ໃຜທີ່ບໍ່ມັກທຳຄວາມສະອາດຫ້ອງນອນ ຫຼື ຈັດບ້ານໃຫ້ເປັນລະບຽບ ອີກບໍ່ນານນີ້ເຮົາອາດຈະບໍ່ຕ້ອງເຮັດສິ່ງເຫຼົ່ານີ້ເອງອີກຕໍ່ໄປ ເມື່ອມີນັກວິໄຈທີ່ກຳລັງພັດທະນາຫຸ່ນຍົນມາກຄວາມສາມາດຕົວໃໝ່ ອອກແບບໃຫ້ມາດູແລງານບ້ານໂດຍສະເພາະ

ນັກວິໄຈດ້ານຫຸ່ນຍົນທີ່ມະຫາວິທະຍາໄລສະແຕນຟອດ ກຳລັງພັດທະນາແຂນຫຸ່ນຍົນເຄື່ອນທີ່ ຊຶ່ງໃຊ້ປະໂຫຍດຈາກປັນຍາປະດິດ (AI) ລວມເຖິງໂມເດລພາສາຂະໜາດໃຫຍ່ (LLM) ແລະ ໂມເດລການເບິ່ງເຫັນ ເພື່ອຮຽນຮູ້ ແລະ ເຮັດວຽກບ້ານສະເພາະຕົວ ເຊັ່ນ: ການແຍກຜ້າຊັກ ການເຮັດຄວາມສະອາດເຄົ້າເຕີ ແລະ ຈັດລະບຽບສິ່ງຂອງ

ຫຸ່ນຍົນຕົວນີ້ຊື່ວ່າ ໄທດີບອດ (Tidybot) ມາຈາກຄຳວ່າໄທດີ (Tidy) ໃນພາສາອັງກິດທີ່ແປວ່າ ຄວາມເປັນລະບຽບຮຽບຮ້ອຍ ໄທດີບອດ (Tidybot) ຈຶ່ງເປັນເໝືອນຫຸ່ນຍົນທີ່ຊ່ວຍເຮັດຄວາມສະອາດ ຈັດການງານບ້ານໃຫ້ເປັນລະບຽບ

ຫຸ່ນຍົນຕົວນີ້ໃຊ້ໂມເດນພາສາຂະໜາດໃຫຍ່ (LLM) ຄ້າຍກັບເທັກໂນໂລຊີທີ່ຂັບເຄື່ອນປັນຍາປະດິດ ແຊດຈີພີທີ (ChatGPT) ໃນການປະມວນຜົນຊຸດຂໍ້ມູນອິນເທີເນັດຈຳນວນຫຼາຍ ເຮັດໃຫ້ສາມາດຈົດຈຳ ແລະ ຈັດໝວດໝູ່ສິ່ງຂອງຕ່າງໆ ເຊັ່ນ: ເສື້ອຜ້າ ຂອງຫຼິ້ນ ແລະ ອາຫານໄດ້ຢ່າງແມ່ນຍຳ

ດ້ວຍການລວມໂມເດລປັນຍາປະດິດເຂົ້າກັບໂມເດລການເບິ່ງເຫັນ ຫຸ່ນຍົນຕົວນີ້ຈຶ່ງສາມາດລະບຸລັກສະນະຂອງວັດຖຸ ເຊັ່ນ: ສີ ແລະ ຮູບຮ່າງ ຊ່ວຍໃຫ້ແຍກປະເພດຜ້າທີ່ຊັກ ທັງຜ້າສີອ່ອນ ແລະ  ສີເຂັ້ມ ຫຼື ຍົກຕຸ໊ກກະຕາໝີ ໄປວາງເທິງຊັ້ນໄດ້ ຫຼັງຈາກໄດ້ຮັບຄຳແນະນຳຈາກຜູ້ໃຊ້ງານ ພຽງບໍ່ເທົ່າໃດຄຳສັ່ງເທົ່ານັ້ນ

ທີມຜູ້ພັດທະນາໄດ້ສາທິດການໃຊ້ງານຫຸ່ນຍົນຕົວນີ້ ດ້ວຍການຄວບຄຸມມືຂອງຫຸ່ນຍົນຜ່ານສະມາດໂຟນພຽງແຄ່ເຄື່ອງດຽວ ເພື່ອສັ່ງໃຫ້ຫຸ່ນຍົນຍົກຈັບ ເຄື່ອນຍ້າຍວັດຖຸ ໂດຍຕົວສະມາດໂຟນທີ່ວ່ານີ້ຈະຕິດຕັ້ງເຊັນເຊີທີ່ສາມາດໃຊ້ໃນການແປຕຳແໜ່ງ ແລະ ທິດທາງຂອງມືຂອງຜູ້ຄວບຄຸມ ໄປຍັງມືຂອງຫຸ່ນຍົນໄດ້

ຈາກນັ້ນຫຸ່ນຍົນ ໄທດີບອດ (Tidybot) ຈະໃຊ້ຂັ້ນຕອນວິທີການຮຽນຮູ້ຂອງເຄື່ອງເພື່ອຮຽນຮູ້ ແລະ ບັນທຶກງານເຫຼົ່ານີ້ໄວ້ໃຊ້ໃນອະນາຄົດ ເຊັ່ນ: ຕໍ່ໄປມັນອາດຈະຮຽນຮູ້ວິທີການເປີດປິດລິ້ນຊັກຈາກຜູ້ໃຊ້ງານ ຫຼື ຫຼຽນແບບວິທີການເປີດເຄື່ອງຊັກຜ້າ ວິທີການເຊັດເຄົ້າເຕີຄົວ ຫຼື ແມ້ກະທັ່ງວິທີການເຮັດຄວາມສະອາດຫ້ອງນ້ຳໄດ້ເຊັ່ນກັນ

ໃນອະນາຄົດທາງທີມຜູ້ພັດທະນາຫວັງວ່າຈະສາມາດຕໍ່ຍອດ ໄທດີບອດ (Tidybot) ໃຫ້ເຮັດວຽກໄດ້ໂດຍອັດຕະໂນມັດຢ່າງສົມບູນ ແລະ ມີແຜນທີ່ຈະເພີ່ມແຂນກົນແຂນທີ່ສອງເຂົ້າໄປ ຮວມເຖິງພັດທະນາລະບົບການເຮັດວຽກຮ່ວມກັນຂອງຫຸ່ນຍົນຈຳນວນຫຼາຍ ເພື່ອຊ່ວຍໃນການເຮັດຄວາມສະອາດ ແລະ ດູແລບ້ານໄດ້ຢ່າງມີປະສິດທິພາບຫຼາຍຍິ່ງຂຶ້ນ

ສະແດງຄຳຄິດເຫັນ