ເມື່ອວັນທີ 11 ມິຖຸນາທີ່ຜ່ານມາ ໄດ້ເກີດໄຟໄໝ້ໃຫຍ່ໃກ້ກັບຕະຫຼາດຄອມພິວເຕີຊື່ຊຽວຜູ່ ໃນເຂດຈິ່ວຫລົງປໍ ເມືອງຊົງຊິ່ງ ໂດຍພົບວ່າຈຸດເກີດເຫດເປັນສະຖານທີ່ຈອດລົດຈັກໄຟຟ້າ ເຮັດໃຫ້ລົດໄດ້ຮັບຄວາມເສຍຫາຍຈຳນວນຫຼາຍ

ໄຟໄໝ້ເກີດຂຶ້ນໃນຊ່ວງທ່ຽງຂອງວັນທີ 11 ມິຖຸນາ ຕາມເວລາທ້ອງຖິ່ນ ທີ່ບໍລິເວນທີ່ຈອດລົດຈັກນອກຕະຫຼາດຄອມພິວເຕີຊື່ຊຽວຜູ່ ໄຟໄໝ້ໄດ້ລຸກລາມຢ່າງວ່ອງໄວຈົນມີຂະໜາດໃຫຍ່ ສົ່ງຜົນໃຫ້ເກີດກຸ່ມຄວັນຫນາທຶບ ແລະ ມີສຽງລະເບີດດັງສະນັ່ນເປັນລະຍະໆ

ໄຟໄໝ້ລຸກລາມໄປຍັງລົດຈັກຫຼາຍຄັນທີ່ຈອດຢູ່ຕິດກັນຢ່າງວ່ອງໄວ ກ່ອນທີ່ລົດດັບເພີງຈະມາຮອດ ແລະ ສາມາດຄວບຄຸມໄຟໄດ້ໃນເວລາຕໍ່ມາ ຕາມລາຍງານຂອງໜ່ວຍດັບເພີງ ແລະ ກູ້ໄພເຂດຈິ່ວຫລົງປໍ ລະບຸວ່າໄດ້ຈັດການຈຸດເກີດເຫດແລ້ວ ແລະ ບໍ່ມີຜູ້ໄດ້ຮັບບາດເຈັບ ສ່ວນສາເຫດທີ່ຊັດເຈນຂອງໄຟໄໝ້ ແລະ ຄວາມເສຍຫານຂອງຊັບສິນຍັງຢູ່ລະຫວ່າງການສອບສວນ

ແຫຼ່ງຂ່າວສ່ວນໃຫຍ່ລະບຸວ່າໄຟໄໝ້ເກີດຈາກລົດຈັກໄຟຟ້າທີ່ເກີດໄຟໄໝ້ ພະຍານບາງຄົນກ່າວວ່າລົດຈັກອາດໄຟໄໝ້ເນື່ອງຈາກແບັດເຕີຣີຂັດຂ້ອງ ຫຼື ກຳລັງຊາກແບັດ ແຕ່ລາຍລະອຽດຍັງບໍ່ຊັດເຈນ ນອກຈາກນີ້ຍັງມີຂ່າວລືວ່າລົດຈັກໄຟຟ້າຜ່ານການດັດແປງ ຫຼື ແບັດເຕີຣີຂອງລົດ ເປັນສາເຫດຂອງໄຟໄໝ້ ແຕ່ຍັງບໍ່ໄດ້ຮັບການຢືນຢັນຢ່າງເປັນທາງການ

ທັງນີ້ ບ່ອນຈອດລົດດັ່ງກ່າວເປັນແບບເປີດໂລ່ງ ແລະ ໄຟໄໝ້ບໍ່ລຸກລາມໄປຍັງຕົວອາຄານຫຼັກ ວິດີໂອທີ່ເຜີຍແຜ່ທາງອອນລາຍສະແດງ ໃຫ້ເຫັນຜູ້ຄົນຈຳນວນຫຼາຍທີ່ຫຼົບຫນີລົງມາຈາກຂັນໄດຫນີໄຟ ແຕ່ບໍ່ໄດ້ສົ່ງຜົນກະທົບຕໍ່ການກູ້ໄພໂດຍລວມ

ເນື່ອງຈາກເຂດທຸລະກິດຊື່ຊຽວຜູ່ ມີປະຊາກອນຫນາແໜ້ນ ແລະ ເປັນພື້ນທີ່ຫຼັກຂອງອຸດສາຫະກຳໄອທີຂອງເມືອງຊົງຊິ່ງ ເຫດການດັ່ງກ່າວຈຶ່ງລິເລີ່ມໃຫ້ເກີດການອະພິປາຍກ່ຽວກັບການຈັດການບ່ອນຈອດລົດ ແລະ ສິ່ງອຳນວຍຄວາມສະດວກ

ສຳລັບການດັບໄຟຂອງລົດໄຟຟ້າ ແລະ ລົດຈັກ ທັງລັດຖະບານ ແລະ ປະຊາຊົນຮຽກຮ້ອງໃຫ້ມີການເສີມສ້າງການປ້ອງກັນອັກຄີ ພາຍໃນສະພາບອາກາດຮ້ອນ ແລະ ຫຼີກເວັ້ນການດັດແປງແບັດເຕີຣີໂດຍບໍ່ໄດ້ຮັບອະນຸຍາດ ຫຼື ການຈອດລົດຜິດກົດໝາຍ

ເຂດທຸລະກິດຊື່ຊຽວຜູ່ ເປັນໜຶ່ງໃນ 6 ເຂດທຸລະກິດໃນເມືອງຊົງຊິ່ງ ຊຶ່ງລວບລວມຕະຫຼາດດິຈິຕອລຂະໜາດໃຫຍ່ ແລະ ມີຜູ້ຄົນຫຼັ່ງໄຫຼເຂົ້າມາເປັນຈຳນວນຫຼາຍທຸກມື້ ເຖິງແມ່ນວ່າໄຟໄໝ້ຈະບໍ່ກໍ່ໃຫ້ເກີດຄວາມສູນເສຍຄັ້ງໃຫຍ່ ແຕ່ຄວາມສ່ຽງຕໍ່ຄວາມປອດໄພຈາກອັກຄີໄພ ອາດສົ່ງຜົນກະທົບຕໍ່ນະໂຍບາຍການຈັດການລະດັບພູມິພາກໃນພາຍຫຼັງ

ສະແດງຄຳຄິດເຫັນ