ສະຫະລັດ ແລະ ຈີນ ບັນລຸ “ກອບການເຮັດວຽກ” (Framework) ຮ່ວມກັນ ເພື່ອຫຼຸດຄວາມຕຶງຄຽດທາງການຄ້າລະຫວ່າງ 2 ມະຫາອຳນາດທາງເສດຖະກິດທີ່ໃຫຍ່ທີ່ສຸດໃນໂລກແລ້ວ

ຫຼັງຈາກການເຈລະຈາລະຫວ່າງຜູ້ແທນລະດັບສູງຂອງສະຫະລັດ ແລະ ຈີນ ໃນຮອບ 2 ທີ່ກຸງລອນດອນ ຊຶ່ງໃຊ້ເວລາການເຈລະຈາທັງໝົດ 2 ວັນ ສຳເລັດລົງມື້ວານນີ້ (10 ມິຖຸນາ) ແລະ ໃນຂັ້ນຕອນຕໍ່ໄປແມ່ນການສົ່ງມອບແຜນທີ່ ທີ່ໄດ້ຕົກລົງຮ່ວມກັນໄປຍັງປະທານາທິບໍດີຂອງທັງ 2 ຝ່າຍ ຄື “ທຣຳ” ແລະ “ສີ ຈິ້ນຜິງ” ໃຫ້ມີການລົງນາມອະນຸມັດຢ່າງເປັນທາງການ

ຮາວເວີດ ລຸດນິກ ລັດຖະມົນຕີກະຊວງການຄ້າສະຫະລັດ ກ່າວວ່າຂໍ້ຕົກລົງນີ້ຄວນຄອບຄຸມ ເຖິງຂໍ້ຈຳກັດກ່ຽວກັບແຮ່ທາດຫາຍາກ ຫຼື ແຣຣ໌ເອີດ (rare earth) ທີ່ເປັນໜຶ່ງປະເດັນສຳຄັນທີ່ມີການປຶກສາຫາລືໃນທີ່ປະຊຸມ

ລຸດນິກກ່າວດ້ວຍວ່າທັງ 2 ປະເທດໄດ້ບັນລຸກອບການເຮັດວຽກທີ່ເປັນໄປຕາມຂໍ້ຕົກລົງຮ່ວມກັນໃນການປະຊຸມທີ່ນະຄອນເຈນີວາ ແລະ ເມື່ອປະທານາທິບໍດີລົງນາມອະນຸມັດແລ້ວ ການດຳເນີນງານຕ່າງໆກໍຈະເປັນໄປຕາມຂໍ້ຕົກລົງ

ເຊັ່ນດຽວກັບ ຫລີ່ ເຊີງກັງ ລັດຖະມົນຕີຊ່ວຍວ່າການກະຊວງການຄ້າຂອງຈີນ ທີ່ກ່າວວ່າ ຜົນການຫາລື ໂດຍຫຼັກການແລ້ວສາມາດບັນລຸກອບການເຮັດວຽກຕາມຂໍ້ຕົກລົງຮ່ວມກັນຂອງຜູ້ນຳທັງ 2 ຝ່າຍ ທີ່ໄດ້ມີການສົນທະນາທາງໂທລະສັບເມື່ອວັນທີ່ 5 ມິຖຸນາ ຊຶ່ງການຫາລືທາງໂທລະສັບຂອງທຣຳ ແລະ ສີ ຈິ້ນຜິງ ໃນຄັ້ງນັ້ນ ທຣຳບອະທິບາຍວ່າມັນເປັນການສົນທະນາທີ່ຍອດຢ້ຽມ

ເຖິງຢ່າງໃດກໍ່ຕາມ ເດືອນທີ່ຜ່ານມາສະຫະລັດ ແລະ ຈີນ ບັນລຸຂໍ້ຕົກລົງທີ່ຈະຢຸດສົງຄາມພາສີ ຕອບໂຕ້ລະຫວ່າງກັນຊົ່ວຄາວ ແຕ່ໃນເວລາຕໍ່ມາທັງສອງຝ່າຍ ຕ່າງກ່າວຫາກັນໄປມາວ່າອີກຝ່າຍລະເມີດຂໍ້ຕົກລົງ

ໂດຍສະຫະລັດກ່າວຫາວ່າຈີນປ່ອຍການສົ່ງອອກແຮ່ທາດຫາຍາກຢ່າງຊ້າໆ ຊຶ່ງສົ່ງຜົນກະທົບຕໍ່ການຜະລິດອຸປະກອນອີເລັກໂທຣນິກຫຼາກຫຼາຍຊະນິດ ຕັ້ງແຕ່ສະມາດໂຟນໄປຈົນເຖິງລົດຍົໄຟຟ້າ ເຮັດໃຫ້ສະຫະລັດຕ້ອງຕອບໂຕ້ດ້ວຍການຈຳກັດການເຂົ້າເຖິງສິນຄ້າສະຫະລັດຂອງຈີນ ທັງສານກຶ່ງຕົວນຳ ຫຼື ເຊມິຄອນດັກເຕີ ລວມໄປເຖິງສິນຄ້າເທັກໂນໂລຍີອື່ນທີ່ກ່ຽວຂ້ອງກັບປັນຍາປະດິດ (AI) ດ້ວຍ

ໃນຂະນະທີ່ຈີນກ່າວວ່າສະຫະລັດເປັນຝ່າຍລະເມີດຂໍ້ຕົກລົງທັງການຢຸດຂາຍຊອບແວຣ໌ອອກແບບຊິບຄອມພິວເຕີໃຫ້ກັບບໍລິສັດຈີນ ລວມເຖິງການເຕືອນບໍ່ໃຫ້ໃຊ້ຊິບທີ່ຜະລິດໂດຍ “ຫົວເວ່ຍ” (Huawei) ແລະ ຍັງເກີດກໍລະນີທີ່ລັດຖະບານສະຫະລັດສັ່ງຍົກເລີກວີຊ່າສຳລັບນັກສຶກສາຊາວຈີນດ້ວຍ

ຈຶ່ງເຮັດໃຫ້ບັນຍາກາດຄວາມສຳພັນຂອງຈີນ ແລະ ສະຫະລັດໃນຊ່ວງອາທິດທີ່ຜ່ານມາເຄັ່ງຄຽດ ແຕ່ກໍຍັງສາມາດກັຍມາເຈລະຈາກັນໄດ້ ແລະ ບັນລຸກອບການເຮັດວຽກໄດ້ໃນທີ່ສຸດ

ສະແດງຄຳຄິດເຫັນ