ໝໍສັນຍະກຳສະໝອງເຕືອນຢ່ານວດຕົ້ນຄໍໂດຍບໍ່ມີຄວາມຮູ້ ສ່ຽງຫຼອດເລືອດປິ ລິ່ມເລືອດອຸດສະໝອງເຖິງຂັ້ນເປັນອຳພາດ ຊີ້ 5 ຈຸດຫ້າມນວດແລະກຸ່ມສ່ຽງສຳຄັນຕ້ອງຫຼີກລ່ຽງ

 

 

ເມື່ອອາການເມື່ອຍລ້າທົ່ວໄປກາຍເປັນອັນຕະລາຍເຖິງຊີວິດ, ທ່ານໝໍປະຊາ ກັນຍາປະສິດ ສັນຍະແພດຜູ້ຊ່ຽວຊານດ້ານສະໝອງ ປະເທດໄທ ເຜີຍຜ່ານເພຈ “ໝໍປະຊາ ຜ່າສະໝອງ” ເຖິງກໍລະນີຊາຍວັຍ 54 ປີມີອາການປວດຕົ້ນຄໍເລັກນ້ອຍຫຼັງຮັບປະທານອາຫານ ກ່ອນໃຫ້ພັນລະຍາຊ່ວຍນວດ ແຕ່ກັບຕື່ນມາພົບວ່າເຄິ່ງຊີກຂວາຂອງຮ່າງກາຍອ່ອນແຮງ ບໍ່ສາມາດເວົ້າໄດ້ ກ່ອນພົບວ່າເສັ້ນເລືອດທີ່ຄໍເກີດການປິແຕກ ແລະ ລິ່ມເລືອດອຸດຕັນໃນສະໝອງ.

ເສັ້ນເລືອດໃນຄໍບໍ່ແມ່ນຂອງຫຼິ້ນ

 

ເຄສນີ້ສະແດງໃຫ້ເຫັນວ່າ “ການນວດໂດຍບໍ່ມີຄວາມຮູ້ດ້ານກາຍະວິພາກ” ໂດຍສະເພາະທີ່ຕົ້ນຄໍ ອາດເຮັດໃຫ້ເສັ້ນເລືອດໃຫຍ່ປິ, ແຕກ ຫຼື ຫຼຸດລອກຈາກຝາຫຼອດເລືອດ ແລ້ວກາຍເປັນລິ່ມເລືອດໄຫຼໄປອຸດເສັ້ນເລືອດສະໝອງ ສົ່ງຜົນໃຫ້ເກີດອຳພາດຫຼືເຖິງຂັ້ນເສຍຊີວິດໄດ້.

 

ຜູ້ປ່ວຍໃນກໍລະນີນີ້ຕ້ອງເຂົ້າຮັບການຜ່າຕັດເປີດກະໂຫຼກຫຼຸດແຮງດັນໃນສະໝອງ ເນື່ອງຈາກເສັ້ນເລືອດສະໝອງສ່ວນໜຶ່ງຕາຍໄປແລ້ວ (ຕາມຜົນ CT Scan ທີ່ສະແດງຈຸດສີດຳໃນສະໝອງ).

 

5 ຈຸດຕ້ອງຫ້າມໃນການນວດ

 

ຂໍ້ມູນຈາກຄະນະແພດສາດໂຮງໝໍລາມາທິບໍດີ ມະຫາວິທະຍາໄລມະຫິດົນ ແລະ ສະຖານການແພດແຜນໄທປະຍຸກ ຄະນະແພດສາດສິລິລາດພະຍາບານ ລະບຸວ່າ ມີ 5 ຈຸດທີ່ “ບໍ່ຄວນນວດ” ຫາກບໍ່ມີຄວາມຮູ້ ໄດ້ແກ່:

 

• ຂະມັບ – ກະດູກບາງ ເສັ້ນເລືອດເປາະ
• ຕົ້ນຄໍ – ມີຫຼອດເລືອດແດງໃຫຍ່ທີ່ໄປລ້ຽງສະໝອງ
• ກະດູກສັນຫຼັງ/ອຸ້ງຊິງກຣານ – ສ່ຽງຕໍ່ການກະດູກເຄື່ອນຫຼືຫັກ
• ຮັກແຮ້ – ຈຸດລວມເສັ້ນປະສາດແລະເສັ້ນເລືອດສຳຄັນ
• ທ້ອງ – ມີອະໄວຍະວະພາຍໃນແລະເສັ້ນເລືອດໃຫຍ່ ຫາກມີຫຼອດເລືອດໂປ່ງພອງອາດປິແຕກໄດ້

ໃຜແດ່ “ບໍ່ຄວນນວດ”

ກຸ່ມສ່ຽງທີ່ອາດເກີດອັນຕະລາຍຈາກການນວດ ໄດ້ແກ່:

 

• ຜູ້ມີພະຍາດກ່ຽວກັບຫຼອດເລືອດ (ໂປ່ງພອງ, ອັກເສບ)
• ພະຍາດກະດູກພຸ, ກະດູກເປາະ
• ຜູ້ມີພະຍາດເລືອດຫຼືກິນຢາລະລາຍລິ່ມເລືອດ
• ພະຍາດມະເຮັງ, ພູມຄຸ້ມກັນບົກພ່ອງ
• ຍິງຖືພາ, ເດັກ, ແລະ ຜູ້ສູງອາຍຸ (ຄວນນວດໂດຍຜູ້ຊ່ຽວຊານເທົ່ານັ້ນ)

 

ຂໍ້ມູນຈາກ ຄະນະແພດສາດ ໂຮງໝໍ ລາມາທິບໍດີ ແລະ ສິລິລາດພະຍາບານ ຍັງລະບຸວ່າການນວດທີ່ບໍ່ເໝາະສົມອາດເຮັດໃຫ້ເກີດ stroke ຈາກການນວດ ໄດ້ຈິງ ຫາກເຮັດໃນຈຸດສ່ຽງຫຼືຜູ້ປ່ວຍມີພະຍາດປະຈຳຕົວຢູ່.

 

ນວດແນວໃດໃຫ້ປອດໄພ?

 

ການນວດໄທແມ່ນເປັນສາດດັ້ງເດີມທີ່ມີປະໂຫຍດໃນການຄາຍກ້າມເນື້ອ, ກະຕຸ້ນການໄຫຼວຽນໂລຫິດ, ແລະ ບັນເທົາອາການປວດເມື່ອຍ ແຕ່ຕ້ອງອາໄສຄວາມຮູ້ທາງກາຍະວິພາກ, ການຝຶກອົບຮົມ, ແລະ ໃບອະນຸຍາດຈາກສະຖານສຶກສາ/ໜ່ວຍງານຮັບຮອງ ເພື່ອປ້ອງກັນອັນຕະລາຍຈາກ “ການນວດດ້ວຍມືສະໝັກຫຼິ້ນ”

 

ໝໍປະຊາຈຶ່ງທິ້ງທ້າຍວ່າ:

 

“ຢາກໃຫ້ພັນລະຍານວດ ຕ້ອງໃຫ້ພັນລະຍາໄປຮຽນກ່ອນ ເພາະການນວດຜິດຈຸດອາດເຮັດໃຫ້ສະໝອງຕາຍ ແຂນຂາອ່ອນແຮງ ຫຼື ພິການຖາວອນໄດ້”

ສະແດງຄຳຄິດເຫັນ