ເອເອຟພີ – ລັດຖະບານທະຫານພະມ້າໄດ້ຈັດພິທີເຜົາທຳລາຍຢາເສບຕິດທີ່ຢຶດໄດ້ມູນຄ່າປະມານ 300 ລ້ານໂດລາໃນມື້ນີ້ 26 ມິຖຸນາ 2025  ແຕ່ເຈົ້າໜ້າທີ່ຕຳຫຼວດລະດັບສູງກ່າວວ່າການຈັບຢຶດຢາເສບຕິດຫຼຸດລົງເນື່ອງຈາກການສູ້ຮົບທະວີຄວາມຮຸນແຮງຫຼາຍຂຶ້ນໃນສົງຄາມກາງເມືອງຂອງປະເທດ

ເມື່ອລັດຖະບານທະຫານເຂົ້າຢຶດອຳນາດໃນການລັດປະຫານປີ 2021 ໄດ້ກໍ່ໃຫ້ເກີດຄວາມຂັດແຍງລະຫວ່າງກອງທັບ ແລະ ຝ່າຍກົງກັນຂ້າມຫຼາຍຝ່າຍ ໂດຍທຸກຝ່າຍຖືກກ່າວຫາວ່ານຳເງິນທີ່ໄດ້ຈາກການເຮັດທຸລະກິດໃນຕະຫຼາດມືດໄປເປັນທຶນໃນການຕໍ່ສູ້

ນັກວິເຄາະກ່າວວ່າການຜະລິດຢາເສບຕິດ ການເຮັດເຫມືອງທີ່ປາດສະຈາກການຄວບຄຸມ ແລະ ສູນກາງຫຼອກລວງອອນລາຍ ລ້ວນຮຸ່ງເຮືອງເຕີບໂຕທ່າມກາງຄວາມວຸ່ນວາຍຕັ້ງແຕ່ລັດຖະບານປະຊາທິປະໄຕຖືກໂຄ່ນລົ້ມ

ກະຊວງພາຍໃນຂອງພະມ້າໄດ້ເຜົາທຳລາຍຢາເສບຕິດທີ່ຢຶດໄດ້ໃນ 3 ແຫ່ງທົ່ວປະເທດໃນມື້ນີ້ ທີ່ຕຳຫຼວດປາບປາມຢາເສບຕິດໃນກຸງເນປີດໍ ລະບຸວ່າມີມູນຄ່າເກືອບ 298 ລ້ານໂດລາ

ຢາເສບຕິດທີ່ຖືກເຜົາທຳລາຍເນື່ອງໃນວັນຕໍ່ຕ້ານຢາເສບຕິດໂລກ ແລະ ການຄ້າຢາເສບຕິດຜິດກົດໝາຍ ມີມູນຄ່າຫຼຸດລົງປະມານ 50 ລ້ານໂດລາຈາກປີກ່ອນ ແລະ ລຸດລົງ 150 ລ້ານໂດລາຈາກຕົວເລກໃນປີ 2023

ເຈົ້າໜ້າທີ່ປາບປາມຢາເສບຕິດລະດັບສູງທີ່ຂໍບໍ່ເປີດເຜີຍຊື່ກ່າວວ່າການສູ້ຮົບໃນຫຼາຍພື້ນທີ່ເປັນສາເຫດຫຼັກທີ່ເຮັດໃຫ້ການປາບປາມການຜະລິດ ແລະ ຄ້າຢາເສບຕິດຍາກລຳບາກຂຶ້ນ

ຕຳຫຼວດເປີດເຜີຍວ່າຢາເສບຕິດທີ່ຖືກເຜົາໃນພິທີທີ່ຈັດຂຶ້ນໃນຢ່າງກຸ້ງ ມັນດະເລ ແລະ ຕົງຢີ ປະກອບດ້ວຍເຮໂຣອີນຫຼາຍກວ່າ 1,700 ກິໂລກາມ ຢາໄອສ໌ 16,000 ກິໂລກາມ ແລະ ຢາບ້າ 281 ລ້ານເມັດ

ລັດຖະບານທະຫານພະມ້າກຳລັງຕໍ່ສູ້ກັບກຸ່ມຕິດອາວຸດຕໍ່ຕ້ານການລັດປະຫານ ແລະ ກຸ່ມຕິດອາວຸດຊົນກຸ່ມນ້ອຍຊາດພັນທີ່ເຄື່ອນໄຫວຢູ່ຕາມຊາຍແດນຂອງປະເທດທີ່ຕະຫຼາດມືດເຟື່ອງຟູ

ລັດຖະມົນຕີກະຊວງພາຍໃນກ່າວໃນຂໍ້ຄວາມທີ່ເຜີຍແພ່ໃນສື່ຂອງລັດວ່າ “ກຸ່ມຕິດອາວຸດຊາດພັນບາງກຸ່ມມີສ່ວນຮ່ວມໃນການຜະລິດແລະຄ້າຢາເສບຕິດ ທີ່ສ້າງລາຍໄດ້ໄດ້ຢ່າງງ່າຍດາຍໂດຍອາໄສປະໂຫຍດຈາກການຂາດສັນຕິພາບແລະສະຖຽນລະພາບ”

ກ່ອນໜ້ານີ້ ນັກວິເຄາະກ່າວວ່າກອງທັບພະມ້າຍັງມີຄວາມເຊື່ອມໂຍງກັບການຜະລິດຢາເສບຕິດທີ່ສ້າງກຳໄລມະຫາສານດ້ວຍ

ສຳນັກງານວ່າດ້ວຍຢາເສບຕິດ ແລະ ອາຊະຍາກຳແຫ່ງສະຫະປະຊາຊາດລະບຸເມື່ອເດືອນທີ່ຜ່ານມາວ່າ ການຢຶດຢາໄອສ໌ໃນເອເຊຍຕາເວັນອອກ ແລະ ເອເຊຍຕາເວັນອອກສຽງໃຕ້ໃນປີ 2024 ເຮັດສະຖິຕິສູງເປັນປະຫວັດສາດ ແລະ ຫົວໜ້າງານຍັງລະບຸວ່າການຢຶດຢາໄອສ໌ທົ່ວທັງປະເທດມີທັງໝົດ 236 ໂຕນໃນປີ 2024  ຊຶ່ງເພີ່ມຂຶ້ນແບບກ້າວກະໂດດເຖິງ 24% ທຽບກັບປີ 2023.

ສະແດງຄຳຄິດເຫັນ