ທີມນັກວິທະຍາສາດຂອງຈີນເປີດຕົວການຜ່າຕັດຝັງ “ຈໍປະສາດຕາທຽມ” ແບບໃໝ່ ຊຶ່ງນອກຈາກອາດຟື້ນຟູການມອງເຫັນໃຫ້ຜູ້ພິການທາງສາຍຕາ ຍັງອາດເພີ່ມຄວາມສາມາດມອງເຫັນແສງອິນຟຣາເຣດທີ່ຢູ່ນອກເໜືອຂອບເຂດການມອງເຫັນຂອງມະນຸດປົກກະຕິທົ່ວໄປອີກດ້ວຍ

 

ຜົນການສຶກສາຈາກວາລະສານໄຊເອນ (Science) ເມື່ອວັນສຸກ (6 ມິຖຸນາ) ລະບຸວິທີການທີ່ເສັ້ນໄຍນາໂນເທລລູລ້ຽມ (tellurium nanowire) ທີ່ບາງເປັນພິເສດສາມາດທົດແທນເຊລຮັບແສງທີ່ເສຍຫາຍໃນດວງຕາຂອງຫນູທົດລອງຕາບອດ ແລະ ແປງຄື່ນແສງໃກ້ອິນຟຣາເຣດເປັນສັນຍານໄຟຟ້າທີ່ສະໝອງຂອງລິງແມັກແຄກສາມາດຕີຄວາມເປັນພາບທີ່ເບິ່ງເຫັນໄດ້

 

ຄວາມເປັນໄປໄດ້ ແລະ ແນວໂນ້ມຄວາມປອດໄພສູງຂອງເທັກໂນໂລຊີໃໝ່ຖືເປັນຄວາມຫມາຍສຳຄັນໃນການພັດທະນາການ້ບິ່ງເຫັນທຽມ ຊຶ່ງອາດເປັນປະໂຫຍດຢ່າງຍິ່ງຕໍ່ຜູ້ປ່ວຍທີ່ສູນເສຍການເບິ່ງເຫັນ ຫຼື ປ່ວຍພະຍາດຈໍປະສາດຕາ 200 ລ້ານຄົນທົ່ວໂລກ

 

ທີມນັກວິໄຈຈາກນະຄອນຊຽງໄຮ້ໄດ້ທົດສອບອຸປະກອນກັບຫນູທົດລອງຕາບອດ ຊຶ່ງກັບມາມີປະຕິກິລິຍາຕອບສະໜອງໃນຮູໝານຕາ ແລະ ກະຕຸ້ນການເຮັດວຽກຂອງເຊລປະສາດໃນເປືອກສະໝອງສ່ວນການເຫັນ ເຮັດໃຫ້ພວກມັນສາມາດເຮັດແບບທົດສອບຈຳແນກຮູບແບບການເບິ່ງເຫັນໄດ້ມີປະສິດທິພາບເກືອບທຽບເທົ່າກັບຫນູປົກກະຕິ

 

ນອກຈາກນັ້ນມີການຝັງອຸປະກອນດັ່ງກ່າວໃນລິງແມັກແຄກສຳເລັດ ຊຶ່ງສະທ້ອນວ່າອຸປະກອນດັ່ງກ່າວມີຄວາມປອດໄພ ແລະ ຄວາມສາມາດໃນການກວດຈັບຄື້ນແສງໃກ້ອິນຟຣາເຣດລະຍະ 1,550 ນາໂນແມັດ

 

ສຳລັບຜູ້ປ່ວຍພະຍາດຕາຂັ້ນຮຸນແຮງ ເຊັ່ນ: ພະຍາດຈຸດພາບຊັດເສື່ອມ ການເບິ່ງເຫັນແສງອິນຟຣາເຣດອາດຊ່ວຍໃຫ້ເຫັນໃນທີ່ແສງນ້ອຍ ແລະ ມືດຕາມຫຼັກການ ໂດຍອຸປະກອນດັ່ງກ່າວອາດເປັນປະໂຫຍດຢ່າງຫຼາຍໃນສະພາບແສງນ້ອຍ

 

ຈາງເຈຍອີ ຈາກມະຫາວິທະຍາໄລຟູ່ຕັ້ນ ຊຶ່ງເປັນໜຶ່ງໃນນັກວິໄຈຫຼັກ ກ່າວວ່າເສັ້ນໄຍນາໂນມີຄວາມບາງທີ່ສຸດ ມັນບາງກວ່າເຊລຮັບແສງທຽມຮຸ່ນກ່ອນໜ້າປະມານ 10 ເທົ່າ ເຮັດໃຫ້ປູກຖ່າຍໄດ້ງ່າຍຂຶ້ນ ແລະ ເຂົ້າກັນກັບໂຄງສ້າງທີ່ບອບບາງຂອງດວງຕາໄດ້ດີກວ່າ

 

ການປູກຖ່າຍຈໍປະສາດຕາທຽມນີ້ອາດເປັນຕົວປ່ຽນເກມດ້ວຍເປັນຂັ້ນຕອນດຽວທີ່ມີການຮຸກຮານເຂົ້າສູ່ຮ່າງກາຍນ້ອຍທີ່ສຸດ ແລະ ສາມາດຟື້ນຄືນກັບສູ່ສະພາບເດີມໄດ້ ທັງຍັງຊ່ວຍຟື້ນຄືນການເບິ່ງເຫັນຕາມທຳມະຊາດໂດຍບໍ່ຕ້ອງໃສ່ແວ່ນຕາທີ່ໜາ ຫຼື ຊາກໄຟເລື້ອຍໆ

 

ທີມນັກວິໄຈໄດ້ອອກແບບເສັ້ນໄຍນາໂນສຳລັບຈໍປະສາດຕາໂດຍໃຊ້ເທລລູລຽມ ຊຶ່ງເປັນທາດທີ່ມີຄວາມໄວຕໍ່ແສງສີຂາວເງີນທີ່ໃຊ້ເປັນສານກຶ່ງຕົວນຳ (semiconductor) ແລະ ສານເຂົ້າກັນຈົນກາຍເປັນໂຄງຂ່າຍຕາຂ່າຍແບບປູກຖ່າຍໄດ້ ໂດຍແມດທີຍ ມາໂຣໂຊ ບັນນາທິການວາລະສານ ຊີ້ວ່າອຸປະກອນດັ່ງກ່າວສະແດງຄວາມເຂົ້າກັນໄດ້ທາງຊີວະພາບທີ່ດີ ແລະ ບໍ່ຈຳເປັນຕ້ອງໃຊ້ແຫຼ່ງຈ່າຍໄຟພາຍນອກ

 

ຄະນະນັກວິໄຈ ລະບຸວ່າການສຶກສາກັບສັດທີ່ປະສົບຄວາມສຳເລັດຄັ້ງນີ້ຈະປູທາງສູ່ການທົດລອງກັບມະນຸດໃນອະນາຄົດ ແລະ ຍັງສະເໜີແນວທາງທີ່ປອດໄພ ມີປະສິດທິພາບຫຼາຍກວ່າ ແລະ ຄອບຄຸມກວ່າເທັກໂນໂລຊີທີ່ມີຢູ່ໃນປັດຈຸບັນ

 

ມາໂຣໂຊ ຍັງເວົ້າອີກວ່າອຸປະກອນດັ່ງກ່າວອາດຊ່ວຍປັບປຸງປະສິດທິພາບຂອງອຸປະກອນຈໍປະສາດຕາທຽມທີ່ຊ່ວຍຟື້ນຟູການເບິ່ງເຫັນໃຫ້ຜູ້ພິການທາງສາຍຕາ ແລະ ຜູ້ມີບັນຫາການເບິ່ງເຫັນຢ່າງມີໄລຍະສຳຄັນ

ສະແດງຄຳຄິດເຫັນ