ພິທີປະກາດການແຕ່ງຕັ້ງ ແລະ ມອບ-ຮັບ ເລຂາພັກເມືອງ ເຈົ້າເມືອງຍົມມະລາດ ແຂວງຄຳມ່ວນ ລະຫວ່າງ ຜູ້ເກົ່າ ແລະ ຜູ້ໃໝ່ ໄດ້ຈັດຂຶ້ນໃນວັນທີ 28 ພຶດສະພານີ້ ໂດຍເປັນກຽດເຂົ້າຮ່ວມຂອງທ່ານ ວັນໄຊ ພອງສະຫວັນ ກຳມະການສູນກາງພັກ ເລຂາພັກແຂວງ ເຈົ້າແຂວງຄໍາມ່ວນ. ທ່ານ ສົມໃຈ ພານີຈັນ ຄະນະປະຈໍາພັກແຂວງ ຫົວໜ້າຄະນະຈັດຕັ້ງແຂວງ ໄດ້ຂຶ້ນຜ່ານຂໍ້ຕົກລົງຂອງຄະນະປະຈໍາພັກແຂວງ

ແລະ ຂໍ້ຕົກລົງຂອງທ່ານເຈົ້າແຂວງຄໍາມ່ວນ ສະບັບເລກທີ 904, 158/ຈຂ ແລະ 50/ຄປຈ.ຄມ ລົງວັນທີ 27 ພຶດສະພາ 2025. ໃນນີ້, ເຫັນດີຕົກລົງ ຍົກຍ້າຍທ່ານ ບຸນທັນ ສຸວັນນະລາດ ກໍາມະການພັກແຂວງ ເລຂາພັກເມືອງ ເຈົ້າເມືອງຍົມມະລາດ ໄປຮັບໜ້າທີ່ໃໝ່ ເປັນຫົວໜ້າຄະນະໂຄສະນາອົບຮົມແຂວງ ແລະ ຕົກລົງແຕ່ງຕັ້ງ ທ່ານ ຄໍາໜັ້ນ ສໍປະເສີດ ກຳມະການພັກແຂວງ, ເລຂາຄະນະພັກຮາກຖານ ຫົວໜ້າພະແນກຊັບພະຍາກອນທຳມະຊາດ ແລະ ສິ່ງແວດລ້ອມແຂວງ ເປັນຮັກສາການເຈົ້າເມືອງຍົມມະລາດ, ຮັກສາການແທນ ເລຂາຄະນະບໍລິຫານງານພັກເມືອງຍົມມະລາດ. ຈາກນັ້ນ, ກໍໄດ້ເຊັນບົດບັນທຶກມອບ-ຮັບໜ້າທີ່ລະຫວ່າງ ເລຂາພັກເມືອງ, ເຈົ້າເມືອງຜູ້ເກົ່າ ແລະ ຜູ້ໃໝ່.

ໂອກາດນີ້, ທ່ານ ວັນໄຊ ພອງສະຫວັນ ກໍ່ໄດ້ເນັ້ນໜັກໃຫ້ເລຂາພັກເມືອງ ເຈົ້າເມືອງຄົນໃໝ່ ແລະ ພະນັກງານຫຼັກແຫຼ່ງຂອງເມືອງ ຕ້ອງເອົາໃຈໃສ່ວຽກງານນໍາພາການເມືອງ-ແນວຄິດ ຂອງພະນັກງານ-ສະມາຊິກພັກ ຕະຫຼອດຮອດປະຊາຊົນບັນດາເຜົ່າໃຫ້ເຂົ້າໃຈ ແລະ ຮັບຮູ້ຢ່າງທົ່ວເຖິງ, ອັນໃດເປັນຜົນສຳເລັດ ກໍໃຫ້ພ້ອມກັນປົກປັກຮັກສາ ແລະ ເສີມຂະຫຍາຍໃຫ້ດີຂຶ້ນເລື້ອຍໆ, ອັນໃດຍັງເຫັນວ່າເປັນຈຸດອ່ອນຄົງຄ້າງ, ປະຕິບັດບໍ່ທັນໄດ້ດີ ກໍຕ້ອງໄດ້ພ້ອມກັນສືບຕໍ່ປັບປຸງແກ້ໄຂ ເຮັດໃຫ້ມີການຫັນປ່ຽນຢ່າງຕັ້ງໜ້າກວ່າເກົ່າ, ສືບຕໍ່ປົກປັກຮັກສາ ແລະ ເສີມຂະຫຍາຍມູນເຊື້ອຄວາມສາມັກຄີພາຍໃນພັກ ໃຫ້ມີຄວາມໜັກແໜ້ນ, ມີຄວາມເປັນເອກະພາບສູງ, ສືບຕໍ່ເປັນຫຼັກແຫຼ່ງ, ເປັນຄັນທຸງ ແລະ ເປັນແກນນຳໃນການເຕົ້າໂຮມຄວາມສາມັກຄີ ໃນຖັນແຖວພະນັກງານ-ສະມາຊິກພັກ ແລະ ປະຊາຊົນບັນດາເຜົ່າ, ພ້ອມກັນນັ້ນ ບັນດາສະຫາຍກໍ່ຕ້ອງໄດ້ຊ່ວຍເຫຼືອ, ໃຫ້ການຮ່ວມມື ແລະ ໃຫ້ການສະໜັບສະໜູນ ຜູ້ທີ່ຮັບແຕ່ງຕັ້ງໃໝ່ໃນການເຮັດໜ້າທີ່ໃຫ້ມີຜົນສໍາເລັດໃນຕໍ່ໜ້າ.

(ຂ່າວ: ມະນີວັນ)

ສະແດງຄຳຄິດເຫັນ