ກອງທັບຈີນພັດທະນາ “ໂດຣນຍຸງ” ໂດຣນສອດແນມຂະໜາດນ້ອຍເທົ່າຍຸງ ພ້ອມປີກທີ່ບາງ ຄວບຄຸມຜ່ານສະມາດໂຟນ ສຳລັບນຳໄປໃຊ້ພາລະກິດລັບ ຫຼື ການສອດແນມໃນສະໜາມຮົບ

 

 

ວັນທີ່ 27 ມິຖຸນາ 2025 ສຳນັກຂ່າວ CCTV ຂອງທາງການຈີນ ລາຍງານວ່າ ກອງທັບຈີນເປີດຕົວ “ໂດຣນຍຸງ” ຊຶ່ງໄດ້ຮັບການພັດທະນາໃຫ້ມີຂະໜາດ ຮູບຮ່າງ ແລະ ຂານ້ອຍເທົ່າເສັ້ນຜົມ ພ້ອມປີກບາງ ຄວບຄຸມຜ່ານສະມາດໂຟນ ສຳລັບນຳໄປໃຊ້ໃນພາລະກິດສອດແນມ ແລະ ປະຕິບັດການພິເສດໃນສະໜາມຮົບ

 

ໂດຍທີມນັກວິໄຈຈາກມະຫາວິທະຍາໄລເທັກໂນໂລຍີພາຍໃນແຫ່ງຊາດ ໃນແຂວງຫູຫນານ ເປີດເຜີຍວ່າ ໂດຣນນ້ອຍນີ້ສາມາດຕິດຕັ້ງເຊັນເຊີເພື່ອລົງພື້ນທີ່ຢ່າງລັບໆ ໂດຍບໍ່ຖືກກວດຈັບງ່າຍ ເໝາະຢ່າງຍິ່ງສຳລັບພາລະກິດສອດແນມ ແລະ ປະຕິບັດການສະເພາະເທິງສະໜາມຮົບ

 

ລາຍງານຂ່າວລະບຸວ່າ ໂດຣນຍຸງຖືເປັນເທັກໂນໂລຍີລ້ຳໜ້າໃນແນວໂນ້ມການພັດທະນາ “ໄມໂຄຣໂດຣນ” ຂອງຈີນ ທີ່ໃຊ້ງານໄດ້ທັງດ້ານການຄ້າ ແລະ ທາງທະຫານ

 

ຂະນະດຽວກັນ ຫ້ອງທົດລອງໄມໂຄຣໂຣໂບຕິກສ໌ ຂອງມະຫາວິທະຍາໄລຮາວາດໃນສະຫະລັດ ກໍເປີດຕົວໂດຣນ RoboBee ຂະໜາດນ້ອຍ ຊຶ່ງສາມາດບິນ ແລະ ລົງຈອດຄ້າຍໆແມງໄມ້ທຳມະຊາດ ໂດຍມີແຜນພັດທະນາເພື່ອນຳໄປໃຊ້ໃນງານສຳຫຼວດສິ່ງແວດລ້ອມ ໄພພິບັດ ຫຼື ການປະສົມເກສອນແບບຈຳລອງ

 

ຢ່າງໃດກໍດີ ຜູ້ຊ່ຽວຊານເຕືອນວ່າເທັກໂນໂລຍີໄມໂຄຣໂດຣນ ສ້າງຄວາມກັງວົນວ່າອາດຖືກນຳໄປໃຊ້ຈາລະກຳທາງໄຊເບີ ຫຼື ການລອບສັງຫານ ໃນຂະນະທີ່ຫຼາຍບໍລິສັດກຳລັງແຂ່ງຂັນກັນ ເຊັ່ນ “RoboBee” ຂອງຮາວາດ ແລະ “Black Hornet” ຈາກນໍເວ.

ສະແດງຄຳຄິດເຫັນ