ຫຼາຍຄົນໃຊ້ແອລກໍຮໍເປັນທາງລັດສູ່ການ “ພັກຜ່ອນ” ຫຼັງວັນເມື່ອຍ ບາງຄົນດື່ມເພື່ອຄາຍຄຽດ ບາງຄົນດື່ມເພາະຢາກຄວາມບັນເທິງກັບໝູ່ເພື່ອນ ແຕ່ໃນຂະນະທີ່ໃຈໄດ້ພັກ ຮ່າງກາຍກັບເຮັດວຽກໜັກຍິ່ງກວ່າເກົ່າ

ແລ້ວຫາກລອງຢຸດດື່ມ 1 ວັນ 1 ອາທິດ ຫຼື 1 ເດືອນ ການພັກແອລກໍຮໍຈະສົ່ງຜົນຕໍ່ຮ່າງກາຍແນວໃດແດ່ ຜິວດີຂຶ້ນຈົນຄົນທັກ ຫຼັບເລິກ ຕື່ນມາບໍ່ເພຍ ໜ້າທ້ອງຍຸບ ລະບົບຍ່ອຍໂລ່ງ ສະໝອງປອດໂປ່ງ ຄິດງານລື່ນຂຶ້ນ

ເລື່ອງເຫຼົ່ານີ້ບໍ່ແມ່ນພຽງຄຳທີ່ເວົ້າລອຍໆ ແຕ່ຄືຜົນລັບທີ່ເກີດຂຶ້ນກັບຫຼາຍຄົນທີ່ລອງ “ຖອຍຄົນລະກ້າວ” ຈາກແກ້ວເຫຼົ້າ ຊວນມາທ້າທາຍຕົວເອງ ປັບໃຈ ປັບກາຍ ແລ້ວໃຫ້ຮ່າງກາຍໄດ້ “ພັກ” ໄປພ້ອມກັນ

ເມື່ອແອລກໍຮໍເຂົ້າສູ່ຮ່າງກາຍ ເກີດຫຍັງຂຶ້ນແດ່?

ຂໍ້ມູນຈາກກະຊວງສາທາລະນະສຸກອະທິບາຍວ່າ ທັນທີທີ່ດື່ມ ແອລກໍຮໍຈະຖືກດູດຊຶມໃນກະເພາະອາຫານ ແລະ ກະຈາຍສູ່ກະແສເລືອດ ເຮັດໃຫ້ສາມາດກວດພົບແອລກໍຮໍໃນເລືອດໄດ້ພາຍໃນ 5 ນາທີຫຼັງການດື່ມ ຈາກນັ້ນຈະເລີ່ມສົ່ງຜົນຕໍ່ເຊລ ແລະອະໄວຍະວະຕ່າງໆ 10 – 30 ນາທີຕໍ່ມາ

ຊ່ອງປາກ ແລະ ລຳຄໍ ຮູ້ສຶກລະຄາຍເຄືອງນັ້ນຄືຜົນຂອງລິດກັດກ່ອນໂດຍກົງຂອງແອລກໍຮໍຕໍ່ເຍື່ອບຸໃນຊ່ອງປາກແລະລຳຄໍ ນອກຈາກນີ້ລິດຂອງແອລກໍຮໍເຮັດໃຫ້ໜ້າແລະໂຕແດງ ແຕ່ຜູ້ດື່ມບາງລາຍອາດເຮັດໃຫ້ເສັ້ນເລືອດຫົດຕົວ

ແອລກໍຮໍຈະເຂົ້າທຳລາຍເຊລຕັບເຮັດໃຫ້ໄຂມັນເຂົ້າໄປແທນທີ່ ແລະ ຄັ່ງຢູ່ໃນຕັບ ເມື່ອເຊລຕັບຕາຍລົງເຖິງລະດັບໜຶ່ງຈະມີການສ້າງພັງຜືດທີ່ບໍລິເວນນັ້ນ ເຮັດໃຫ້ເປັນໂລກຕັບແຂງໃນທີ່ສຸດ

ນອກຈາກນີ້ ແອລກໍຮໍເຮັດໃຫ້ເຊລສະໝອງຂະຫຍາຍຕົວຂຶ້ນເກີດອາການ “ສະໝອງບວມ” ດົນໆໄປຈະສູນເສຍຂອງແຫຼວໃນສະໝອງເຮັດໃຫ້ເຊລສະໝອງເສື່ອມແລະຕາຍລົງ

ເມື່ອເລືອດໝູນວຽນໄວຂຶ້ນ ເຊລຈະເຮັດວຽກໄວຂຶ້ນ ອະໄວຍະວະຈະເຮັດວຽກແປປວນສົ່ງຜົນໃຫ້ເຊລເຮັດວຽກນ້ອຍລົງ ແລະ ຖືກທຳລາຍໃນທີ່ສຸດ ຂະນະທີ່ຫົວໃຈຈະຖືກກະຕຸ້ນໃຫ້ສູບສີດເລືອດໄວຂຶ້ນ ກ້າມເນື້ອຫົວໃຈຕາຍແລະຫົວໃຈວາຍ ຫຼື ຫົວໃຈລົ້ມເຫຼວໄດ້ໃນທີ່ສຸດ ຂະນະທີ່ກະເພາະອາຫານ ແອລກໍຮໍຈະກະຕຸ້ນນ້ຳຍ່ອຍມີໂອກາດເຮັດໃຫ້ເຍື່ອບຸໃນກະເພາະອາຫານອັກເສບເກະທັນຫັນ

ທັງນີ້ກໍຕ້ອງຂຶ້ນຢູ່ກັບການດື່ມຂອງແຕ່ລະຄົນ ຫຼາຍໜ້ອຍ ຫຼື ຕໍ່ເນື່ອງດົນປານໃດ

ດື່ມແອລກໍຮໍແບບໃດ ຮ່າງກາຍເຕືອນວ່າບໍ່ໄຫວ

ປະລິມານແອລກໍຮໍທີ່ເຂົ້າສູ່ຮ່າງກາຍ (ມກ.%) ແລະ ອາການທີ່ເກີດຂຶ້ນ

• 30 ມກ.% ອາການທີ່ເກີດຂຶ້ນ ສະໜຸກສະໜານຮ່າເຣີງກວ່າປົກກະຕິ
• 50 ມກ.% ການເບິ່ງເຫັນແລະຄວາມສາມາດໃນການຄວບຄຸມຮ່າງກາຍລົດລົງ
• 100 ມກ.% ປວກຮາກ ຮາກ ເດີນເຊ ເວົ້າບໍ່ຮູ້ເລື່ອງ ການຕອບສະໜອງແລະຕັດສິນໃຈຊ້າລົງ
• 200 ມກ.% ສູນເສຍຄວາມຈຳບາງສ່ວນ ເສົ້າ ຄວບຄຸບອາລົມບໍ່ໄດ້
• 300 ມກ.% ເບິ່ງເຫັນບໍ່ແຈ້ງ ມືນງົງ ຄວບຄຸມສະຕິບໍ່ໄດ້ ຫາຍໃຈລຳບາກ ຫົວໃຈເຕັ້ນຜິດປົກກະຕິ
• 400 ມກ.% ຕາພ່າ ຂາດສະຕິໂດຍສົມບູນ ອາດເຖິງຂັ້ນເສຍຊີວິດ

ສຸຂະພາບດີເລີ່ມຈາກການເລືອກກິນ ເລືອກດື່ມ ສິ່ງດີໆ ເຂົ້າສູ່ຮ່າງກາຍ ສະນັ້ນການດື່ມແອລກໍຮໍເປັນປະຈຳໃນປະລິມານຫຼາຍ ແນ່ນອນຈະສົ່ງຜົນເສຍຕໍ່ຮ່າງກາຍໃນຫຼາຍດ້ານ

• ຕັບ ເກີດພາວະຕັບອັກເສບ ໄຂມັນພອກຕັບ ຫຼື ຕັບແຂງໃນໄລຍະຍາວ
• ສະໝອງແລະລະບົບປະສາດ ສະໝອງຝໍ ຄວາມຈຳເສື່ອມ ສະມາທິຫຼຸດລົງ ອາລົມແປປວນ ແລະ ອາດນຳໄປສູ່ພາວະຊຶມເສົ້າ
• ຫົວໃຈ ເຕັ້ນຜິດຈັງຫວະ ໃຈສັ່ນ ດື່ມຕໍ່ເນື່ອງຫຼາຍປີສ່ຽງເປັນໂລກກ້າມເນື້ອຫົວໃຈຜິດປົກກະຕິ
• ລະບົບຍ່ອຍອາຫານ ກະເພາະອາຫານອັກເສບ ມີບາດແຜໃນກະເພາະອາຫານ ແລະ ທ້ອງເສຍເລື້ອລັງ
• ຜິວພັນ ຜິວແຫ້ງ ຂາດນ້ຳ ເກີດສິວ ແລະ ຮິ້ວຮອຍກ່ອນໄວ
• ລະບົບພູມິຄຸ້ມກັນ ພູມິຄຸ້ມກັນອ່ອນແອ ສ່ຽງຕິດເຊື້ອງ່າຍຂຶ້ນ
• ນ້ຳໜັກຕົວ ແຄໂລຣີ່ຈາກແອລກໍຮໍເຮັດໃຫ້ທ້ອງປ່ອງ ແລະ ນ້ຳໜັກເພີ່ມ
• ສຸຂະພາບຈິດ ວິຕົກກັງວົນ ນອນບໍ່ຫຼັບ ແລະ ອາດພຶ່ງພາແອລກໍຮໍຈົນຕິດ

ການດື່ມແອລກໍຮໍບໍ່ພຽງກະທົບຮ່າງກາຍ ຍັງສົ່ງຜົນກະທົບດ້ານອື່ນດ້ວຍ ບໍ່ວ່າຈະເປັນຄ່າໃຊ້ຈ່າຍຈາກການດື່ມສະສົມເປັນຈຳນວນຫຼາຍ ບັນຫາຄອບຄົວ  ການເຮັດວຽກ ປະສິດທິພາບລົດລົງ ຂາດສະມາທິ ແລະ ອາດກະທົບຕໍ່ໜ້າທີ່ການງານ ຍິ່ງໄປກວ່ານັ້ນ ການດື່ມສ່ຽງຕໍ່ອຸບັດຕິເຫດ ການຂັບຂີ່ໃນຂະນະມືນເມົາ ຫຼື ພຶດຕິກຳສ່ຽງ

ຫຼຸດການດື່ມ 4 ອາທິດ ຮ່າງກາຍປ່ຽນແປງດີຂຶ້ນໄດ້

ເມື່ອລອງ “ງົດແອລກໍຮໍ” ພຽງ 1 ເດືອນ ຫຼື 4 ອາທິດ ຈະເລີ່ມສັງເກດເຫັນຄວາມປ່ຽນແປງໃນທາງທີ່ດີຢ່າງຊັດເຈນ ທັງທາງ “ຮ່າງກາຍ” ແລະ “ຈິດໃຈ” ແລະ ຫາກເຮັດຕໍ່ເນື່ອງຈົນຄົບ 3 ເດືອນ ການຟື້ນຟູຈະຍິ່ງເລິກເຖິງລະດັບເຊລ ນີ້ຄືສິ່ງທີ່ຮ່າງກາຍກຳລັງເກີດຂຶ້ນ ການປ່ຽນແປງທີ່ສັງເກດໄດ້ອາດແຕກຕ່າງກັນໄປຕາມປະລິມານ ແລະ ໄລຍະເວລາທີ່ເຄີຍດື່ມ ແຕ່ໂດຍທົ່ວໄປມີດັ່ງນີ້

ອາທິດທີ 1 ຫຼັງງົດດື່ມແອລກໍຮໍ

• ຮ່າງກາຍເລີ່ມປັບຕົວນອນຫຼັບດີຂຶ້ນ ຮູບແບບການນອນເລີ່ມເປັນປົກກະຕິ
• ການຕັດສິນໃຈທີ່ດີຂຶ້ນ ຄວາມຄິດສ້າງສັນດີຂຶ້ນ
• ຮ່າງກາຍບໍ່ຂາດນ້ຳ ເຈັບຫົວນ້ອຍລົງ ບໍ່ຮູ້ສຶກເຫນື່ອຍລ້າ

ອາທິດທີ 2 ຫຼັງງົດດື່ມແອລກໍຮໍ

• ອາການກົດໄຫຼຍ້ອນນ້ອຍລົງ
• ເຍື່ອບຸກະເພາະອາຫານໄດ້ຮັບການຟື້ນຟູ
• ການຜະລິດກົດໃນກະເພາະອາຫານເລີ່ມສົມດຸນຫຼາຍຂຶ້ນ

ອາທິດທີ 3 ຫຼັງງົດດື່ມແອລກໍຮໍ

• ຄວາມດັນໂລຫິດກັບມາເປັນປົກກະຕິ
• ຫຼຸດຄວາມສ່ຽງຂອງໂລກຫຼອດເລືອດສະໝອງແລະບັນຫາຫົວໃຈ
• ການເຮັດວຽກຂອງໄຕດີຂຶ້ນ

ອາທິດທີ 4 ຫຼັງງົດດື່ມແອລກໍຮໍ

• ຜິວດີຂຶ້ນ ຜິວມີຄວາມຊຸ່ມຊື້ນ
• ການເຮັດວຽກຂອງຕັບຈະຟື້ນຕົວ
• ການໝູນວຽນຂອງເຊລດີຂຶ້ນ

ຜ່ານມາ 1 ເດືອນ ສຸຂະພາບທີ່ດີຈະຄ່ອຍໆ ເກີດຂຶ້ນ ແລະ ຫາກເຮັດຕໍ່ໄປອີກແນ່ນອນວ່າຕ້ອງດີຂຶ້ນໄປອີກໃນຫຼາຍໆ ດ້ານ ດັ່ງນີ້

ຜິວພັນເປ່ງປັ່ງຂຶ້ນ ເພາະຮ່າງກາຍໄດ້ພັກ

1. ການຂັບສານພິດດີຂຶ້ນ ເມື່ອບໍ່ມີແອລກໍຮໍ ຮ່າງກາຍບໍ່ຕ້ອງເຮັດວຽກໜັກໃນການກຳຈັດສານພິດ ຜ່ານຕັບແລະໄຕ
2. ຜິວບໍ່ແຫ້ງ (ຫຼຸດພາວະຂາດນ້ຳ) ແອລກໍຮໍດຶງນ້ຳອອກຈາກຮ່າງກາຍ ເຮັດໃຫ້ຜິວຂາດຄວາມຊຸ່ມຊື້ນ ງົດດື່ມແລ້ວ ຜິວຈະກັບມານຸ່ມ ເດັ້ງ ມີຊີວິດຊີວາ
3. ຫຼຸດການອັກເສບຂອງຜິວ ສິວ ຜິວແດງ ຫຼື ບັນຫາຜິວອັກເສບຈະດີຂຶ້ນ ເພາະບໍ່ມີຕົວກະຕຸ້ນຈາກແອລກໍຮໍ
4. ການດື່ມແອລກໍຮໍຢ່າງຕໍ່ເນື່ອງສາມາດທຳລາຍຄໍລໍເຈນ ແລະ ອີລາສຕິນໃນຜິວ ຊຶ່ງເປັນສ່ວນສຳຄັນທີ່ເຮັດໃຫ້ຜິວດູອ່ອນຍາວແລະຍືດຫຍຸ່ນ ການງົດແອລກໍຮໍຊ່ວຍປ້ອງກັນການເສື່ອມສະພາບຂອງໂປຼຕີນເຫຼົ່ານີ້ ເຮັດໃຫ້ຜິວມີຄວາມກະຊັບ

ສະໝອງປອດໂປ່ງ ອາລົມດີ ມີຄວາມສຸກຫຼາຍຂຶ້ນ

1. ສະໝອງຄິດໄດ້ຊັດເຈນຂຶ້ນ ການງົດແອລກໍຮໍຊ່ວຍໃຫ້ການຄິດ ການຈົດຈຳ ແລະ ສະມາທິດີຂຶ້ນ
2. ຫຼຸດອາການຊຶມເສົ້າແລະຄວາມຄຽດ ຫຼາຍຄົນເຂົ້າໃຈຜິດວ່າເຫຼົ້າຊ່ວຍຄາຍເຄັ່ງ ແຕ່ຈິງໆ ແລ້ວມັນເຮັດໃຫ້ພາວະຊຶມເສົ້າແລະຄວາມວິຕົກກັງວົນຮ້າຍແຮງຂຶ້ນ ງົດດື່ມແລ້ວໃຈຈະເບົາແລະສະບາຍຫຼາຍຂຶ້ນ
3. ຫຼັບດີຂຶ້ນ ຕື່ນບໍ່ເພຍ ເຖິງແມ່ນເຫຼົ້າເຮັດໃຫ້ຫຼັບງ່າຍ ແຕ່ເປັນການຫຼັບທີ່ບໍ່ເລິກ ພໍຕື່ນຂຶ້ນມາຈະຍັງຮູ້ສຶກອ່ອນເພຍ ງົດດື່ມແລ້ວຈະໄດ້ຫຼັບແບບໄດ້ພັກແທ້ໆ
4. ແອລກໍຮໍສາມາດສ້າງວົງຈອນຂອງຄວາມຄຽດແລະຄວາມວິຕົກກັງວົນ ເນື່ອງຈາກເປັນສານກະຕຸ້ນທີ່ເຮັດໃຫ້ເກີດຄວາມບໍ່ສົມດຸນໃນສານເຄມີຂອງສະໝອງ ການເລີກດື່ມແອລກໍຮໍຊ່ວຍຫຼຸດຄວາມຄຽດແລະຄວາມວິຕົກກັງວົນໃນໄລຍະຍາວໄດ້
5. ຄວາມສຳພັນກັບຄົນຮອບຕົວດີຂຶ້ນ ເມື່ອຄວບຄຸມອາລົມໄດ້ດີຂຶ້ນ ຈະສື່ສານກັບຄົນໃກ້ຊິດໄດ້ດີ ບໍ່ແມ່ນແຕ່ຜິວທີ່ດີຂຶ້ນ ແຕ່ “ໃຈ” ກໍດີຂຶ້ນດ້ວຍ

ຮູບຮ່າງດີ ນ້ຳໜັກລົດລົງໄດ້ແບບບໍ່ຝືນ

ການງົດດື່ມແອລກໍຮໍ ມີຜົນດີຕໍ່ນ້ຳໜັກລວມເຖິງສຸຂະພາບໂດຍລວມ ຕັ້ງແຕ່ການຫຼຸດປະລິມານເຄລໂລຣີ່ທີ່ໄດ້ຮັບ ປັບປຸງການເຜົາຜານ ແລະ ຫຼຸດການສະສົມໄຂມັນ

ແອລກໍຮໍເຕັມໄປດ້ວຍເຄລໂລຣີ່ທີ່ຮ່າງກາຍໃຊ້ປະໂຫຍດບໍ່ໄດ້ ສະນັ້ນເລີກດື່ມ ລະບົບຍ່ອຍແລະການເຜົາຜານຈະກັບມາເຮັດວຽກດີຂຶ້ນ ນ້ຳຕານຫຼຸດລົງ ໜ້ອງທ້ອງຍຸບ ໄຂມັນສະສົມລົດລົງ ລະບົບຮໍໂມນໂດຍສະເພາະຮໍໂມນເພດຊາຍ/ຍິງສົມດຸນຫຼາຍຂຶ້ນ

ສຸດທ້າຍ ເຄື່ອງດື່ມແອລກໍຮໍບໍ່ແມ່ນແຕ່ເຮັດໃຫ້ມືນເມົາພຽງຊົ່ວຄາວ ແຕ່ຍັງເປັນຕົ້ນເຫດສຳຄັນຂອງການເຈັບປ່ວຍ ແລະ ການເສຍຊີວິດຈາກໂລກຊ້ຳເຮືືອຈຳນວນຫຼາຍ ທັງໃນໄລຍະສັ້ນ ແລະ ຜົນສະສົມໄລຍະຍາວ ໂດຍສະເພາະຫາກດື່ມເປັນປະຈຳຫຼືມີພາວະ “ຕິດເຫຼົ້າ” ລະບົບສຳຄັນຂອງຮ່າງກາຍຈະຄ່ອຍໆ ເສື່ອມລົງຢ່າງຫຼີກລ່ຽງບໍ່ໄດ້

ແອລກໍຮໍຈຶ່ງບໍ່ແມ່ນແຕ່ “ເຄື່ອງດື່ມເພື່ອສັງສັນ” ແຕ່ຄືສິ່ງທີ່ຄ່ອຍໆ ບັ່ນທອນສຸຂະພາບແບບມິດໆ ຈົນກວ່າຈະສາຍເກີນໄປ ຫາກເລີ່ມຫຼຸດ ລະ ເລີກ ໄດ້ມື້ນີ້ ຄືການໃຫ້ໂອກາດຮ່າງກາຍໄດ້ກັບມາຟື້ນຟູຕົວເອງຢ່າງແທ້ຈິງ

ການເລີກແອລກໍຮໍບໍ່ແມ່ນແຕ່ເລື່ອງຂອງ “ບໍ່ດື່ມ” ແຕ່ຄືການໃຫ້ໂອກາດຮ່າງກາຍແລະຈິດໃຈໄດ້ “ຟື້ນຄືນ” ກັບມາເປັນເວີຊັນທີ່ດີຂຶ້ນ

ສະແດງຄຳຄິດເຫັນ