ບິລ ເກດ ຜູ້ກໍ່ຕັ້ງໄມໂຄຣຊອຟທ໌ຖະແຫຼງມື້ວານນີ້ (3 ມິຖຸນາ) ວ່າ ຊັບສິນ 200,000 ລ້ານໂດລາສະຫະລັດ ຂອງລາວສ່ວນໃຫຍ່ ຈະຖືກນຳໄປໃຊ້ກັບການພັດຖະນາບໍລິການດ້ານສຸຂະພາບແລະການສຶກສາໃນອາຟິກາ

ໃນອີກ 20 ປີຕໍ່ໜ້າ ໂດຍມະຫາເສດຖີຊາວອາເມຣິກັນໄວ 69 ປີຜູ້ນີ້ ກ່າວໃນນະຄອນແອດດິສ ອາບາບາ ນະຄອນຫຼວງຂອງເອທິໂອເປຍວ່າ “ການປົດປ່ອຍສັກກະຍະພາບຂອງມະນຸດຜ່ານດ້ານສຸຂະພາບແລະການສຶກສາ ຈະເຮັດໃຫ້ທຸກປະເທດໃນອາຟິກາສາມາດກ້າວໄປສູ່ເສັ້ນທາງແຫ່ງຄວາມຈະເລີນຮຸ່ງເຮືອງໄດ້” ລາວຍັງຮຽກຮ້ອງໃຫ້ນັກປະດິດຮຸ່ນໃຫມ່ຂອງອາຟິກາຄິດວິທີການສ້າງປັນຍາປະດິດ (AI) ເພື່ອປັບປຸງສາທາລະນະສຸກໃນທະວີບອາຟິກາ

ກ່ອນໜ້ານີ້ ລາວປະກາດເມື່ອເດືອນທີ່ແລ້ວວ່າ ລາວຈະບໍລິຈາກຊັບສິນມະຫາສານຂອງລາວຮ້ອຍລະ 99 ພາຍໃນປີ 2045 ຊຶ່ງເປັນຊ່ວງເວລາທີ່ມູນນິທິຂອງລາວວາງແຜນຈະຢຸດເຊົາການດຳເນີນງານ

ລາວກ່າວໃນການຖະແຫຼງການ ທີ່ສຳນັກງານໃຫຍ່ຂອງສະຫະພາບອາຟິກາ ຫຼື ເອຢູວ່າ ເມື່ອບໍ່ດົນມານີ້ ລາວໄດ້ໃຫ້ຄຳໝັ້ນວ່າຈະມອບຊັບສົມບັດຂອງຕົນໃຫ້ຜູ້ອື່ນຕະຫຼອດ 20 ປີຂ້າງໜ້າ ໂດຍເງິນສ່ວນໃຫຍ່ຈະຖືກນຳໄປໃຊ້ເພື່ອຊ່ວຍເຫຼືອຜູ້ຄົນໃນການແກ້ໄຂບັນຫາຄວາມທ້າທາຍຕ່າງໆ ໃນອາຟິກາ

ດ້ານກາຊາ ມາເຊນ ອະດີດສະຕີໝາຍເລກໜຶ່ງຂອງໂມຊຳບິກ ສະແດງຄວາມຍິນດີຕໍ່ຄຳປະກາດຂອງບິລເກດ ໂດຍລະບຸວ່າ ການປະກາດດັ່ງກ່າວເກີດຂຶ້ນໃນ “ຊ່ວງເວລາແຫ່ງວິກິດ” ເຮົາຫວັງວ່າບິລເກດຈະມຸ່ງໝັ້ນຢ່າງແນ່ວແນ່ທີ່ຈະເດີນເທິງເສັ້ນທາງແຫ່ງການປ່ຽນແປງນີ້ຄຽງຂ້າງເຮົາຕໍ່ໄປ

ທັງນີ້ ລັດຖະບານສະຫະລັດໄດ້ຕັດການຊ່ວຍເຫຼືອຕໍ່ອາຟິກາ ລວມເຖິງໂຄງການຮັກສາຜູ້ປ່ວຍຕິດເຊື້ອເອັສໄອວີ/ເອດ ຊຶ່ງເປັນສ່ວນໜຶ່ງຂອງນະໂຍບາຍ “ອາເມຣິກາຕ້ອງມາກ່ອນ” ຫຼື America First ຂອງປະທານາທິບໍດີໂດນາລດ໌ ທຣຳ ຊຶ່ງເພີ່ມຄວາມກັງວົນກ່ຽວກັບອະນາຄົດຂອງລະບົບສາທາລະນະສຸກໃນທະວີບອາຟິກາ

ບິລເກດ ບອກວ່າ ມູນນິທິຂອງເຂົາ ຊຶ່ງມີປະຫວັດການດຳເນີນງານມາຍາວນານໃນອາຟິກາ ຈະມຸ່ງເນັ້ນໄປທີ່ການປັບປຸງລະບົບດູແລສຸຂະພາບຂັ້ນພື້ນຖານ

ສະແດງຄຳຄິດເຫັນ