ປະທານາທິບໍດີປູຕິນປະກາດເດີນໜ້າຕາມເປົ້າໝາຍສົງຄາມໃນຢູເຄຣນ ພ້ອມຍືນຢັນວ່າຈະບໍ່ຍອມຖອຍຈາກເປົ້າໝາຍດັ່ງກ່າວແມ້ແຕ່ກ້າວດຽວ

ຢູຣີ ອູຊາຄອຟ ຜູ້ຊ່ວຍຂອງລັດຖະບານຣັດເຊຍ ເປີດເຜີຍວ່າ ລະຫວ່າງການສົນທະນາທາງໂທລະສັບຂອງປະທານາທິບໍດີຣັດເຊຍ ໂວລາດິເມຍ ປູຕິນ ແລະ ປະທານາທິບໍດີສະຫະລັດ ໂດນັນດ໌ ທຣຳ ເມື່ອວັນທີ 3 ກໍລະກົດ ທີ່ຜ່ານມາ ໄດ້ມີການປຶກສາຫາລືເປັນເວລາ 1 ຊົ່ວໂມງ ໂດຍເນັ້ນໄປທີ່ສົງຄາມຂອງຣັດເຊຍໃນຢູເຄຣນ ແລະ ສະຖານະການໃນຕະວັນອອກກາງ

ອູຊາຄອຟລະບຸວ່າ ປະທານາທິບໍດີທຣຳໄດ້ເນັ້ນຢ້ຳອີກຄັ້ງເຖິງຄວາມຈຳເປັນໃນການຢຸດຢັ້ງການສູ້ຣົບທາງທະຫານໂດຍໄວທີ່ສຸດ ຂະນະທີ່ປະທານາທິບໍດີປູຕິນລະບຸວ່າ ຣັດເຊຍຍັງຄົງສະແຫວງຫາທາງອອກທາງການເມືອງໃນການແກ້ໄຂຄວາມຂັດແຍ້ງ

ປະທານາທິບໍດີປູຕິນ

ເຖິງຢ່າງໃດກໍຕາມປະທານາທິບໍດີປູຕິນຍັງຢ້ຳວ່າ ຣັດເຊຍຈະເດີນໜ້າເພື່ອບັນລຸເປົ້າໝາຍຂອງຕົນເອງ ໂດຍສະເພາະຢ່າງຍິ່ງການແກ້ໄຂສາເຫດຫຼັກທີ່ນຳໄປສູ່ສະຖານະການປັດຈຸບັນ ແລະ ຈະບໍ່ຍອມຖອຍຈາກເປົ້າໝາຍເຫຼົ່ານີ້

ນອກຈາກນີ້ຜູ້ຊ່ວຍລັດຖະບານຣັດເຊຍຍັງກ່າວອີກວ່າຜູ້ນຳທັງສອງໄດ້ປຶກສາຫາລືກັນກ່ຽວກັບການທູດທາງວັດທະນະທຳ ໂດຍສະເພາະການແລກປ່ຽນໜັງທີ່ສົ່ງເສີມສິ່ງທີ່ອູຊາຄອຟເອີ້ນວ່າຄ່ານິຍົມແບບດັ້ງເດີມທີ່ໃກ້ຊິດກັບຣັດເຊຍ ແລະ ຝ່າຍບໍລິຫານປະທານາທິບໍດີສະຫະລັດ

ການສົ່ງສານດັ່ງກ່າວຂອງປະທານາທິບໍດີປູຕິນມີຂຶ້ນ ທ່າມກາງສະຖານະການທີ່ຣັດເຊຍຍັງສົ່ງໂດຣນ ແລະ ຍິງຂີປະນາວຸດໂຈມຕີຢູເຄຣນຢ່າງຕໍ່ເນື່ອງ ເຊິ່ງສົ່ງຜົນເຮັດໃຫ້ມີພົນລະເຮືອນເສຍຊີວິດ ແລະ ໄດ້ຮັບບາດເຈັບຫຼາຍຮ້ອຍຄົນໃນຊ່ວງບໍ່ເທົ່າໃດອາທິດທີ່ຜ່ານມາ

ການໂຈມຕີດັ່ງກ່າວໄດ້ທຳລາຍໂຄງສ້າງພື້ນຖານຈຳນວນຫຼາຍ ຂະນະທີ່ຣັດເຊຍເພີ່ມການໂຈມຕີເຖິງແມ່ນວ່າຈະມີການຮຽກຮ້ອງຫຼາຍຄັ້ງຈາກລັດຖະບານຢູເຄຣນ ສະຫະລັດ ແລະ ຜູ້ນຳເອີຣົບໃຫ້ຢຸດຍິງໂດຍບໍ່ມີເງື່ອນໄຂ

ຂະນະທີ່ການສົນທະນາທາງໂທລະສັບລະຫວ່າງປະທານາທິບໍດີທຣຳ ແລະ ປະທານາທິບໍດີປູຕິນເກີດຂຶ້ນພຽງ 1 ວັນຫຼັງຈາກທີ່ກະຊວງປ້ອງກັນປະເທດສະຫະລັດ ລະງັບການຈັດສົ່ງອາວຸດສຳຄັນຕ່າງໆໄປທີ່ຢູເຄຣນ ລວມເຖິງຂີປະນາວຸດຕໍ່ຕ້ານອາກາດຍານແພທຣິອອດ ແລະ ອາວຸດນຳວິຖີແມ່ນຍຳ

ດ້ານກະຊວງຕ່າງປະເທດຂອງຢູເຄຣນເຕືອນວ່າ ຄວາມຊັກຊ້າດັ່ງກ່າວຈະບັ່ນທອນຄວາມພະຍາຍາມດ້ານການປ້ອງກັນປະເທດຂອງຢູເຄຣນ ແລະ ສ່ຽງທີ່ຈະເຮັດໃຫ້ຣັດເຊຍກ້າທີ່ຈະຍົກລະດັບການໂຈມຕີຕໍ່ໄປ

ສ່ວນຄວາມເຄື່ອນໄຫວຂອງປະທານາທິບໍດີຢູເຄຣນ ໂວໂລດິເມຍ ເຊເລັນສະກີ ກ່າວທີ່ປະເທດເດນມາກເມື່ອຊ່ວງເຊົ້າວັນທີ 3 ກໍລະກົດວ່າ ການບັນລຸສັນຕິພາບຕ້ອງອາໄສການເຈລະຈາໂດຍກົງລະຫວ່າງຜູ້ນຳປະເທດ ເຊິ່ງນີ້ເປັນການກ່າວເຖິງປະທານາທິບໍດີທຣຳ ແລະ ປະທານາທິບໍດີປູຕິນວ່າເປັນຄົນລະຄົນກັນຢ່າງສິ້ນເຊີງ

ນີ້ຈຶ່ງເຮັດໃຫ້ປະທານາທິບໍດີຢູເຄຣນຢ້ຳວ່າ ໃນຣັດເຊຍ ມີແຕ່ປະທານາທິບໍດີປູຕິນເທົ່ານັ້ນທີ່ຕັດສິນໃຈ ດັ່ງນັ້ນຈຶ່ງຈຳເປັນຕ້ອງປະຊຸມກັນໃນລະດັບຜູ້ນຳ ຫາກຕ້ອງການສັນຕິພາບ

ຢ່າງໃດກໍຕາມຜູ້ຊ່ວຍລັດຖະບານຣັດເຊຍລະບຸວ່າ ລະຫວ່າງການປຶກສາຫາລືຂອງທຣຳແລະປູຕິນ ບໍ່ໄດ້ເວົ້າເຖິງຄວາມເປັນໄປໄດ້ໃນການພົບປະກັນ ແລະ ແນວຄິດນີ້ຍັງຄົງບໍ່ຊັດເຈນ ແຕ່ກໍຈະຕົກລົງທີ່ຈະສື່ສານແບບນີ້ຕໍ່ໄປ

ສຳລັບລັດຖະບານຣັດເຊຍ ແລະ ລັດຖະບານຢູເຄຣນໄດ້ຈັດການເຈລະຈາແບບພົບໜ້າກັນສອງຄັ້ງໃນນະຄອນອິສຕັນບູນ ໃນປີນີ້ ຄັ້ງທຳອິດໃນວັນທີ 16 ພືດສະພາ ແລະ ອີກຄັ້ງໃນວັນທີ 2 ມິຖຸນາ ຫຼັງຈາກທີ່ບໍ່ມີການເຈລະຈາໂດຍກົງມາດົນກວ່າ 3 ປີ

ການພົບປະກັນດັ່ງກ່າວສົ່ງຜົນໃຫ້ມີການແລກປ່ຽນນັກໂທດຫຼາຍຄັ້ງ ແຕ່ບໍ່ມີຂັ້ນຕອນໃດໃນການຢຸດຢັ້ງການສູ້ຣົບ

ເຖິງແມ່ນວ່າທຣຳຈະສະແດງຄວາມຜິດຫວັງກັບການຮຸກຮານຢ່າງຕໍ່ເນື່ອງຂອງຣັດເຊຍຕໍ່ຢູເຄຣນ ຕະຫຼອດຈົນຜິດຫວັງຕໍ່ຄວາມກ້າວໜ້າໃນການປຶກສາຫາລືທາງໂທລະສັບເພື່ອຢຸດສົງຄາມລະຫວ່າງຣັດເຊຍ ແລະ ຢູເຄຣນມື້ວານນີ້ ແຕ່ລັດຖະບານສະຫະລັດພາຍໃຕ້ການນຳຂອງລາວກໍບໍ່ໄດ້ກຳໜົດມາດຕະການຄວໍາບາດໃໝ່ ຫຼື ດຳເນີນການກົດດັນລັດຖະບານຣັດເຊຍໂດຍກົງ

ສະແດງຄຳຄິດເຫັນ