ຈີນຫຼຸດການຖືຄອງພັນທະບັດລັດຖະບານສະຫະລັດລົງໃນເດືອນມີນາ ຕັ້ງແຕ່ກ່ອນໜ້າສົງຄາມຂູດຮີດພາສີຂອງປະທານາທິບໍດີໂດນັລ ທຣຳ ສົ່ງຜົນໃຫ້ສະຫະລາດຊະອານາຈັກກ້າວຂຶ້ນມາແທນທີ່ໃນອັນດັບ 2 ຂອງຕ່າງຊາດທີ່ຖືຄອງພັນທະບັດລັດຖະບານສະຫະລັດຫຼາຍທີ່ສຸດ

 

ໃນເດືອນດັ່ງກ່າວ ຊຶ່ງເປັນເດືອນກ່ອນໜ້າທຣຳເປີດສາກສຶກຮີດພາສີທີ່ກໍ່ຄວາມປັ່ນປ່ວນແກ່ຕະຫຼາດພັນທະບັດລັດຖະບານສະຫະລັດໃນເດືອນເມສາ ພົບວ່າບັນດາຕ່າງຊາດເຂົ້າຊື້ພັນທະບັດລັດຖະບານສະຫະລັດເພີ່ມຂຶ້ນຢ່າງຫຼາຍເປັນເດືອນທີ 2 ຕິດຕໍ່ກັນ

 

ແຕະລະດັບສູງສຸດເປັນປະຫວັດການ ໂດຍລວມແລ້ວຕ່າງຊາດຖືຄອງພັນທະບັດລັດຖະບານສະຫະລັດເພີ່ມຂຶ້ນ 233,100 ລ້ານໂດລາ ໃນເດືອນມີນາ ສູ່ລະດັບ 9.05 ລ້ານລ້ານໂດລາ ອ້າງອີງຈາກຕົວເລກຂອງກະຊວງການຄັງອາເມລິກາທີ່ເຜີຍແຜ່ເມື່ອວັນສຸກ(16ພຶດສະພາ) ຜິດກັບຈີນທີ່ຫຼຸດການຖືຄອງລົງ

 

ທີ່ຜ່ານມາ ຈີນ ຄືຜູ້ຖືຄອງພັນທະບັດລັດຖະບານສະຫະລັດລາຍໃຫຍ່ທີ່ສຸດ ກ່ອນຖືກຍີ່ປຸ່ນແຊງໜ້າໃນປີ 2019 ແລະ ຂໍ້ມູນຫຼ້າສຸດນີ້ພົບວ່າສະຫະລາດຊະອານາຈັກ ໄດ້ແຊງໜ້າ ຈີນ ເປັນຄັ້ງທຳອິດໃນຮອບກວ່າ 2 ທົດສະວັດ ໃນອັນດັບ 2 ຊາດທີ່ຖືຄອງພັນທະບັດລັດຖະບານສະຫະລັດຫຼາຍທີ່ສຸດໃນໂລກ

 

ໃນພາບລວມຂອງຂໍ້ມູນທີ່ເຜີຍແຜ່ໃນວັນສຸກ(16 ພຶດສະພາ) ບົ່ງຊີ້ວ່າຈົນເຖິງເດືອນມີນາ ຍັງບໍ່ມີການເອົາໃຈອອກຫ່າງຈາກພັນທະບັດລັດຖະບານສະຫະລັດ ຈົນກະທັ່ງ ທຣຳ ເປີດສາກມາດຕະການຮີດພາສີກຳນົດເຫຼັ້ນງານສິນຄ້ານຳເຂົ້າຈາກນານາຊາດໃນຊ່ວງຕົ້ນເດືອນເມສາ

 

ອຸປະສົງຂອງຕ່າງຊາດກາຍມາເປັນປະເດັນຖົກຖຽງກັນໃນຕະຫຼາດພັນທະບັດ ນັບຕັ້ງແຕ່ ທຣຳ ຍົກລະດັບຍຸດທະການຂຶ້ນພາສີເຊີງຮຸກ ແລະ ກ່າວຫາບັນດາຄູ່ຫູທາງການຄ້າຂອງສະຫະລັດຊ້ຳໆວ່າກຳລັງສີກປະເທດຂອງເຂົາເປັນຊິ້ນໆ

 

ໃນວັນທີ 2 ເມສາ ລາວປະກາດ “ວັນປົດປ່ອຍ” ຂູດຮີດພາສີທົ່ວໂລກ ແຮງເທຂາຍພັນທະບັດລັດຖະບານສະຫະລັດ ເຊັ່ນດຽວກັບໂດລາ ແລະ ຕະຫຼາດຫຸ້ນສະຫະລັດ ໃນຊ່ວງລະຫວ່າງເດືອນດັ່ງກ່າວ

 

ແບຣດ ເຊັດເຊີ ອະດີດເຈົ້າໜ້າທີ່ກະຊວງການຄັງສະຫະລັດ ຊຶ່ງເວລານີ້ເປັນສາຊິກສະພາຄວາມສຳພັນລະຫວ່າງປະເທດ ຂຽນບົນແພລັດຟອມເອັກຊ໌ ເບິ່ງວ່າການປັບປ່ຽນຂອງຈີນເປັນຄວາມເຄື່ອນໄຫວຫຼຸດໄລຍະເວລາການຖືຄອງ ບໍ່ແມ່ນການຕີຕົວອອກຫ່າງຈາກໂດລາຢ່າງແທ້ຈິງ

 

ຈົນເຖິງເດືອນມີນາ ຍີ່ປຸ່ນ, ສະຫະລາດຊະອານາຈັກ, ແຄນາດາ ແລະ ເບລຢຽມ ເປັນໜຶ່ງໃນບັນດາປະເທດທີ່ຖືຄອງພັນທະບັດລັດຖະບານສະຫະລັດເພີ່ມຂຶ້ນ ໂດຍສະຫະລາດຊະອານາຈັກ ຖືຄອງເພີ່ມຂຶ້ນເປັນ 779,300 ລ້ານໂດລາ ແຊງໜ້າ ຈີນ ທີ່ມີຢູ່ 765,400 ລ້ານໂດລາ ການຫຼຸດຖືຄອງຂອງຈີນ ສະທ້ອນເຖິງການເທຂາຍພັນທະບັດລັດຖະບານສະຫະລັດໄລຍະຍາວ 27,600 ລ້ານໂດລາ

 

ຍີ່ປຸ່ນ ຖືຄອງເພີ່ມຂຶ້ນເປັນເດືອນທີ 3 ຕິດຕໍ່ກັນໃນເດືອນມີນາ ສູ່ລະດັບ 1.13 ລ້ານລ້ານໂດລາ ສ່ວນແຄນາດາ ເພີ່ມຂຶ້ນ 20,100 ລ້ານໂດລາ ເປັນ 426,200 ລ້ານໂດລາ

 

ຄວາມກັງວົນກ່ຽວກັບສົງຄາມການຄ້າຫຼຸດລົງເມື່ອບໍ່ດົນມານີ້ ຕາມຫຼັງການພົບປະກັນລະຫວ່າງພວກເຈົ້າໜ້າທີ່ສະຫະລັດ ແລະ ເຈົ້າໜ້າທີ່ຈີນເມື່ອອາທິດທີ່ແລ້ວ ທີ່ນຳໄປສູ່ການປັບຫຼຸດເພດານພາສີລະຫວ່າງ 2 ຊາດ ຫຼັງຈາກກ່ອນໜ້ານີ້ເມື່ອຊ່ວງຕົ້ນເດືອນ ລັດຖະບານທຣຳຖະແຫຼງຂໍ້ຕົກລົງການຄ້າກັບສະຫະລາດຊະອານາຈັກ

ສະແດງຄຳຄິດເຫັນ