ເວັບໄຊ yahoo ລາຍງານພິເສດ ເມື່ອອະດີດໝູ່ບ້ານນັກກິລາໂອລິມປິກ “HARUMI FLAG” ທີ່ຕັ້ງຢູ່ໃນເມືອງຊູໂອ ກຸງໂຕກຽວ ໄດ້ຮັບການປັບໂສມຄັ້ງໃຫຍ່ຫຼັງຈົບໂຕກຽວໂອລິມປິກ 2020 ແລະ ເລີ່ມເປີດໃຫ້ປະຊາຊົນເຂົ້າຢູ່ອາໄສຕັ້ງແຕ່ເດືອນມັງກອນ 2024 ໃນຖານະໂຄງການເຮືອທົງຂອງເມືອງ ທີ່ຕັ້ງເປົ້າໃຫ້ທີ່ນີ້ເປັນເຂດທີ່ຢູ່ອາໄສທັນສະໄໝໃຈກາງມະຫານະຄອນ

 

ແຕ່ໃນເວລາພຽງບໍ່ດົນ ສິ່ງທີ່ຊາວຍີ່ປຸ່ນໄດ້ພົບກັບບໍ່ແມ່ນຄວາມສະຫງົບສຸກແບບທີ່ຄາດໄວ້ ຫາກແຕ່ເປັນບັນຫາລົບກວນຈາກເຄືອຂ່າຍເສດຖະກິດໃຕ້ດິນ ທີ່ກ່ຽວຂ້ອງກັບກຸ່ມຊາວຈີນຊຶ່ງເຂົ້າມາດຳເນີນກິດຈະກໍາຜິດກົດໝາຍຢ່າງຕໍ່ເນື່ອງ

 

 

ເສດຖະກິດເງົາເລີ່ມປັກຫຼັກກາງໂຕກຽວ

 

ລາຍງານຈາກ ອາກາອິຊິ ຊິນອິຈິໂຣ ນັກຂ່າວສາຍສືບສວນຊື່ດັງຂອງຍີ່ປຸ່ນ ລະບຸວ່າ ບໍລິເວນ HARUMI FLAG ກຳລັງປະເຊີນກັບການກໍ່ຕົວຂອງ “ເຂດເສດຖະກິດຈີນແບບເງົາ” ໂດຍພົບການດຳເນີນທຸລະກິດຜິດກົດໝາຍຫຼາຍຮູບແບບ ຕັ້ງແຕ່ບໍລິການ “ມິນປາເຖື່ອນ” ຫຼື ການປ່ອຍເຊົ່າໄລຍະສັ້ນໂດຍບໍ່ໄດ້ຮັບອະນຸຍາດ, ລົດຕູ້ຮັບສົ່ງຜູ້ໂດຍສານແບບຜິດກົດໝາຍ (ທີ່ຮູ້ຈັກໃນຊື່ “ໄວແທັກຊີ່”) ໄປຈົນເຖິງຮ້ານອາຫານເຖື່ອນທີ່ແຝງຕົວຢູ່ໃນຄອນໂດພັກອາໄສ

 

ລົດຕູ້ຫຼູຢ່າງ Toyota Alphard ຊຶ່ງໃຊ້ທະບຽນຕ່າງແຂວງ ປະກົດໃຫ້ເຫັນຢູ່ເປັນປະຈຳໃນພື້ນທີ່ ຈອດລໍຖ້າຮັບຜູ້ໂດຍສານປະຊົນຊົນຈີນຈາກສະໜາມບິນໄປຍັງສະຖານທີ່ທ່ອງທ່ຽວຍອດນິຍົມ ເຊັ່ນ ຮາໂກເນະ ຫຼື ຊິບຸຍະ ໂດຍບໍ່ຜ່ານລະບົບແທັກຊີ່ ຫຼືບໍລິການຂົນສົ່ງທີ່ຖືກກົດໝາຍຂອງຍີ່ປຸ່ນ

 

“ພວກເຂົາເວົ້າພາສາຈີນກັນທັງໝົດ ຄົນຂັບໃສ່ຊຸດດຳ ສູບຢາຢູ່ແຄມທາງ ຈອດລົດຂວາງທາງຍ່າງ ຊາວບ້ານຮ້ອງທຸກໄປແລ້ວຫຼາຍຄັ້ງ ແຕ່ເລື່ອງກໍຍັງບໍ່ຈົບ” ຜູ້ຢູ່ອາໄສລາຍໜຶ່ງໃຫ້ຂໍ້ມູນກັບສື່

 

ຄອນໂດກາຍເປັນໂຮງແຮມເຖື່ອນ ຮັບຊຳລະເປັນເງິນຫຍວນ

 

ອີກດ້ານໜຶ່ງ ຫ້ອງພັກຫຼາຍຢູນິດໃນ HARUMI FLAG ຖືກດັດແປງເປັນຮ້ານອາຫານຂະໜາດໜ້ອຍ ບາງແຫ່ງສົ່ງກິ່ນເຄື່ອງເທດຕະລົບອົບອວນໄປທົ່ວໂຖງທາງຍ່າງ ພ້ອມກ່ອງບັນຈຸວັດຖຸດິບແລະຂີ້ເຫຍື້ອຈຳນວນຫຼາຍກອງຢູ່ໜ້າຫ້ອງ

 

ນອກຈາກນີ້ ຍັງພົບຍິງສາວທີ່ຖືກະແຈຈຳນວນຫຼາຍເຂົ້າອອກຫ້ອງຫຼາຍຢູນິດ ເປັນໄປໄດ້ວ່າເປັນພະນັກງານເຮັດຄວາມສະອາດທີ່ເຮັດວຽກຄືໃນໂຮງແຮມ ມີການເຮັດເກັບຄ່າທີ່ພັກແລະບໍລິການຕ່າງໆດ້ວຍ “ເງິນຫຍວນ” ຊຶ່ງໝາຍເຖິງລາຍໄດ້ເຫຼົ່ານີ້ບໍ່ເຂົ້າສູ່ລະບົບເສດຖະກິດຍີ່ປຸ່ນໂດຍກົງ ແລະຫຼີກລ້ຽງພາສີໂດຍສິ້ນເຊິງ

 

 

ບໍ່ແມ່ນພຽງແຕ່ເສດຖີຈີນທີ່ຊື້ອະສັງຫາລິມະຊັບໃນຍີ່ປຸ່ນ

 

ເຖິງແມ່ນຄວາມຈຳຂອງຄົນທົ່ວໄປມັກຄິດວ່າຜູ້ຊື້ອະສັງຫາລິມະຊັບໃນຍີ່ປຸ່ນຕ້ອງເປັນມະຫາເສດຖີ ແຕ່ “ເຈິນເຈັ້ງອີ້” (ນາມສົມມຸດ) ນາຍໜ້າຊາວຈີນໃຫ້ຂໍ້ມູນວ່າ ກຸ່ມລູກຄ້າຫຼັກກັບເປັນຄົນຊົນຊັ້ນກາງຈາກເມືອງໃຫຍ່ ເຊັ່ນ ປັກກິ່ງ ແລະ ຊຽງໄຮ້ ທີ່ມີລາຍໄດ້ປະມານ 20,000-40,000 ຫຍວນຕໍ່ເດືອນ

 

“ໃນຈີນ ລາຄາບ້ານຂຶ້ນສູງຫຼາຍກວ່າ 15 ເທົ່າຈາກເມື່ອສິບປີກ່ອນ ຄົນທີ່ຂາຍຊັບສິນໃນຈີນໄດ້ກໍນຳກຳໄລນັ້ນມາຊື້ຄອນໂດໃນຍີ່ປຸ່ນ ຊຶ່ງເບິ່ງຖືກລົງກວ່າເກົ່າຫຼາຍໂດຍທຽບກັບຄ່າເງິນເຢນ” ເຂົາອະທິບາຍ

 

ລາວຍັງເສີມດ້ວຍວ່າ ປັດໄຈທີ່ລູກຄ້າຊາວຈີນໃຫ້ຄວາມສຳຄັນທີ່ສຸດຄື ວິວທະເລ, ເຫັນໂຕກຽວທາວເວີ ແລະ ເບິ່ງເຫັນພູເຂົາໄຟຟູຈິ ຊຶ່ງ HARUMI FLAG ສາມາດຕອບໂຈດທັງໝົດໄດ້ ຈຶ່ງບໍ່ແປກທີ່ຈະກາຍເປັນເປົ້າໝາຍຂອງທັງນັກລົງທຶນ ແລະນັກທ່ອງທ່ຽວຊາວຈີນຈຳນວນຫຼາຍ

 

ຊາວບ້ານເດືອດຮ້ອນ ສຽງດັງ ລະບົບຮັກສາຄວາມປອດໄພເປເພ

 

ຊາວຍີ່ປຸ່ນທີ່ເຂົ້າຢູ່ອາໄສໃນ HARUMI FLAG ດ້ວຍຄວາມຫວັງວ່າຈະໄດ້ໃຊ້ຊີວິດໃນຊຸມຊົນຄວາມສະຫງົບປອດໄພ ກັບຕ້ອງປະເຊີນກັບຄວາມວຸ່ນວາຍຈາກຜູ້ຢູ່ອາໄສໝູນວຽນທີ່ບໍ່ເຄົາລົບກົດຊຸມຊົນ

 

ສຽງດັງລົບກວນຕອນກາງຄືນ ການເຂົ້າອອກແບບບໍ່ມີຍາມຮັກສາຄວາມປອດໄພ ແລະ ຜູ້ເຊົ່າໄລຍະສັ້ນທີ່ບໍ່ມີຄວາມຮັບຜິດຊອບ ເຮັດໃຫ້ຫຼາຍຄອບຄົວຮູ້ສຶກບໍ່ປອດໄພ ແລະ ເລີ່ມຕັ້ງຄຳຖາມກັບຄວາມໂປ່ງໃສຂອງການບໍລິຫານໂຄງການ

 

 

ສື່ຂ່າວຍີ່ປຸ່ນເລີ່ມຂຸດເລິກວ່າໃຜຢູ່ເບື້ອງຫຼັງ?

ລາຍງານສະບັບເຕັມຈາກ ນິດຕະຍະສານ Weekly Post ສະບັບວັນທີ 6-13 ມິຖຸນາ 2025 ໄດ້ເປີດເຜີຍການກວດສອບເຊີງເລິກຂອງຫົວໜ່ວຍງານລັດເຖິງ “ຢາມິ ມິນປາກຸ” ຫຼືເຄືອຂ່າຍທຸລະກິດມືດທີ່ໃຊ້ຄອນໂດເປັນໂຮງແຮມເຖື່ອນ ຊຶ່ງອາດເຊື່ອມໂຍງເຖິງຜູ້ຈັດການອະສັງຫາລິມະຊັບບາງລາຍທີ່ມີຄວາມສຳພັນກັບທຶນຈີນໂດຍກົງ

 

ບົດສະຫຼຸບ

 

HARUMI FLAG ຊຶ່ງເຄີຍເປັນສັນຍາລັກແຫ່ງຄວາມຫວັງຂອງການພັດທະນາເມືອງ ກັບກຳລັງປະເຊີນວິກິດຄວາມໝັ້ນຄົງໃນລະດັບຊຸມຊົນ ອັນເປັນຜົນຈາກເສດຖະກິດເງົາທີ່ແຊກຊຶມເຂົ້າມາຢ່າງວ່ອງໄວ

 

ບັນຫານີ້ບໍ່ພຽງກ່ຽວຂ້ອງກັບກົດໝາຍຫຼືຜົນກະທົບຕໍ່ຜູ້ຢູ່ອາໄສເທົ່ານັ້ນ ແຕ່ຍັງສະທ້ອນຄຳຖາມໃຫຍ່ເຖິງນະໂຍບາຍການຄວບຄຸມອະສັງຫາລິມະຊັບໃນເມືອງຫຼວງຂອງຍີ່ປຸ່ນ ທີ່ອາດກຳລັງເປີດປະຕູຕ້ອນຮັບທຶນຕ່າງຊາດ ໂດຍແລກກັບຄວາມສະຫງົບຂອງຊຸມຊົນທ້ອງຖິ່ນ

ສະແດງຄຳຄິດເຫັນ