ເຄື່ອງໂທຄາແມກເວສຕ໌ (Tungsten Environment in Steady-state Tokamak: WEST) ຫຼື ດວງອາທິດທຽມຈາກຝຣັ່ງສ້າງສະຖິຕິໂລກໃນການເປີດໃຊ້ງານດວງອາທິດເທຽມຕໍ່ເນື່ອງສູງສຸດເຖິງ 1,337 ວິນາທີ ຫຼື 22 ນາທີ 17 ວິນາທີ ທຳລາຍສະຖິຕິເດີມຂອງເຄື່ອງອີສຕ໌ (Experimental Advanced Superconducting Tokamak: EAST) ຈາກຈີນ ທີ່ເຄີຍເຮັດໄວ້ທີ່ 1,066 ວິນາທີ ຫຼື 17 ນາທີ 46 ວິນາທີ

 

 

ເປັນຫຍັງຕ້ອງເຮັດສະຖິຕິເປີດດວງອາທິດທຽມໃຫ້ດົນທີ່ສຸດ

 

ເຄື່ອງປະຕິກອນຟິວຊັນ (Fusion Reactor) ຫຼື ອີກຊື່ວ່າດວງອາທິດທຽມ (Artificial sun) ເປັນເຄື່ອງຈຳລອງປະຕິກິລິຍານິວເຄລຍຟິວຊັນ (Nuclear Fusion) ຊຶ່ງເກີດຂຶ້ນເທິງດວງອາທິດ ທີ່ໃຫ້ພະລັງງານມະຫາສານ ແລະ ມີຄວາມປອດໄພສູງກວ່າພະລັງງານນິວເຄລຍຈາກການສະລາຍພະລັງງານຂອງສານ ຫຼື ນິວເຄລຍຟິຊຊັນ (Nuclear Fission) ໃນປັດຈຸບັນ

 

ແນວໃດກໍຕາມ ອຸປະສັກໂດຍພື້ນຖານໃນປັດຈຸບັນຄືຕົ້ນທຶນພະລັງງານທີ່ຈະຕ້ອງໃຊ້ສ້າງກະບວນການນິວເຄລຍຟິວຊັນ ຢ່າງເຊັ່ນ: ພລາສມາ (Plasma) ຂອງໄຮໂດຣເຈນ (H) ທີ່ເປັນຫົວໃຈຂອງນິວເຄລຍຟິວຊັນ ສູງກວ່າພະລັງງານທີ່ເຄື່ອງໂທຄາແມກຈະຜະລິດອອກມາໄດ້ ແລະອີກປັນຫາທີ່ສຳຄັນ ຄືການຄົງສະພາບພລາສມາ ລວມເຖິງລະດັບພະລັງງານໃນເຄື່ອງໃຫ້ນານພໍຈະຜະລິດໄຟຟ້າຕໍ່ເນື່ອງໄດ້

 

ການທົດສອບດວງອາທິດທຽມທີ່ນານທີ່ສຸດໃນໂລກ

 

ດ້ວຍເຫດນີ້ ນັກວິໄຈຈາກຝຣັ່ງຈຶ່ງໄດ້ທົດສອບການສ້າງພລາສມາໄຮໂດຣເຈນກຳລັງ 2 ເມກະວັດ (MW) ແລະ ຮັກສາສະພາບດັ່ງກ່າວຢ່າງຕໍ່ເນື່ອງຈົນເຮັດສະຖິຕິໄວ້ທີ່ 1,337 ວິນາທີ ເອົາຊະນະສະຖິຕິເກົ່າຂອງອີສຕ໌ທີ່ຢູ່ໃນເມືອງເຫີ່ຝ່າຍຂອງຈີນທີ່ເຮັດສະຖິຕິ 1,066 ວິນາທີ ໄດ້ສຳເລັດ

 

ຄວາມສຳເລັດດັ່ງກ່າວຈະຖືກຖອດບົດຮຽນເພື່ອກຽມພ້ອມສຳລັບການທົດສອບກັບໄອເທີ (ITER: International Thermonuclear Experimental Reactor)

 

ເຄື່ອງໂທຄາແມກທີ່ໃຫຍ່ທີ່ສຸດໃນໂລກຊຶ່ງຕັ້ງຢູ່ທາງຕອນໃຕ້ຂອງຝຣັ່ງເຊັ່ນກັນ ລວມເຖິງກຽມຍົກລະດັບການທົດສອບກັບເວສຕ໌ໃຫ້ສາມາດສ້າງພລາສມາໄດ້ຢ່າງໜ້ອຍ 2-3 ຊົ່ວໂມງ ຊຶ່ງເປັນສ່ວນໜຶ່ງຂອງເປົ້າໝາຍໃນການພັດທະນາແຫຼ່ງພະລັງງານສະອາດ ແລະ ຍືນຍົງໃນອະນາຄົດ

 

ສະແດງຄຳຄິດເຫັນ