ເກົາຫຼີເໜືອກຽມສົ່ງທະຫານຫຼາຍພັນຄົນໄປຣັດເຊຍ ອ້າງວ່າເພື່ອຊ່ວຍເຫຼືອໃນການຟື້ນຟູແຄວ້ນຄູສຄ໌ທີ່ໄດ້ຮັບຄວາມເສຍຫາຍຈາກການຕໍ່ສູ້ກັບຢູເຄຣນ

ສຳນັກຂ່າວຕ່າງປະເທດລາຍງານວ່າ ທ່ານ ເຊີເກ ຊອຍກູ ເລຂາທິການສະພາຄວາມໝັ້ນຄົງແຫ່ງຣັດເຊຍ ເປີດເຜີຍໃນວັນພຸດທີ່ 18 ມິຖຸນາ 2025 ວ່າ ເກົາຫຼີເໜືອຈະສົ່ງທະຫານຈຳນວນຫຼາຍພັນຄົນມາຊ່ວຍຣັດເຊຍຟື້ນຟູແຄວ້ນຄູສຄ໌ ຊຶ່ງໄດ້ຮັບຄວາມເສຍຫາຍຈາກການເຮັດສົງຄາມລະຫວ່າງຣັດເຊຍກັບຢູເຄຣນ

ທ່ານຊອຍກູ ເດີນທາງຢ້ຽມກຸງ ປຍງຢາງ ແລະ ໄດ້ສົນທະນາກັບ ທ່ານ ຄິມ ຈອງ-ອຶນ ຜູ້ນຳສູງສຸດຂອງເກົາຫຼີເໜືອເມື່ອວັນອັງຄານທີ່ຜ່ານມາ ໂດຍລາວລະບຸວ່າ ປຍງຢາງຈະສົ່ງກອງທັບສະໜັບສະໜູນການກໍ່ສ້າງກັບທະຫານອີກ 2 ກອງທັບ ຈຳນວນລວມ 5,000 ຄົນ ກັບເຈົ້າໜ້າທີ່ເກັບກູ້ລະເບີດອີກ 1,000 ຄົນ ມາຣັດເຊຍ

“ນີ້ເປັນການຊ່ວຍເຫຼືອມິດຕະພາບຈາກຄົນເກົາຫຼີເໜືອ ແລະ ຜູ້ນຳຄິມ ຈອງ-ອຶນ ຕໍ່ປະເທດຂອງເຮົາ” ທ່ານຊອຍກູກ່າວ ຂະນະທີ່ສຳນັກຂ່າວຂອງເກົາຫຼີເໜືອບອກດ້ວຍວ່າ ທ່ານຄິມກັບທ່ານຊອຍກູຍັງປຶກສາຫາລືກັນເລື່ອງແຜນການລະຍະຍາວອື່ນໆ ດ້ວຍ

ດ້ານປະເທດເພື່ອນບ້ານຂອງເກົາຫຼີເໜືອຢ່າງເກົາຫຼີໃຕ້ ແລະ ຍີ່ປຸ່ນ ອອກມາປະນາມແຜນການດັ່ງກ່າວທັນທີ ໂດຍລັດຖະບານກຸງໂຊລລະບຸວ່າ ແຜນການນີ້ລະເມີດການຄວ່ຳບາດຂອງສະຫະປະຊາຊາດທີ່ບັງຄັບໃຊ້ກັບເກົາຫຼີເໜືອ ທ່າມກາງຄວາມກັງວົນເລື່ອງຄວາມສຳພັນທາງທະຫານທີ່ລຶກລ້ຳຂຶ້ນລະຫວ່າງປຽງຢາງກັບມອສໂກ

ຂະນະທີ່ໂຄສົກກະຊວງຕ່າງປະເທດສະຫະລັດ ບອກກັບສຳນັກຂ່າວຢອນຮັບຂອງເກົາຫຼີໃຕ້ວ່າ ການທີ່ຣັດເຊຍໃຊ້ແຮງງານ ແລະ ທະຫານເກົາຫຼີເໜືອເພື່ອສະໜັບສະໜູນສົງຄາມຂອງພວກເຂົາໃນຢູເຄຣນ ເປັນເລື່ອງທີ່ນ່າກັງວົນຢ່າງຍິ່ງ ໂດຍປຽງຢາງກຳລັງພຶ່ງພາຣັດເຊຍຢ່າງໜັກໃນການຈັດຫາທຶນທີ່ພວກເຂົາຕ້ອງການ ແລກກັບການຈ້າງແຮງງານ ແລະ ທະຫານ

ສະແດງຄຳຄິດເຫັນ