ລັດຖະບານຍີ່ປຸ່ນກຳລັງຍົກລະດັບແຜນຮັບມືໄພພິບັດດ້ວຍການປະສົມປະສານລວມເທັກໂນໂລຍີທັນສະໄໝແລະປັນຍາປະດິດ AI ເພື່ອກຽມພ້ອມຮັບມືກັບແຜ່ນດິນໄຫວຄັ້ງໃຫຍ່ (Megaquake)

ທີ່ຄາດການວ່າຈະເກີດຂຶ້ນໃນຮ່ອງນ້ຳນັນໄກ (Nankai Trough) ໂດຍມີເປົ້າໝາຍຫຼຸດຈຳນວນຜູ້ເສຍຊີວິດທີ່ອາດສູງເຖິງ 298,000 ຄົນ ແລະ ຄວາມເສຍຫາຍທາງເສດຖະກິດທີ່ປະເມີນໄວ້ເຖິງ 2 ລ້ານລ້ານໂດລາສະຫະລັດ

ແຜ່ນດິນໄຫວຄັ້ງໃຫຍ່ທີ່ຮ່ອງນ້ຳນັນໄກ (Nankai Trough)

ເນື່ອງຈາກຄະນະກຳມະການຂອງລັດຖະບານຍີ່ປຸ່ນລະບຸວ່າ ປັດຈຸບັນໂອກາດເກີດແຜ່ນດິນໄຫວຂະໜາດ 7 ໂມເມັນແມກນິຈູດ (Mw) ຫຼື ສູງກວ່າໃນຮ່ອງນ້ຳນັນໄກທີ່ຈາກເດີມຢູ່ທີ 75% ສູງຂຶ້ນເປັນ 82% ລັດຖະບານຍີ່ປຸ່ນຈຶ່ງເລັ່ງປັບປຸງແຜນຮັບມືແຜ່ນດິນໄຫວສະບັບປີ 2014 ໂດຍຄຳນຶງວ່າແຜນເດີມອາດຫຼຸດອັດຕາການເສຍຊີວິດໄດ້ພຽງ 20% ເທົ່ານັ້ນ

ຈາກການປະມານການຄວາມເສຍຫາຍສະບັບໃໝ່ທີ່ເຜີຍແພ່ເມື່ອເດືອນມີນາທີ່ຜ່ານມາ ລະບຸວ່າໃນກໍລະນີທີ່ຮ້າຍແຮງທີ່ສຸດ ແຜ່ນດິນໄຫວໃນຮ່ອງນັນໄກອາດພາກຊີວິດຜູ້ຄົນໄດ້ເຖິງ 298,000 ຄົນ ແລະ ທຳລາຍອາຄານກວ່າ 2.35 ລ້ານຫຼັງ ຊຶ່ງສະແດງໃຫ້ເຫັນເຖິງຄວາມຈຳເປັນເລັ່ງດ່ວນໃນການກຽມພ້ອມຮັບມື

ແຜນກົນລະຍຸດທີ່ອາດມີການປັບປຸງໃໝ່ຂອງລັດຖະບານຍີ່ປຸ່ນ

ສືບເນື່ອງຈາກແຜນປີ 2014 ແຜນກົນລະຍຸດທີ່ອາດມີການປັບປຸງໃໝ່ທີ່ມຸ່ງເນັ້ນການລົງທຶນໃນໂຄງສ້າງພື້ນຖານອັດສະລິຍະ ແລະ ການໃຊ້ເທັກໂນໂລຍີເພື່ອເພີ່ມປະສິດທິພາບໃນການຮັບມືໄພພິບັດ ເນື່ອງຈາກເທັກໂນໂລຍີທີ່ກ້າວໜ້າໃນປັດຈຸບັນ ບໍ່ວ່າຈະເປັນ AI ຫຼື ລະບົບໂທລະຄົມມະນາຄົມທີ່ດີຫຼາຍຍິ່ງຂຶ້ນ ເຊັ່ນ:

– ລະບົບເຕືອນໄພລ່ວງໜ້າແບບຣຽລໄທມ໌ ທີ່ເປັນການພັດທະນາລະບົບເຊັນເຊີແຜ່ນດິນໄຫວ ແລະ ສຶນາມິທີ່ເຊື່ອມໂຍງກັບເຄືອຂ່າຍປັນຍາປະດິດ AI ຈະຊ່ວຍໃຫ້ສາມາດສົ່ງການແຈ້ງເຕືອນໄປຍັງປະຊາຊົນ ແລະ ຫນ່ວຍງານສຸກເສີນໄດ້ໄວຍິ່ງຂຶ້ນ ຫຼຸດເວລາຕອບສະໜອງແລະເພີ່ມໂອກາດໃນການອົບພະຍົບ

– ໃຊ້ແພລດຟອມການຈັດການໄພພິບັດທີ່ຂັບເຄື່ອນດ້ວຍຂໍ້ມູນ ໂດຍການນຳ AI ມາໃຊ້ໃນການວິເຄາະຂໍ້ມູນການເກີດແຜ່ນດິນໄຫວ ຮູບແບບການອົບພະຍົບ ແລະ ການກະຈາຍຊັບພະຍາກອນ ເພື່ອວາງແຜນ ແລະ ຈັດການສະຖານການສຸກເສີນໄດ້ຢ່າງມີປະສິດທິພາບສູງສຸດ

– ການໃຊ້ເທັກໂນໂລຍີຈຳລອງສະຖານການ ແລະ ຝຶກຊ້ອມປະຊາຊົນ ຜ່ານການໃຊ້ເທັກໂນໂລຍີສະເຫມືອນຈິງ VR ແລະ AR ໃນການຝຶກຊ້ອມຮັບມືໄພພິບັດ ເພື່ອໃຫ້ປະຊາຊົນ ແລະ ເຈົ້າໜ້າທີ່ສາມາດຊ້ອມຮັບມືສະຖານການຈິງໄດ້ຢ່າງສົມຈິງ ແລະ ປອດໄພຫຼາຍຂຶ້ນ

ທັງນີ້ນາຍົກລັດຖະມົນຕີ ຊິເງຣຸ ອິຊິບະ ໄດ້ກ່າວເນັ້ນຍ້ຳເຖິງຄວາມສຳຄັນຂອງການເຮັດວຽກຮ່ວມກັນຂອງທຸກພາກສ່ວນ ທັງພາກລັດ ພາກເອກະຊົນ ແລະ ອົງການບໍ່ສະແຫວງຫາຜົນກຳໄລ ເພື່ອຊ່ວຍຊີວິດຜູ້ຄົນໃຫ້ໄດ້ຫຼາຍທີ່ສຸດເທົ່າທີ່ຈະເຮັດໄດ້ ໂດຍມີເປົ້າໝາຍຫຼຸດຈຳນວນຜູ້ເສຍຊີວິດລົງ 80% ແລະ ຈຳນວນບ້ານເຮືອນທີ່ຖືກທຳລາຍລົງ 50% ໃນກໍລະນີທີ່ເກີດແຜ່ນດິນໄຫວຮ່ອງນ້ຳນັນໄກ

ຍີ່ປຸ່ນ ຊຶ່ງຕັ້ງຢູ່ໃນເຂດທີ່ມີຄວາມສ່ຽງຕໍ່ແຜ່ນດິນໄຫວສູງທີ່ສຸດໃນໂລກ ໄດ້ຮຽນຮູ້ຈາກບົດຮຽນໃນອະດີດ ລວມເຖິງເຫດການແຜ່ນດິນໄຫວຄັ້ງໃຫຍ່ໃນປີ 1946 ແລະ “ເມກະແຜ່ນດິນໄຫວ” ໃຕ້ທະເລເມື່ອປີ 2011 ທີ່ເຮັດໃຫ້ເກີດສຶນາມິ ແລະ ວິກິດການນິວເຄລຍ ດ້ວຍການນຳເທັກໂນໂລຍີ ແລະ ນະວັດຕະກຳມາປະຍຸກໃຊ້ ຍີ່ປຸ່ນກຳລັງສ້າງມາດຕະຖານໃໝ່ໃນການກຽມພ້ອມຮັບມືໄພພິບັດທຳມະຊາດລະດັບໂລກ

ເພື່ອບັນລຸເປົ້າໝາຍເຫຼົ່ານີ້ ລັດຖະບານຈະມຸ່ງເນັ້ນໄປທີ່ການເສີມຄວາມແຂງແກ່ງໃຫ້ກັບໂຄງສ້າງພື້ນຖານທົ່ວປະເທດ ໂດຍສະເພາະຢ່າງຍິ່ງໃນພື້ນທີ່ທີ່ສ່ຽງຕໍ່ການສັ່ນສະເທືອນຮຸນແຮງ ຫຼື ຄື່ນສຶນາມິສູງ ພາຍໃນທົດສະວັດໜ້າ

ບ້ານເຮືອນທຸກຫຼັງໃນພື້ນທີ່ສ່ຽງຈະໄດ້ຮັບການປັບປຸງໃຫ້ສາມາດຕ້ານທານແຜ່ນດິນໄຫວໄດ້ຢ່າງພຽງພໍ ນອກຈາກນີ້ ລັດຖະບານຍັງຈະດຳເນີນການກຽມຄວາມພ້ອມສຳລັບສູນພັກພິງອົບພະຍົບໃຫ້ມີປະສິດທິພາບຫຼາຍຍິ່ງຂຶ້ນ

ແຜນພື້ນຖານນີ້ຍັງໄດ້ລະບຸເປົ້າໝາຍທາງຕົວເລກກວ່າ 200 ລາຍການສຳລັບມາດຕະການຕ່າງໆ ທີ່ລັດຖະບານຈະດຳເນີນການ ແລະ ຈະມີການຕິດຕາມຄວາມຄືບໜ້າຂອງມາດຕະການເຫຼົ່ານີ້ເປັນປະຈຳທຸກປີ

ເພື່ອໃຫ້ມັ່ນໃຈວ່າການດຳເນີນງານເປັນໄປຕາມແຜນທີ່ວາງໄວ້ ແລະ ຈະມີການສະໜັບສະໜູນຄວາມພະຍາຍາມໃນລະດັບພູມິພາກຢ່າງຕໍ່ເນື່ອງ ເພື່ອໃຫ້ຍີ່ປຸ່ນສາມາດຮັບມືກັບໄພພິບັດທາງທຳມະຊາດໄດ້ຢ່າງມີປະສິດທິພາບ ແລະ ຫຼຸດຜົນກະທົບຕໍ່ຊີວິດ ແລະ ຊັບສິນຂອງປະຊາຊົນໃຫ້ໄດ້ຫຼາຍທີ່ສຸດ

ສະແດງຄຳຄິດເຫັນ