ນິວຣັລລິງກ (Neuralink) ບໍລິສັດເທັກໂນໂລຍີສະໝອງທີ່ກໍ່ຕັ້ງໂດຍອີລອນ ມັສກ

ປະກາສຄວາມສຳເລັດໃນການລະດົມທຶນຮອບລ່າສຸດ ມູນຄ່າ 600 ລ້ານໂດລາສະຫະລັດ ສົ່ງຜົນໃຫ້ມູນຄ່າລວມຂອງບໍລິສັດພຸ່ງຂຶ້ນແຕະ 9,000 ລ້ານໂດລາ

ຕາມລາຍງານຂອງ Semafor ນັບເປັນການເຕີບໂຕຢ່າງກ້າວກະໂດດຈາກມູນຄ່າ 3,500 ລ້ານໂດລາເມື່ອປາຍປີ 2023

ປັດໄຈສຳຄັນທີ່ຢູ່ເບື້ອງຫຼັງຄວາມເຊື່ອໝັ້ນຂອງນັກລົງທຶນຄືຄວາມກ້າວໜ້າທາງເທັກໂນໂລຍີຂອງ Neuralink ໂດຍບໍລິສັດໄດ້ຝັງຊິບສະໝອງຈຳນວນ 3 ຊິ້ນໃນຄົນເຈັບທີ່ເປັນອຳພາດ ຫຼື ບໍ່ສາມາດສື່ສານໄດ້

ໜຶ່ງໃນນັ້ນຄືຊາຍຈາກລັດແອຣິໂຊນາ ຜູ້ປ່ວຍໂລກ ALS ທີ່ບໍ່ສາມາດເວົ້າໄດ້ ຊຶ່ງໄດ້ແຊຣວິດີໂອຜ່ານແພລັດຟອມ X ສະແດງໃຫ້ເຫັນເຖິງການສື່ສານຜ່ານຊິບດັ່ງກ່າວ

ເທັກໂນໂລຍີ Breakthrough Device

ກ່ອນໜ້ານີ້ ວັນທີ 10 ພຶດສະພາທີ່ຜ່ານມາ ບໍລິສັດ ນິວຣັລລິງກ (Neuralink) ໄດ້ຮັບການຮັບຮອງຈາກອົງການອາຫານ ແລະ ຢາແຫ່ງສະຫະລັດ (FDA)

ໃຫ້ເປັນອຸປະກອນລ້ຳຍຸກ (Breakthrough Device) ສຳລັບການຊ່ວຍເຫຼືອຜູ້ທີ່ມີຄວາມບົກພ່ອງທາງການເວົ້າຢ່າງຮຸນແຮງ ໂດຍການຮັບຮອງນີ້ຊ່ວຍເລັ່ງກະບວນການພັດທະນາ ແລະ ນຳໄປໃຊ້ຈິງທາງຄລີນິກ

ສຳລັບ “Breakthrough Device” ຄື ຊິບຝັງສະໝອງທີ່ສາມາດອ່ານສັນຍານຈາກສະໝອງ ແລະ ແປງເປັນຄຳສັ່ງດິຈິຕອລ

ເພື່ອຊ່ວຍໃຫ້ຜູ້ທີ່ສູນເສຍຄວາມສາມາດໃນການເວົ້າ ຫຼື ເຄື່ອນໄຫວສາມາດສື່ສານກັບໂລກພາຍນອກໄດ້ ຕົວຊິບຈະຝັງອີເລັກໂທຣດໄວ້ໃນສະໝອງເພື່ອກວດຈັບສັນຍານປະສາດ

ຈາກນັ້ນຖອດລະຫັດຄວາມຕັ້ງໃຈຂອງຜູ້ໃຊ້ ແລະ ສົ່ງຂໍ້ມູນໄປຍັງຄອມພິວເຕີ ຫຼື ອຸປະກອນສື່ສານແບບໄຮ້ສາຍ

ເທັກໂນໂລຍີນີ້ມີເປົ້າໝາຍເພື່ອຊ່ວຍເຫຼືອຜູ້ປ່ວຍທີ່ເປັນອຳພາດ ຫຼື ມີຄວາມບົກພ່ອງທາງການສື່ສານຢ່າງຮຸນແຮງ ເຊັ່ນ: ຜູ້ປ່ວຍໂລກ ALS ໂດຍການໄດ້ຮັບສະຖານະ Breakthrough Device ຈະຊ່ວຍໃຫ້ Neuralink ສາມາດເຮັດວຽກຮ່ວມກັບ FDA ຢ່າງໃກ້ຊິດ ແລະ ນຳເທັກໂນໂລຍີອອກໃຊ້ຈິງທາງການແພດໄດ້ໄວຂຶ້ນກວ່າກະບວນການປົກກະຕິ

ຢ່າງໃດກໍຕາມ ຊີອີໂອຂອງບໍລິສັດ ຈາເຣັດ ເບີຊອລລ ແລະ ທີມບໍລິຫານຂອງ Neuralink ຍັງບໍ່ໄດ້ໃຫ້ຄວາມເຫັນເພີ່ມເຕີມກ່ຽວກັບການລະດົມທຶນຄັ້ງລ່າສຸດ

ຂະນະທີ່ສຳນັກຂ່າວ Bloomberg ລາຍງານກ່ອນໜ້ານີ້ວ່າ Neuralink ມີເປົ້າໝາຍການລະດົມທຶນຢູ່ທີ່ 500 ລ້ານໂດລາສະຫະລັດ ແລະ ເຮັດໃຫ້ການປະເມີນມູນຄ່າບໍລິສັດຈະໄປຢູ່ທີ່ 8,500 ລ້ານໂດລາສະຫະລັດ

ການເຕີບໂຕຄັ້ງນີ້ສະທ້ອນເຖິງຄວາມສົນໃຈ ແລະ ສັກຍະພາບຂອງເທັກໂນໂລຍີປະສານສະໝອງ-ຄອມພິວເຕີ ທີ່ອາດປະຕິວັດການຮັກສາແລະການສື່ສານສຳລັບຜູ້ປ່ວຍທົ່ວໂລກໃນອະນາຄົດອັນໃກ້

ສະແດງຄຳຄິດເຫັນ