ຫຼາຍປະເທດໃນເອີຣົບຍັງຄົງອອກຄຳເຕືອນດ້ານສະພາບອາກາດແລະສຸຂະພາບ ຫຼັງຄື້ນຄວາມຮ້ອນແຜ່ປົກຄຸມ ລ່າສຸດພົບຜູ້ເສຍຊີວິດຈາກອາກາດຮ້ອນຈັດແລ້ວ 8 ຄົນ

 

ຜູ້ເສຍຊີວິດຈຳນວນ 8 ຄົນ ຢູ່ໃນປະເທດສະເປນ 4 ຄົນ, ປະເທດ ຝຣັ່ງ 2 ຄົນ ແລະ ອິຕາລີ 2 ຄົນ ໂດຍໃນສ່ວນຂອງສະເປນ ມື້ກ່ອນເຈົ້າໜ້າທີ່ກ່າວວ່າໄຟປ່າໃນແຄວ້ນຄາຕາລູຍຍາພາກຊີວິດຜູ້ຄົນໄປ 2 ຄົນ ແລະ ທາງການຍັງລາຍງານຜູ້ເສຍຊີວິດຈາກຄື້ນຄວາມຮ້ອນໃນເອສເຕຣມາດູຣາ ແລະ ກໍໂດບາດ້ວຍ

 

ທາງດ້ານຝຣັ່ງ ລັດຖະມົນຕີກະຊວງພະລັງງານລາຍງານວ່າມີຜູ້ເສຍຊີວິດ 2 ຄົນທີ່ກ່ຽວຂ້ອງກັບຄື້ນຄວາມຮ້ອນ ແລະ ມີອີກ 300 ຄົນທີ່ຖືກນຳສົ່ງໂຮງໝໍ

 

 

ສ່ວນອິຕາລີ ສຳນັກຂ່າວ ANSA ລາຍງານວ່າ ມີຊາຍ 2 ຄົນ ອາຍຸຫຼາຍກວ່າ 60 ປີ ເສຍຊີວິດຈາກເທິງຊາຍຫາດໃນຊາດິເນຍຂອງປະເທດ ເນື່ອງຈາກຄວາມຮ້ອນ

 

ທັງນີ້ທາງການອິຕາລີອອກປະກາດເຕືອນໄພສີແດງສຳລັບ 18 ເມືອງ ຂະນະທີ່ໃນເຢຍລະມັນ ຄາດວ່າອຸນຫະພູມຈະສູງເຖິງ 40 ອົງສາເຊລຊຽສໃນບາງພື້ນທີ່ ເຮັດໃຫ້ເປັນມື້ທີ່ຮ້ອນທີ່ສຸດຂອງປີ

 

ຂະນະທີ່ຄື້ນຄວາມຮ້ອນໃນຊ່ວງຕົ້ນລະດູຮ້ອນຍັງຄົງແຜ່ປົກຄຸມພື້ນທີ່ສ່ວນໃຫຍ່ຂອງເອີຣົບເມື່ອວັນທີ 2 ກໍລະກົດ ສົ່ງຜົນໃຫ້ມີການແຈ້ງເຕືອນດ້ານສຸຂະພາບ ແລະ ເກີດໄຟປ່າ

 

ສ່ວນກົມອຸຕຸນິຍົມວິທະຍາຂອງຝຣັ່ງລະບຸວ່າ ຍັງຄົງມີການເຕືອນໄພສີແດງສຳລັບຫຼາຍພື້ນທີ່ທາງຕອນກາງຂອງປະເທດ ໂດຍຄວາມສ່ຽງມີສູງສຸດສຳລັບປະຊາກອນກຸ່ມອ່ອນແອ ຂະນະທີ່ທາງການຍັງຄົງເຝົ້າລະວັງຕໍ່ໄປ

 

ຢ່າງໃດກໍຕາມອິຕາລີ ຝຣັ່ງ ແລະ ເຢຍລະມັນ ເຕືອນເຖິງຄວາມສ່ຽງຂອງພາຍຸຝົນຟ້າຄະນອງຮຸນແຮງເນື່ອງຈາກອຸນຫະພູມທີ່ເພີ່ມສູງເກີນໄປ

 

ແບບທີ່ປະເທດເຢຍລະມັນເມື່ອວັນທີ 1 ກໍລະກົດ ທີ່ຜ່ານມາພົບພາຍຸລູກເຫັບຖະຫລົ່ມເມືອງຕ່າງໆຂອງປະເທດ ສ່ວນຊ່ວງກາງຄືນຂອງວັນທີ 30 ມິຖຸນາ ພົບພາຍຸຝົນຟ້າຄະນອງຮຸນແຮງໃນເຂົາພູແອລຂອງຝຣັ່ງເສດ ເຊິ່ງນີ້ເຮັດໃຫ້ເກີດດິນຖະຫລົ່ມ ແລະ ສົ່ງຜົນເຮັດໃຫ້ການຈະລາຈອນທາງລົດໄຟລະຫວ່າງກຸງປາຣີສ ແລະ ມີລານຢຸດຊະງັກ

 

ສ່ວນສະວິດເຊີແລນ ບໍລິສັດສາທາລະນູປະໂພກ Axpo ຂອງປະເທດປິດເຕົາປະຕິກອນໜຶ່ງຫນ່ວຍທີ່ໂຮງໄຟຟ້ານິວເຄລຍ Beznau ແລະ ຫຼຸດກຳລັງການຜະລິດລົງຄຶ່ງໜຶ່ງທີ່ອີກຫນ່ວຍໜຶ່ງເມື່ອວັນທີ 1 ກໍລະກົດ ເນື່ອງຈາກອຸນຫະພູມຂອງນ້ຳແມ່ນ້ຳຢູ່ໃນລະດັບສູງ

 

ທັງນີ້ໂຮງໄຟຟ້ານິວເຄລຍໃຊ້ນ້ຳໃນການລະບາຍຄວາມຮ້ອນ ແລະ ວັດຖຸປະສົງອື່ນໆ ແລະ ຄາດວ່າຈະຍັງຄົງມີການຈຳກັດການໃຊ້ງານຕໍ່ໄປໃນຂະນະທີ່ມີການຕິດຕາມກວດກາອຸນຫະພູມ

 

ດ້ານຜູ້ຊ່ຽວຊານລະບຸວ່າການປ່ຽນແປງສະພາບອາກາດເປັນສາເຫດທີ່ເຮັດໃຫ້ຄື້ນຄວາມຮ້ອນຮຸນແຮງຂຶ້ນ ພ້ອມເຕືອນເຖິງຜົນກະທົບທາງເສດຖະກິດ ແລະ ຄວາມຈຳເປັນໃນການຮັບມືກັບສະພາບອາກາດຮ້ອນຈັດ

ສະແດງຄຳຄິດເຫັນ