ສິງກະໂປເລີ່ມບັງຄັບໃຊ້ບົດລົງໂທດປັບແລະຈຳຄຸກ 3 ເດືອນ ຜູ້ທີ່ຝ່າຝືນຂັບຂີ່ພາຫນະເທິງທາງຍ່າງແລ້ວ ຕັ້ງແຕ່ວັນທີ 1 ກໍລະກົດທີ່ຜ່ານມາ

ໂດຍມີເປົ້າໝາຍເພື່ອເພີ່ມຄວາມປອດໄພແກ່ກຸ່ມຜູ້ໃຊ້ທາງຍ່າງທີ່ອ່ອນແອ ເຊັ່ນ: ຜູ້ສູງອາຍຸແລະເດັກ

ວັນທີ 3 ກໍລະກົດ 2025 ອົງການຂົນສົ່ງທາງບົກຂອງສິງກະໂປ ເປີດເຜີຍວ່າ ບົດລົງໂທດຜູ້ທີ່ຂັບຂີ່ລົດຈັກ, ລົດຖີບ ຫຼື ພາຫນະສ່ວນບຸກຄົນທັງທີ່ມີ ຫຼື ບໍ່ມີເຄື່ອງຈັກ ເທິງທາງຍ່າງໃນເຂດຫ້າມ ຈະມີໂທດປັບສູງສຸດ 2,000 ໂດລາສິງກະໂປຈຳຄຸກບໍ່ເກີນ 3 ເດືອນ ຫຼື ທັງຈຳທັງປັບ ຂຶ້ນກັບພຶດຕິກຳການຂັບຂີ່

ທາງການລະບຸວ່າ ເຖິງແມ່ນວ່າຫນ່ວຍງານຈະເນັ້ນວ່າການດຳເນີນຄະດີຈະເຮັດດ້ວຍຄວາມລະມັດລະວັງ ແລະ ພິຈາລະນາເປັນກໍລະນີໄປ ແຕ່ຈະບໍ່ມີການຜ່ອນຜັນ ສຳລັບຜູ້ທີ່ຂັບຂີ່ດ້ວຍຄວາມໄວເກີນກຳໜົດ ຫຼື ສະແດງພຶດຕິກຳປະມາດເຊິ່ງອາດກໍ່ໃຫ້ເກີດອັນຕະລາຍຕໍ່ຄົນຍ່າງ

ໂດຍ “ທາງຍ່າງທີ່ຫ້າມໃຊ້” ໝາຍເຖິງທາງຍ່າງທີ່ຢູ່ຕິດກັບທາງລົດ ເຊິ່ງມີປ້າຍ ຫຼື ສັນຍາລັກລະບຸຢ່າງຊັດເຈນວ່າ ສະຫງວນໄວ້ສຳລັບຄົນຍ່າງເທົ່ານັ້ນ ໂດຍອະນຸຍາດໃຫ້ສະພາະຜູ້ໃຊ້ຕີນ ແລະ ຜູ້ທີ່ໃຊ້ອຸປະກອນຊ່ວຍການເຄື່ອນຍ້າຍ ເຊັ່ນ: ຜູ້ໃຊ້ລໍ້ວິວແຊ ຫຼື ໄມ້ເທົ້າ ທີ່ສາມາດໃຊ້ທາງຍ່າງນີ້ໄດ້

ທັງນີ້ ມາດຕະການໃໝ່ນີ້ມີຂຶ້ນຫຼັງຈາກເກີດຄວາມກັງວົນເລື່ອງອຸປະຕິເຫດ ແລະ ເຫດການຕຳຄົນຍ່າງ ເທິງທາງຍ່າງໃນຊ່ວງຫຼາຍປີທີ່ຜ່ານມາ ໂດຍສະເພາະຈາກຜູ້ທີ່ໃຊ້ລົດໄຟຟ້າ ຫຼື ສະກູດເຕີຄວາມໄວສູງ ເຊິ່ງອາດກໍ່ອັນຕະລາຍກັບຜູ້ໃຊ້ທາງທີ່ຮ່າງກາຍບໍ່ແຂງແຮງ

ສະແດງຄຳຄິດເຫັນ