ລາຍງານລະບຸວ່າ: ລົດເມ, ລົດຍົນ ແລະ ພາຫະນະອື່ນໆ ຫຼາຍຄັນໄດ້ຈົມນໍ້າຢູ່ໃນອຸໂມງທາງລອດຕ່າງໆ ໃນຫຼາຍເຂດທົ່ວນະຄອນຫຼວງນິວເດລີ ແລະ ໄດ້ເກີດລະບົບໄຟຟ້າຂັດຂ້ອງເປັນເວລາຫຼາຍຊົ່ວໂມງໃນຫຼາຍເຂດຍ້ອນສະພາບອາກາດບໍ່ດີ.
ໃນຕອນເຊົ້າວັນທີ 25 ພຶດສະພາຜ່ານມານີ້, ໄດ້ເກີດໄພນ້ຳຖ້ວມລະດັບຫົວເຂົ່າເຖິງແອວຢູ່ເຂດທີ່ຕໍ່າຫຼາຍຈຸດ. ໂດຍສະເພາະໃນພາກກາງ ແລະ ພາກໃຕ້ຂອງນິວເດລີ ສົ່ງຜົນໃຫ້ການຈະລາຈອນຕິດຂັດ.
ສະໜາມບິນເດລີ, ໄດ້ອອກແຈ້ງການໃຫ້ຜູ້ໂດຍສານກວດສອບສະຖານະຖ້ຽວບິນຂອງຕົນກ່ອນອອກເດີນທາງໄປສະໜາມບິນ. ໂດຍມີລາຍງານວ່າສະພາບດິນຟ້າອາກາດບໍ່ເອື້ອອຳນວຍ ໃນລະຫວ່າງເວລາ 23:30-04:00 ໂມງ, ໂດຍມີຖ້ຽວບິນຈຳນວນ 49 ຖ້ຽວຖືກປ່ຽນເສັ້ນທາງໄປສູ່ສະໜາມບິນອື່ນແທນສະໜາມບິນປາຍທາງເດີມ. ເຖິງຢ່າງໃດກໍຕາມ, ປັດຈຸບັນ, ການບໍລິການການບິນໄດ້ກັບຄືນສູ່ສະພາບປົກກະຕິແລ້ວ.
