນ ວ່າເປັນຊາວປາກິສຖານ, ແຕ່ທາງອິສລາມາບັດຢືນຢັນວ່າພວກເຂົາບໍ່ໄດ້ກ່ຽວຂ້ອງໃດໆ ແລະ ຮຽກຮ້ອງຂໍການສືບສວນທີ່ເປັນກາງ.

ຄວາມຂັດແຍ້ງລະຫວ່າງປາກິສຖານກັບອິນເດຍຮອບຫຼ້າສຸດໂຫມກະຂຶ້ນ ຈາກກໍລະນີທີ່ພວກກໍ່ການຮ້າຍໂຈມຕີເມືອງພາຮາລແກມ ຊຶ່ງໄດ້ຊື່ວ່າເປັນດິນແດນສະຫວັນ ແລະ ຈຸດໝາຍປາຍທາງຍອດນິຍົມຂອງແຄຊເມຍ ເມື່ອວັນອັງຄານທີ່ແລ້ວ, ສັງຫານຜູ້ຄົນໄປຢ່າງໜ້ອຍ 26 ຄົນ, ສ່ວນໃຫຍ່ເປັນນັກທ່ອງທ່ຽວ ແລະ ມີຜູ້ໄດ້ຮັບບາດເຈັບອີກຫຼາຍຄົນ.

ຫຼັງເກີດເຫດໄດ້ມີການຍົກລະດັບຄວາມໝັ້ນຄົງທົ່ວຮ່ອມພູ, ໂດຍສະເພາະໃນແຫຼ່ງທ່ອງທ່ຽວສຳຄັນໆ.

ສະແດງຄຳຄິດເຫັນ