ປະທານາທິບໍດີໂດນັລດ໌ ທຣຳ ຂອງສະຫະລັດຯ ໂທລະສັບໄປຫາທ່ານມາຣ໌ກ ຄາຣ໌ເນ ນາຍົກລັດຖະມົນຕີການາດາເພື່ອສະແດງຄວາມຍິນດີທີ່ເພິ່ນເປັນຜູ້ຊະນະໃນການເລືອກຕັ້ງທົ່ວໄປຂອງການາດາເມື່ອມື້ນີ້ (29 ເມສາ) ແລະ ໄດ້ຕົກລົງວ່າຜູ້ນຳທັງສອງຈະພົບແລະເຈລະຈາປະເດັນຕ່າງໆເຊັ່ນ: ຄວາມສຳພັນທາງເສດຖະກິດແລະຄວາມໝັ້ນຄົງ ໃນອີກບໍ່ດົນຕໍ່ຈາກນີ້.

ຜົນການເລືອກຕັ້ງຢ່າງເປັນທາງການຂອງການາດາ, ປີແອຣ໌ ປົວລີຟຣ໌ ຫົວໜ້າພັກຝ່າຍຄ້ານ ອະນຸລັກນິຍົມ ພ່າຍແພ້ເຖິງກັບສູນເສຍທີ່ນັ່ງຂອງຕົວເອງຢ່າງບໍ່ໜ້າເຊື່ອດ້ວຍ ຂະນະທີ່ ມາຣ໌ກ ຄາຣ໌ເນ ຍັງຮັກສາຕຳແຫນ່ງນາຍົກລັດຖະມົນຕີຂອງການາດາເອົາໄວ້ຕໍ່ໄປ ເຖິງແມ່ນວ່າບໍ່ໄດ້ຄອງສຽງສ່ວນຫຼາຍໃນສະພາ.

ນາຍົກລັດຖະມົນຕີມາຣ໌ກ ຄາຣ໌ເນ ຂອງການາດາ ຮ້ອງເພງແລະເຕັ້ນຢ່າງມ່ວນຊື່ນຮ່ວມກັບກຸ່ມຜູ້ສະໜັບສະໜູນ ຫຼັງຮູ້ຜົນການເລືອກຕັ້ງພັກເສລີນິຍົມຂອງເພິ່ນເປັນຝ່າຍຊະນະເມື່ອວັນຈັນທີ່ຜ່ານມາ ໄດ້ບໍລິຫານປະເທດຕໍ່ໄປອີກສະໄໝ ໂດຍພັກເສລີນິຍົມ ເອົາຊະນະພັກອະນຸລັກນິຍົມ ທີ່ນຳໂດຍປີແອຣ໌ ປົວລີຟຣ໌ ຜູ້ມີສະໂລແກນ “ການາດາຕ້ອງມາກ່ອນ” ແລະ ບາງຄັ້ງສະໄຕການເວົ້າຈາສຽດສີຂອງເພິ່ນເຮັດໃຫ້ເກີດການປຽບທຽບກັບປະທານາທິບໍດີໂດນັລດ໌ ທຣຳ ຜູ້ນຳສະຫະລັດຯ ຊຶ່ງອາດເຮັດໃຫ້ເພິ່ນແພ້ການເລືອກຕັ້ງ.

ທັງນີ້, ພັກອະນຸລັກນິຍົມ ມີຄະແນນນິຍົມນຳໃນຜົນການສຳຫຼວດຄວາມຄິດເຫັນຂອງໂພລຫຼາຍສຳນັກມາຕິດຕໍ່ກັນຫຼາຍເດືອນ ກ່ອນຈະຫາຍໄປຫຼັງຈາກປະທານາທິບໍດີທຣຳປະກາດຂຶ້ນພາສີນຳເຂົ້າຈາກການາດາແລະຂູ່ຈະລວມເອົາການາດາເປັນຂອງສະຫະລັດຯ.

ຊາວການາດາຈຶ່ງຫຼີກລ້ຽງທີ່ຈະຊື້ສິນຄ້າແລະເດີນທາງເຂົ້າສະຫະລັດຯ ເພື່ອຕອບໂຕ້.

ຂະນະດຽວກັນ, ເຖິງແມ່ນວ່າຄາຣ໌ເນຍັງຄົງເປັນນາຍົກລັດຖະມົນຕີ ແຕ່ພັກເສລີນິຍົມຂອງລາວເບິ່ງຄືວ່າຈະຊະນະທີ່ນັ່ງສ່ວນນ້ອຍໃນສະພາສາມັນເທົ່ານັ້ນ ເຮັດໃຫ້ລັດຖະບານເປາະບາງຫຼາຍຂຶ້ນ ແລະ ຕ້ອງພຶ່ງພາພັກການເມືອງນ້ອຍໆ ເພື່ອຮັກສາອຳນາດໄວ້.

ນອກຈາກນີ້, ຜົນການເລືອກຕັ້ງຢ່າງເປັນທາງການເມື່ອວານນີ້ (29 ເມສາ) ປີແອຣ໌ ປົວລີຟຣ໌ ຫົວໜ້າພັກອະນຸລັກນິຍົມ ແພ້ເລືອກຕັ້ງສູນເສຍທີ່ນັ່ງຂອງຕົວເອງດ້ວຍ ເຖິງແມ່ນວ່າ ພັກຂອງເພິ່ນໄດ້ຄະແນນສຽງເພີ່ມໃນຫຼາຍພື້ນທີ່ຂອງປະເທດ.

ນັບເປັນຄວາມພິກຜັນຄັ້ງສຳຄັນສຳລັບປົວລີຟຣ໌ ອາຍຸ 45 ປີ ຊຶ່ງໄດ້ຮັບການເລືອກຕັ້ງໃຫ້ເປັນຕົວແທນຂອງເຂດພື້ນທີ່ຊົນນະບົດໃນເມືອງຫຼວງອອດຕາວາເປັນຄັ້ງທຳອິດໃນປີ 2004.

ເພິ່ນປະກາດຍອມຮັບຄວາມປະລາໄຊຕໍ່ພັກເສລີນິຍົມຂອງຄາຣ໌ເນເມື່ອວັນຈັນທີ່ຜ່ານມາ ແຕ່ຍັງບອກວ່າ ເພິ່ນຈະຍັງເປັນຜູ້ນຳຝ່າຍຄ້ານຕໍ່ໄປ.

ຊຶ່ງເພື່ອຮັກສາຕຳແໜ່ງດັ່ງກ່າວນັ້ນໄວ້, ປົວລີຟຣ໌ສາມາດລົງສະໝັກໃນການເລືອກຕັ້ງຊ່ອມເພື່ອຄວ້າທີ່ນັ່ງໃນລັດຖະສະພາຄືນມາໄດ້.

ສະແດງຄຳຄິດເຫັນ