ນັກວິໄຈໃນຍີ່ປຸ່ນພັດທະນາພລາສຕິກທີ່ສາມາດລະລາຍໃນນ້ຳທະເລໄດ້ພາຍໃນບໍ່ເທົ່າໃດຊົ່ວໂມງ ຫວັງເປັນອີກໜຶ່ງແນວທາງແກ້ບັນຫາມົນລະພິດຈາກຂີ້ເຫຍື້ອພລາສຕິກທີ່ລອຍໃນທະເລ ລວມເຖິງບັນຫາຂີ້ເຫຍື້ອພລາສຕິກທີ່ຖືກພັດພາລົງສູ່ແຫຼ່ງນ້ຳເນື່ອງຈາກໄພທຳມະຊາດ ຈົນກາຍເປັນມົນລະພິດຕໍ່ມະຫາສະຫມຸດ ແລະ ເປັນອັນຕະລາຍຕໍ່ສິ່ງມີຊີວິດ

ພລາສຕິກຊະນິດໃໝ່ຊຶ່ງພັດທະນາຮ່ວມກັນໂດຍມະຫາວິທະຍາໄລໂຕກຽວ ນີ້ມີຄວາມແຂງແຮງທຽບເທົ່າພລາສຕິກທີ່ເຮັດຈາກປິໂຕຣລຽມທົ່ວໄປ ໂດຍຜະລິດຂຶ້ນຈາກການຜະສົມ ໄອໂອນິກໂມໂນເມີ (ionic monomers) ຫຼື ໂມເລກຸນດຽວທີ່ມີປະຈຸໄຟຟ້າ ສອງຊະນິດປະສົມກັນ ເພື່ອສ້າງພັນທະທີ່ເຮັດໃຫ້ໄດ້ພລາສຕິກທີ່ທັງແຂງແຮງ ແລະ ຍືດຫຍຸ່ນ

ຢ່າງໃດກໍຕາມ ເມື່ອພລາສຕິກທີ່ພັດທະນາຂຶ້ນໃໝ່ນີ້ ສຳຜັດກັບເກືອ ແລະ ອິເລັກໂທຣໄລທ໌ (Electrolytes) ຫຼື ສານລະລາຍທີ່ນຳໄຟຟ້າໄດ້ຕົວອື່ນໆ ໃນນ້ຳທະເລ ກໍຈະເຮັດໃຫ້ພລາສຕິກສະຫຼາຍຕົວເປັນໂມໂນເມີດັ້ງເດີມ ຊຶ່ງແບັກທີເລຍສາມາດຍ່ອຍສະຫຼາຍໄດ້ ລວມເຖິງພລາສຕິກທີ່ພັດທະນາໃໝ່ນີ້ ຍັງບໍ່ເປັນພິດ ແລະ ບໍ່ຕິດໄຟອີກດ້ວຍ

ທີມວິໄຈລະບຸວ່າ ເມື່ອທົດລອງນຳພລາສຕິກ ໄປໃສ່ໃນສານລະລາຍນ້ຳທີ່ມີຄວາມເຂັ້ມຂຸ່ນຂອງເກືອເທົ່າກັບນ້ຳທະເລ ພລາສຕິກຈະລະລາຍຢ່າງໄວວາ ໃນເວລາປະມານ 2 ເຖິງ 3 ຊົ່ວໂມງ ຂຶ້ນຢູ່ກັບຄວາມໜາ ແລະ ຂະໜາດ ແລະ ຍັງບໍ່ຖິ້ມມໂຄຣພລາສຕິກທີ່ເປັນອັນຕະລາຍໄວ້ ຊຶ່ງທ້າຍທີ່ສຸດແລ້ວຈະກາຍເປັນມົນລະພິດຕໍ່ມະຫາສະຫມຸດ

ມີຂໍ້ມູນຈາກໂຄງການສິ່ງແວດລ້ອມແຫ່ງສະຫະປະຊາຊາດ ທີ່ຄາດການວ່າມົນລະພິດຈາກພລາສຕິກຈະເພີ່ມຂຶ້ນເປັນສາມເທົ່າພາຍໃນປີ 2040

ໂດຍຈະເພີ່ມຂີ້ເຫຍື້ອລົງສູ່ມະຫາສະຫມຸດທົ່ວໂລກປີລະ 23-37 ລ້ານເມຕຣິກຕັນ ແລະ ໃນປີ 2020 ຈະມີໄມໂຄຣພລາສຕິກທີ່ມີຂະໜາດນ້ອຍກວ່າ 5 ມິນລິແມັດຊຶມເຂົ້າສູ່ສິ່ງແວດລ້ອມອີກປະມານ 2.7 ລ້ານເມຕຣິກຕັນ

ນອກຈາກນີ້ບັນຫາຂີ້ເຫຍື້ອພລາສຕິກ ລວມເຖິງໄມໂຄຣພລາສຕິກ ຍັງກໍ່ຄວາມເສຍຫາຍບໍ່ແມ່ນສະເພາະກັບສິ່ງມີຊີວິດໃນທະເລເທົ່ານັ້ນ ແຕ່ຍັງລວມເຖິງຮ່າງກາຍມະນຸດດ້ວຍ

ຫຼັງຈາກທີ່ນັກວິໄຈພົບຊິ້ນສ່ວນນ້ອຍໆ ຂອງພລາສຕິກຊະນິດນີ້ໃນຄວາມເຂັ້ມຂຸ່ນທີ່ແຕກຕ່າງກັນໃນສະໝອງຂອງມະນຸດ ເພດານຫຼອດເລືອດແດງ ແລະ ອະໄວຍະວະອື່ນໆ

ດ້ວຍເຫດນີ້ນັກວິທະຍາສາດທົ່ວໂລກຈຶ່ງຕ້ອງເລັ່ງມືພັດທະນາຜົນງານ ເພື່ອຮັບມືກັບວິກິດຂີ້ເຫຍື້ອພລາສຕິກທີ່ເພີ່ມຫຼາຍຂຶ້ນ ເຊັ່ນດຽວກັບທີມວິໄຈໃນຍີ່ປຸ່ນ ທີ່ເຖິງແມ່ນຕອນນີ້ຈະຍັງບໍ່ເປີດເຜີຍແຜນການນຳໄປໃຊ້ໃນເຊີງການຄ້າ ແຕ່ງານວິໄຈຂອງພວກເຂົາໄດ້ຮັບຄວາມສົນໃຈຢ່າງຫຼາຍ ລວມເຖິງຈາກອຸດສາຫະກຳດ້ານການບັນຈຸພັນ ຕ່າງໆ ດ້ວຍ

ສະແດງຄຳຄິດເຫັນ