ໂດຍອີງຕາມ ຂໍ້ຕົກລົງຂອງລັດຖະມົນຕີກະຊວງ ປ້ອງກັນຄວາມສະຫງົບ ວ່າດ້ວຍການຈັດຕັ້ງ ແລະ ການເຄື່ອນໄຫວຂອງກອງບັນຊາການ ປກສ ແຂວງອຸດົມໄຊ ເລກທີ 277/ຈຂ ອຊ, ລົງວັນທີ 16 ສິງຫາ 2022, ຄຳສັ່ງຂອງທ່ານເຈົ້າແຂວງອຸດົມໄຊ ເລກທີ 277/ຈຂ ອຊ, ລົງວັນ 03 ເມສາ 2019 ວ່າດ້ວຍການເພີ່ມທະວີວຽກງານສະກັດກັ້ນ ແລະ ແກ້ໄຂສະພາບປະກົດການຫຍໍ້ທໍ້ພາຍໃນແຂວງ,

ຂໍ້ຕົກລົງຂອງກອງບັນຊາການ ປກສ ແຂວງ ວ່າດ້ວຍການແຕ່ງຕັ້ງຄະນະຮັບຜິດຊອບ ສະເພາະກິດລົງແກ້ໄຂບັນດາຮ້ານກິນດື່ມທີ່ມີສາວບໍລິການ, ຕູ້ເກມໄຟຟ້າ ຢູ່ບ້ານກິວຈະລຸ ເມືອງໄຊ ແລະ ບ້ານໝາກຈຸກ ເມືອງນາໝໍ້ ແຂວງອຸດົມໄຊ.

ດັ່ງນັ້ນ ໃນລະຫວ່າງວັນທີ 4-5 ມີຖຸນາ 2025 ທາງຄະນະຮັບຜິດຊອບຊີ້ນຳຈຸສະເພາະກິດ ກອງບັນຊາການ ປກສ ແຂວງອຸດົມໄຊ ໄດ້ລົງເຄື່ອນໄຫວກວດກາຄືນບັນດາຫ້າງຮ້ານທີ່ແອບແຝງມີສາວບໍລິການ ແລະ ເຄີຍສຶກສາອົບຮົມມາແລ້ວວ່າມີການຢຸດເຊົາຫຼືບໍ່, ແຕ່ຜ່ານການຕິດຕາມກວດກາຄືນເຫັນວ່າ ສ່ວນຫຼາຍແມ່ນຍັງບໍ່ຢຸດເຊົາ

ໃນນັ້ນມີຈຳນວນ 02 ຈຸດຄື: ບ້ານກີວຈະລຸ ເມືອງໄຊ ແລະ ບ້ານໝາກຈຸກ ເມືອງນາໝໍ້ ແຂວງອຸດົມໄຊ, ບ້ານກີວຈະລຸ ມີ 03 ຮ້ານ, ສາວບໍລິການ 14 ຄົນ ແລະ ບ້ານໝາກຈຸກ ມີ 05 ຮ້ານ, ມີສາວບໍລິການ 25 ຄົນ, ມີລັກສະນະປ່ຽນຮູບການໃໝ່ໄປເລື້ອຍໆ;

ເຊິ່ງຜ່ານການສືບສວນ-ສອບສວນ ພວກກ່ຽວໄດ້ໃຫ້ການຮັບສາລະພາບວ່າ: ໄດ້ເຊົ່າສະຖານທີ່ເພື່ອເປີດຮ້ານອາຫານ, ຮ້ານກິນດື່ມແລ້ວຮັບເອົາສາວບໍລິການ, ບາງຄົນກໍສະໝັກໃຈມາຢູ່ເອງ, ສາວບໍລິການສ່ວນຫຼາຍແມ່ນມາແຕ່ຕ່າງເມືອງ, ຕ່າງແຂວງ,

ສາວບໍລິການເຂົ້າມາຮ້ານແມ່ນຈະບໍ່ມີເງິນເດືອນໃຫ້ ເຊິ່ງຍິງສາວດັ່ງກ່າວຈະອາໄສສະຖານທີ່ຂອງຮ້ານເປັນບ່ອນພົວພັນ ແລະ ຄ້າຂາຍປະເວນີ, ເວລາມີແຂກເຂົ້າມາໃຊ້ບໍລິການແມ່ນອາໄສສະຖານທີ່ພັກເຊົາເປັນການຊົ່ວຄາວ, ບາງຄັ້ງກໍໄປໃຊ້ບໍລິການທາງນອກ, ສ່ວນເຈົ້າຂອງຮ້ານແມ່ນຈະເກັບຄ່າບໍລິການຊົ່ວຄາວແມ່ນ 100,000 ກີບຕໍ່ຄັ້ງ, ຖ້າເປັນຄ້າງຄືນແມ່ນ 300,000 ກີບຕໍ່ຄັ້ງຕໍ່ຄົນ.

ຕໍໍ່ກັບເຈົ້າຂອງຮ້ານກິນດື່ມດັ່ງກ່າວ ທາງເຈົ້າໜ້າທີ່ແມ່ນໄດ້ສືກສາອົບຮົມ ແລະ ປັບໄໝຕາມລະ ບຽບກົດໝາຍ, ສ່ວນສາວບໍລິການແມ່ນໄດ້ສືກສາອົບຮົມ ແລ້ວມອບໃຫ້ເຈົ້າຂອງຮ້ານສົ່ງກັບບ້ານໃຫ້ຜູ້ປົກຄອງສືບຕໍ່ສືກສາອົບຮົມຕໍ່ໄປ.

ໃນໂອກາດນີ້ ທາງເຈົ້າໜ້າທີຄະນະຮັບຜິດຊອບຊີ້ນຳສະເພາະກິດ ກອງບັນຊາການ ປກສ ແຂວງອຸດົມໄຊ ໄດ້ຮຽກຮ້ອງມາຍັງບັນດາພໍ່ແມ່ປະຊາຊົນບັນດາເຜົ່າ, ຊາວຕ່າງປະເທດ ທີ່ມາດໍາລົງຊິວິດປະກອບອາຊີບດໍາເນີນທຸລະກິດ, ຄ້າຂາຍຢູ່ໃນແຂວງອຸດົມໄຊ

ຈົ່ງເພີ່ມທະວີເອົາໃຈໃສ່ປະຕິບັດໃຫ້ຖືກ ຕ້ອງຕາມລະບຽບກົດໝາຍຢ່າງເຂັ້ມງວດ ແລະ ຮຽກຮ້ອງໃຫ້ບັນດາຊາຍໜຸ່ມ, ຍິງສາວທີ່ມາຈາກຕ່າງແຂວງ, ນັບທັງຕົວເມືອງ ທີ່ມີຈຸດປະສົງຊອກວຽກເຮັດງານທໍາ ຈົ່ງມີສະຕິເຄົາລົບກົດໝາຍ ແລະ ຮີດຄອງປະເພນີອັນດີງາມຂອງຊາດລາວ ບໍ່ດັ່ງນັ້ນຈະຕົກເປັນເຫຍື່ອຂອງການຄ້າມະນຸດ ຫຼື ຄ້າໂສເພນີ.

ຂ່າວ: ປກສ ແຂວງອຸດົມໄຊ

ສະແດງຄຳຄິດເຫັນ