ຜູ້ນຳສະຫະລັດ ປະຊຸມຄະນະລັດຖະມົນຕີຫຼັງເຮັດວຽກມາຄົບ 100 ວັນ, ຊື່ນຊົມຄວາມສຳເລັດດ້ານນະໂຍບາຍຜູ້ອົບພະຍົບ ແລະ ພາສີ ເຖິງແມ່ນວ່າເສດຖະກິດໄຕມາດຫຼ້າສຸດຈະຫົດຕົວເປັນຄັ້ງທຳອິດໃນຮອບ 3 ປີ ພ້ອມກ່າວໂທດວ່າລັດຖະບານຊຸດກ່ອນຖິ້ມບັນຫາເສດຖະກິດໄວ້

ເມື່ອວັນທີ 30 ເມສາ 2025, ໂດນັລ ທຣຳ ປະທານາທິບໍດີສະຫະລັດ ເປັນປະທານການປະຊຸມຄະນະລັດຖະມົນຕີ ຫຼັງຈາກອອກເດີນສາຍພົບປະຊາຊົນໃນໂອກາດຄົບຮອບ 100 ວັນໃນການດຳລົງຕຳແໜ່ງຜູ້ນຳປະເທດສະໄໝທີ 2.

ທຣຳ ກ່າວຊົມເຊີຍຄວາມສຳເລັດຂອງນະໂຍບາຍຕ່າງໆ ຂອງລັດຖະບານ ທັງການຈັດການບັນຫາຜູ້ອົບພະຍົບ ແລະ ມາດຕະການພາສີ ລວມເຖິງທຸລະກິດຕ່າງໆ ທີ່ຫັນມາລົງທຶນໃນປະເທດ.

ທ່າທີດັ່ງກ່າວຂອງທຣຳ ມີຂຶ້ນຫຼັງຈາກສຳນັກງານວິເຄາະເສດຖະກິດສະຫະລັດ ເປີດເຜີຍລາຍງານຊີ້ວ່າ ເສດຖະກິດສະຫະລັດໃນຊ່ວງໄຕມາດທຳອິດຂອງປີນີ້ ຫົດຕົວລົງເປັນຄັ້ງທຳອິດໃນຮອບ 3 ປີ ຫຼື ຕັ້ງແຕ່ປີ 2022 ຈາກການບໍລິໂພກທີ່ຊະລໍຕົວລົງຢ່າງຊັດເຈນ.

ການປະຊຸມຄະນະລັດຖະມົນຕີໃນຫ້ອງປະຊຸມທຳນຽບຂາວ ໃນກຸງວໍຊີງຕັນ ດີ.ຊີ ວັນທີ່ 30 ເມສາ 2025

ທຣຳກ່າວໂທດວ່າ ການຫົດຕົວຂອງຈີດີພີຄັ້ງນີ້ເປັນຜົນຈາກການເຮັດວຽກຂອງລັດຖະບານຊຸດກ່ອນຂອງ ໂຈ ໄບເດັນ ໂດຍຈີດີພີສະຫະລັດໄຕມາດນີ້ປັບຕົວຫຼຸດລົງ 0.3% ໃນຂະນະທີ່ການຈັບຈ່າຍຂອງຜູ້ບໍລິໂພກເພີ່ມຂຶ້ນ 1.8% ຊຶ່ງເປັນອັດຕາການເຕີບໂຕທີ່ຕໍ່າທີ່ສຸດຕັ້ງແຕ່ກາງປີ 2023.

ໃນຂະນະດຽວກັນ, ການໃຊ້ຈ່າຍຂອງລັດຖະບານກາງສະຫະລັດທີ່ຫຼຸດລົງ ຕາມນະໂຍບາຍຕັດຫຼຸດງົບປະມານຂອງທຣຳ ທີ່ຫຼຸດການຈ້າງງານແລະການເຮັດສັນຍາຕ່າງໆລົງ.

ດ້ານການຄ້າລະຫວ່າງປະເທດ, ຍອດສົ່ງອອກສຸດທິປັບລົງຫຼຸດເກືອບ 5% ຊຶ່ງເປັນຍອດລາຍໄດ້ໄຕມາດທີ່ຫຼຸດລົງຕໍ່າສຸດເປັນປະຫວັດການ ຕັ້ງແຕ່ເກັບສະຖິຕິມາໃນປີ 1947.

ສ່ວນໜຶ່ງເປັນຜົນຈາກການນຳເຂົ້າທີ່ພຸ່ງສູງຂຶ້ນ ຈາກຄວາມກັງວົນຂອງທຸລະກິດຕ່າງໆ ກ່ຽວກັບມາດຕະການພາສີທີ່ກະຕຸ້ນການນຳເຂົ້າໃນຊ່ວງສັ້ນໆ ກ່ອນການຂຶ້ນພາສີມີຜົນບັງຄັບໃຊ້ ເຮັດໃຫ້ຍອດນຳເຂົ້າເພີ່ມຂຶ້ນສູງສຸດຕັ້ງແຕ່ໄຕມາດ 3 ຂອງປີ 2020 ຫຼື ຊ່ວງທີ່ໂລກເລີ່ມກັບມາຄ້າຂາຍອີກຄັ້ງຫຼັງການລະບາດຂອງໂຄວິດ-19 ຜ່ອນຄາຍ.

ເຊັ່ນດຽວກັບການລົງທຶນທີ່ເຕີບໂຕຂຶ້ນສວນທາງກັບພາບລວມ ເນື່ອງຈາກພາກເອກະຊົນ ຫຼາຍທຸລະກິດມີການສັ່ງຊື້ສິນຄ້າຫຼາຍຂຶ້ນ ແລະ ກັກຕຸນສິນຄ້າໃນຄັງຫຼາຍຂຶ້ນ.

ເຖິງແມ່ນວ່າຕົວເລກເສດຖະກິດໃນໄຕມາດນີ້ຈະສະທ້ອນພາບທີ່ຫຼາກຫຼາຍ ແຕ່ນັກວິເຄາະບາງສ່ວນຍັງເບິ່ງວ່າ ເສດຖະກິດສະຫະລັດມີແນວໂນ້ມເຕີບໂຕຢ່າງຕໍ່ເນື່ອງ ໂດຍໄຕມາດສຸດທ້າຍຂອງປີ 2024 ຈີດີພີໂຕຕໍ່ເນື່ອງ 2.4%.

“ມັສກ໌” ສວມໝວກ 2 ໃບກາງວົງປະຊຸມ ຄຣມ.

ຊ່ວງເວລາຜ່ອນຄາຍໃນການປະຊຸມຄະນະລັດຖະມົນຕີ ເມື່ອວັນທີ 30 ເມສາ ທີ່ຜ່ານມາ ເມື່ອອີລອນ ມັສກ໌ ມະຫາເສດຖີເບີໜຶ່ງຂອງໂລກ ປະກົດຕົວໃນຫ້ອງປະຊຸມພ້ອມໝວກທີ່ຊ້ອນກັນ 2 ໃບ ເຖິງແມ່ນວ່າຈະບໍ່ໄດ້ດຳລົງຕຳແໜ່ງລັດຖະມົນຕີໃນລັດຖະບານຊຸດນີ້ ເຮັດໃຫ້ເກີດຮອຍຍິ້ມຈາກປະທານາທິບໍດີໂດນັລດ໌ ທຣຳ ທີ່ປ່ອຍມຸກຍ້ອງວ່າ “ເປັນຄົນດຽວທີ່ເຮັດແບບນີ້ແລ້ວຍັງລອດ”

ສ່ວນມັສກ໌ຕອບກັບວ່າ ປະຊາຊົນບອກວ່າຕົວເອງສວມໝວກຫຼາຍໃບ ຊຶ່ງກໍແມ່ນຄວາມຈິງເພາະໝວກຂອງລາວເອງຍັງມີໝວກໃຫ້ສວມອີກເທື່ອໜຶ່ງເລີຍ. ໂອກາດນີ້ທຣຳຍັງອອກປາກຊວນມັສກ໌ໃຫ້ເຮັດວຽກຢູ່ກັບລັດຖະບານໃຫ້ໄດ້ດົນເທົ່າທີ່ຕ້ອງການ ເພາະລາວຮູ້ວ່າອີກບໍ່ດົນລາວກໍຈະຢາກກັບໄປເຮັດບໍລິສັດລົດຍົນ.

ກ່ອນໜ້ານີ້, ມັສກ໌ປະກາດຫຼຸດບົດບາດໃນກະຊວງປະສິດທິພາບລັດຖະບານ (DOGE) ລົງ ຫຼັງຜົນປະກອບການໄຕມາດທຳອິດຂອງເທສລາຊ້ຳໜັກຈາກຫຼາຍປັດໄຈ ພ້ອມລາຄາຫຸ້ນທີ່ດິ່ງລົງຕໍ່ເນື່ອງ.

ຢູເຄຣນ-ສະຫະລັດຯ ບັນລຸຂໍ້ຕົກລົງຊັບພະຍາກອນທຳມະຊາດ

ໃນວົງປະຊຸມນີ້ຜູ້ນຳສະຫະລັດຯ ຍັງເປີດເຜີຍວ່າ ມາຣ໌ກ ຄາຣ໌ເນ ນາຍົກລັດຖະມົນຕີການາດາ ໄດ້ໂທລະສັບແສດງຈຸດຢືນຊັດເຈນວ່າຕ້ອງການເຈລະຈາກັນທັນທີຫຼັງຊະນະການເລືອກຕັ້ງ ພ້ອມລະບຸວ່າຕົນໄດ້ສະແດງຄວາມຍິນດີກັບຜົນການເລືອກຕັ້ງແລ້ວ ແລະ ກ່າວຊື່ນຊົມຄາຣ໌ເນວ່າ “ໜ້າຮັກຫຼາຍ” ໂດຍມີກຳນົດຢ້ຽມຢາມທຳນຽບຂາວ ໄວໆນີ້ ບໍ່ເກີນອາທິດໜ້າ.

ໃນອີກຄວາມເຄື່ອນໄຫວສຳຄັນ, ສະຫະລັດຯ ກຳລັງຈະລົງນາມຂໍ້ຕົກລົງເລື່ອງແຮ່ກັບຢູເຄຣນໃນມື້ນີ້ ໂດຍນາຍົກລັດຖະມົນຕີຢູເຄຣນ ເປີດເຜີຍວ່າ ລັດຖະມົນຕີເສດຖະກິດຢູເຄຣນກຳລັງເດີນທາງໄປຍັງສະຫະລັດຯ.

ລາຍງານກ່ອນໜ້ານີ້ລະບຸວ່າ ທັງສອງຝ່າຍບໍ່ລົງລອຍກັນໃນເງື່ອນໄຂບາງປະການ ຫຼັງການຫາລືມາຍາວນານຫຼາຍອາທິດ ແລະ ມີການແກ້ໄຂຂໍ້ຕົກລົງໃນນາທີສຸດທ້າຍ ແລະ ຫຼ້າສຸດສະຫະລັດຯ ແລະ ຢູເຄຣນລົງນາມຂໍ້ຕົກລົງຊັບພະຍາກອນທຳມະຊາດກັນແລ້ວ ໂດຍສະຫະລັດຯ ປະກາດເລີ່ມຄວາມຮ່ວມມືທາງເສດຖະກິດກັບຢູເຄຣນ ຊຶ່ງຂໍ້ຕົກລົງດັ່ງກ່າວຈະເປີດທາງໃຫ້ສະຫະລັດຯ ເຂົ້າເຖິງຊັບພະຍາກອນແຮ່ຫາຍາກຂອງຢູເຄຣນໄດ້.

ກະຊວງການຄັງສະຫະລັດຯ ລະບຸດ້ວຍວ່າ ທັງສອງປະເທດຕົກລົງຕັ້ງກອງທຶນການລົງທຶນເພື່ອການຟື້ນຟູ ຊຶ່ງຂໍ້ຕົກລົງດັ່ງກ່າວຈະເຮັດໃຫ້ສອງປະເທດຮ່ວມມືກັນເພື່ອການພັດທະນາໃນດ້ານຕ່າງໆ ລວມເຖິງການຟື້ນຟູຢູເຄຣນທີ່ເສຍຫາຍຈາກສົງຄາມ.

ທັງນີ້, ຂໍ້ຕົກລົງດັ່ງກ່າວມີການຫາລືມາຕັ້ງແຕ່ເດືອນກຸມພາ ແຕ່ຖືກເລື່ອນອອກໄປຫຼາຍຄັ້ງ ຫຼັງການປະທະຄາລົມລະຫວ່າງຜູ້ນຳສະຫະລັດຯ ແລະ ຢູເຄຣນ ຊຶ່ງການເຈລະຈາດຳເນີນມາຢ່າງຕໍ່ເນື່ອງ ກະທັ້ງຜູ້ນຳສອງປະເທດໄດ້ຈັບເຂົ່າລົມກັນຊ່ວງອາທິດທີ່ຜ່ານມາໃນພິທີປົງພະສົບສົມເດັດພະສັນຕະປາປາຟຣານຊິສ.

ສະແດງຄຳຄິດເຫັນ