ຄະນະກວດກາສູນກາງພັກ-ອົງການກວດກາແຫ່ງລັດຈັດກອງປະຊຸມ ປາຖະກະຖາ ວັນກຳມະກອນສາກົນ ຄົບຮອບ 139 ປີ ແລະ ພິທີມອບຮັບໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2024

ຕອນເຊົ້າຂອງວັນທີ 07 ພຶດສະພາ 2025 ຄະນະກວດກາສູນກາງພັກ-ອົງການກວດກາແຫ່ງລັດຈັດກອງປະຊຸມ ປາຖະກະຖາ ວັນກຳມະກອນສາກົນ ຄົບຮອບ 139 ປີ ຕິດພັນກັບ ມອບຮັບໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2024 ຂຶ້ນ ຢູ່ທີ່ສະໂມສອນຂອງ ຄກສພ-ອກຫລ. ໃຫ້ກຽດເຂົ້າຮ່ວມໂດຍ ສະຫາຍ ວິໄລວັນ ບຸດດາຄຳ ກຳມະການສຳຮອງສູນກາງພັກ, ກຳມະການປະຈຳພັກ, ຮອງປະທານ ຄກສພ-ອກຫລ, ສະຫາຍ ສຸກຄຳເພັດ ເຮືອງບຸດສີ ກຳມະການປະຈຳພັກ, ຮອງປະທານ ຄກສພ-ອກຫລ. ພ້ອມດ້ວຍບັນດາສະຫາຍ ຄະນະປະຈໍາພັກ, ຄະນະພັກ, ຄະນະໜ່ວຍພັກ, ສະມາຊິກພັກ-ພະນັກງານພາຍໃນ ຄກສພ-ອກຫລ ເຂົ້າຮ່ວມ.

ໃນພິທີ ສະຫາຍ ສຸກຄຳເພັດ ເຮືອງບຸດສີ ໄດ້ເຜີຍແຜ່ເອກະສານ ວັນກຳມະກອນສາກົນ ຄົບຮອບ 139 ປີ (1 ພຶດສະພາ 1886 – 1 ພຶດສະພາ 2025). ໂດຍໄດ້ຍົກໃຫ້ເຫັນເຖິງປະຫວັດຄວາມເປັນມາ ຂອງວັນກໍາມະກອນສາກົນ ແລະ ການເຕີບໃຫຍ່ຂະຫຍາຍຕົວຂອງຊົນຊັ້ນກຳມະກອນ, ພ້ອມທັງຍົກໃຫ້ເຫັນເຖິງ ຄວາມສາມັກຄີ ມູນເຊື້ອອັນດີງາມ ຂອງຊົນຊັ້ນກຳມະກອນລາວ ແລະ ການປະກອບສ່ວນໃນພາລະກິດປະຕິວັດ ຂອງກຳມະກອນລາວ ແລະ ເສີມຂະຫຍາຍມູນເຊື້ອອັນດີງາມຂອງກຳມະກອນສາກົນໃນໄລຍະຜ່ານມາ. ຫຼັງຈາກນັ້ນ, ສະຫາຍ ວິໄລວັນ ບຸດດາຄຳ ກໍ່ໄດ້ເຜີຍແຜ່ຄຳແນະນຳ ຂອງຄະນະຈັດຕັ້ງສູນກາງພັກ ເລກທີ 28/ຄຈສພ ກ່ຽວກັບການກໍ່ສ້າງໜ່ວຍພັກປອດໃສ, ເຂັ້ມແຂງ ໜັກແໜ້ນ ແລະ ຕາງໜ້າກົມຈັດຕັ້ງພະນັກງານ ກໍ່ໄດ້ຜ່ານມະຕິຕົກລົງ ວ່າດ້ວຍການຮັບຮອງເອົາຜົນການປະເມີນການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2024, ເຊິ່ງ ຄກສພ-ອກຫລ ມີທັງໝົດ 9 ໜ່ວຍພັກ, ໄດ້ຮັບຮອງເອົາ 06 ໜ່ວຍພັກເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນ ຄື: 1 ໜ່ວຍພັກຫ້ອງການ, 2 ໜ່ວຍພັກ ກົມຈັດຕັ້ງ-ພະນັກງານ, 3 ໜ່ວຍພັກ ກົມຄົ້ນຄວ້າ ແລະ ວາລະສານກວດກາ, 4 ໜ່ວຍພັກ ກົມຄົ້ນຄວ້າ ຄຳຮ້ອງ ແລະ ຄຳສະເໜີ. 5 ໜ່ວຍພັກ ກົມກວດກາພັກ, 6 ໜ່ວຍພັກ ກົມກວດກາລັດ. ບໍ່ໄດ້ຮັບຮອງເອົາ 03 ໜ່ວຍພັກເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນ ຄື: 1 ໜ່ວຍພັກ ກົມພົວພັນຕ່າງປະເທດ, 2 ໜ່ວຍພັກ ກົມຕ້ານ ແລະ ສອບສວນການສໍ້ລາດບັງຫຼວງ, 3 ໜ່ວຍພັກ ກົມຕິດຕາມ, ກວດກາການປະຕິບັດຜົນຂອງການກວດກາ. ພ້ອມດຽວກັນນີ້, ສະຫາຍ ວິໄລວັນ ບຸດດາຄຳ ກໍ່ໄດ້ໃຫ້ກຽດມອບໃບຢັ້ງຢືນ ໃຫ້ແກ່ 6 ໜ່ວຍພັກທີ່ໄດ້ຮັບຮອງເອົາ ເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນ. ນອກຈາກນີ້, ຍັງໄດ້ຮັບຮອງເອົາຜົນການແບ່ງປະເພດຂອງສະມາຊິກພັກ ຄື: ສະມາຊິກພັກຈັດປະເພດແຂງ 194 ສະຫາຍ, ຍິງ 64 ສະຫາຍ, ປະເພດກາງ 20 ສະຫາຍ, ຍິງ 7 ສະຫາຍ ແລະ ບໍ່ໄດ້ຈັດປະເພດ 51 ສະຫາຍ, ຍິງ 15 ສະຫາຍ (ສາເຫດຍ້ອນ ບໍານານ 26 ສະຫາຍ, ເປັນສະມາຊິກພັກສໍາຮອງ 16 ສະຫາຍ, ຍົກຍ້າຍມາໃໝ່ 5 ສະຫາຍ, ຍົກຍ້າຍອອກຊົ່ວຄາວ 1 ສະຫາຍ, ລາພັກເກີດລູກ 1 ສະຫາຍ, ລາພັກປິ່ນປົວສຸຂະພາບ 1 ສະຫາຍ ແລະ ກວດກາຕາມຄໍາຮ້ອງບໍ່ທັນສໍາເລັດ 1 ສະຫາຍ). ພ້ອມດຽວກັນນັ້ນ, ສະຫາຍ ສຸກຄຳເພັດ ເຮືອງບຸດສີ ກໍໄດ້ໃຫ້ກຽດມອບ ບັດໃຫ້ສະມາຊິກພັກສົມບູນ ພາຍໃນ ຄກສພ-ອກຫລ ຈຳນວນທັງໝົດ 55 ສະຫາຍ, ຍິງ 23 ສະຫາຍ.

ໃນຕອນທ້າຍຂອງກອງປະຊຸມ ສະຫາຍ ວິໄລວັນ ບຸດດາຄຳ ກໍ່ໄດ້ມີຄຳເຫັນໂອ້ລົມຕໍ່ພິທີ ໂດຍເນັ້ນໃຫ້ ເພີ່ມທະວີຄົ້ນຄວ້າເຊື່ອມຊຶມ ກຳແໜ້ນບັນດາມະຕິ, ຄຳສັ່ງຕ່າງໆເພື່ອນຳພາຜັນຂະຫຍາຍໃຫ້ເປັນແຜນການ, ແຜນງານ ແລະ ໂຄງການອັນລະອຽດຂອງບັນດາໜ່ວຍພັັກ ແລະ ນໍາພາຈັດຕັ້ງປະຕິບັດໃຫ້ເກີດດອກອອກຜົນ; ສືບຕໍ່ເອົາໃຈໃສ່ສຶກສາອົບຮົມທາງດ້ານການເມືອງ-ແນວຄິດ ໃຫ້ສະມາຊິກພັກ-ພະນັກງານ; ຄົ້ນຄວ້າກຳແໜ້ນກົດລະບຽບຂອງພັກ, ກົດໝາຍ ເເລະ ນິຕິກໍາຕ່າງໆກ່ຽວກັບວຽກງານກວດກາພັກ, ກວດກາລັດ ແລະ ນໍາພາຈັດຕັ້ງປະຕິບັດວຽກງານວິຊາສະເພາະຕາມພາລະບົດບາດ, ໜ້າທີ່, ສິດ ເເລະ ຂອບເຂດສິດຄວາມຮັບຜິດຊອບຂອງຕົນ; ເພີ່ມທະວີການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ, ການຂະຫຍາພັກຕ້ອງຖືເອົາຄຸນນະພາບ ເປັນກົກ, ດຳເນີນໃຫ້ຖືກຕ້ອງຕາມຂັ້ນຕອນກົດລະບຽບຂອງພັກ ໄດ້ກຳນົດ; ສ້າງແຜນກໍານົດ ສືບຕໍ່ຕິດຕາມ, ກໍາສະພາບ, ບໍາລຸງສ້າງສະມາຊິກພັກ ພະນັກງານໃຫ້ມີຄວາມຮູ້ຄວາມສາມາດ ຝຶກຝົນຫຼໍ່ຫຼອມເພື່ອເປັນພະນັກງານສືບທອດໃນຕໍ່ໜ້າ; ຄະນະໜ່ວຍພັກແຕ່ລະໜ່ວຍ ຕ້ອງໄດ້ເພີ່ມທະວີການປັບປຸງແບບແຜນນຳພາ ແລະ ວິທີເຮັດວຽກ, ເສີມຂະຫຍາຍການປະຕິບັດພາລະບົດບາດຂອງກົມ ຢ່າງແຂງແຮງ ເເລະ ເລິກເຊິ່ງ, ເຮັດວຽກມີແຜນການ ມີຈຸດສຸມ, ມີການສະຫຼຸບຖອດຖອນບົດຮຽນຈາກພຶດຕິກຳຕົວຈິງ; ຮັກສາຄວາມສາມັກຄີເປັນເອກະພາບ ບົນພື້ນຖານແນວທາງນະໂຍບາຍຂອງພັກ ແລະ ກົດໝາຍຂອງລັດ; ມີການລາຍງານສ່ອງແສງຂໍທິດຊີ້ນຳຈາກຂັ້ນເທິງ ແລະ ມີການປະສານງານຢູ່ພາຍໃນ ເເລະ ພາຍນອກ.