ຜູ້ນຳຣັດເຊຍ ເອີ່ຍປາກຂໍຈັດການເຈລະຈາທາງກົງກັບຢູເຄຣນ ເພື່ອຍຸຕິການສູ້ຮົບທີ່ຍືດເຍື້ອຫຼາຍກວ່າ 3 ປີ ລະບຸວ່າຕ້ອງການໂອ້ລົມກັນໃນຕຸລະກີ ວັນທີ 15 ພຶດສະພານີ້

ວັນທີ່ 11 ພຶດສະພາ 2025 ວລາດິເມຍ ປູຕິນ ປະທານາທິບໍດີຣັດເຊຍ ສະເໜີຈັດການເຈລະຈາທາງກົງກັບຢູເຄຣນໃນວັນທີ 15 ພຶດສະພານີ້ ໂດຍລະບຸວ່າ ຄວນເລີ່ມເຈລະຈາທັນທີ ບໍ່ໃຫ້ຊັກຊ້າ ເພື່ອສ້າງສັນຕິພາບທີ່ຍັ່ງຍືນ ແລະ ກຳຈັດຕົ້ນຕໍຂອງສົງຄາມ ຊຶ່ງຜູ້ນຳຣັດເຊຍລະບຸດ້ວຍວ່າ ເປັນໄປໄດ້ທີ່ການເຈລະຈາຈະນຳມາຊຶ່ງການຢຸດຍິງ ຫຼື ການສະຫງົບສຶກຄັ້ງໃໝ່

ຜູ້ນຳຣັດເຊຍ ຍັງລະບຸດ້ວຍວ່າ ຈະລົມກັບເຣເຊບ ໄທຢິບ ເອີດວນ ປະທານາທິບໍດີຕຸລະກີ ເຖິງລາຍລະອຽດການເຈລະຈາດັ່ງກ່າວ ຫຼັງຈາກລະບຸວ່າ ຕ້ອງການຈັດການເຈລະຈາທີ່ນະຄອນອິສຕັນບູນຂອງຕຸລະກີ ຂະນະທີ່ກ່ອນໜ້ານີ້ການໂອ້ລົມກັນໂດຍກົງລະຫວ່າງຣັດເຊຍກັບຢູເຄຣນຄັ້ງລ່າສຸດເກີດຂຶ້ນຕັ້ງແຕ່ຊ່ວງແລກທີ່ຣັດເຊຍເປີດສາກບຸກຢູເຄຣນເມື່ອຕົ້ນປີ 2022 ຫຼື ກວ່າ 3 ປີແລ້ວ

ທ່າທີດັ່ງກ່າວມີຂຶ້ນຫຼັງຜູ້ນຳຊາດຢູໂຣບເດີນທາງຢ້ຽມຢາມຢູເຄຣນ ແລະ ຮຽກຮ້ອງໃຫ້ຣັດເຊຍຕົກລົງຢຸດຍິງໃນຢູເຄຣນໂດຍບໍ່ມີເງື່ອນໄຂເປັນເວລາ 30 ວັນ ເລີ່ມຈາກວັນທີ 12 ພຶດສະພານີ້

ຂະນະທີ່ຢູເຄຣນຍັງບໍ່ໄດ້ສະແດງທ່າທີໃດໆ ຕໍ່ຂໍ້ສະເໜີຄັ້ງນີ້ຂອງຜູ້ນຳຣັດເຊຍ ໂດຍທີ່ຜ່ານມາຊ່ວງທີ່ຣັດເຊຍສະເໜີຢຸດຍິງກັບຢູເຄຣນ 3 ວັນ ລະຫວ່າງຈັດງານສະເຫຼີມສະຫຼອງໄຊຊະນະຕໍ່ອະດີດນາຊີເຢຍລະມັນ ຊ່ວງສົງຄາມໂລກຄັ້ງທີ 2 ຜູ້ນຳຢູເຄຣນ ລະບຸວ່າ ບໍ່ມີຄວາມປ່ຽນແປງໃດໆ ເກີດຂຶ້ນ ຂະນະທີ່ຣັດເຊຍກ່າວຫາຢູເຄຣນວ່າລະເມີດການຢຸດຍິງ ໂດຍສົ່ງໂດຣນໂຈມຕີຣັດເຊຍທາງອາກາດເຖິງ 524 ຕົວ ລວມເຖິງໃຊ້ຂີປະນາວຸດຂອງຊາດຕາເວັນຕົກໂຈມຕີຣັດເຊຍດ້ວຍ

ສະແດງຄຳຄິດເຫັນ