ງານວິໄຈຫຼ້າສຸດທີ່ຕີພິມໃນ Journal of the Academy of Nutrition and Dietetics ປີ 2024

ພົບວ່າ ອາຫານ ແລະ ເຄື່ອງດື່ມທີ່ມີສີສັງເຄາະມັກມີປະລິມານນ້ຳຕານສູງກວ່າຜະລິດຕະພັນທີ່ບໍ່ມີສີເຖິງຮ້ອຍລະ 141 ທີ່ຊີ້ໃຫ້ເຫັນວ່າສີເຫຼົ່ານີ້ມັກຖືກໃຊ້ໃນຜະລິດຕະພັນແປຮູບທີ່ບໍ່ດີຕໍ່ສຸຂະພາບ ເຊັ່ນ: ນ້ຳອັດລົມ, ເຂົ້າໜົມອົບ ແລະ ອາຫານສຳເລັດຮູບ ທີ່ມີຄຸນຄ່າທາງໂພຊະນາການຕ່ຳ

ໜຶ່ງໃນຜົນກະທົບທີ່ຊັດເຈນ ຄື ຄວາມປ່ຽນແປງຂອງພຶດຕິກຳໃນເດັກນ້ອຍ ງານວິໄຈຈາກມະຫາວິທະຍາໄລເຊົາແທມຕັນ ປະເທດອັງກິດ ທີ່ຕີພິມໃນວາລະສານ The Lancet ພົບວ່າ

ເດັກທີ່ບໍລິໂພກສີສັງເຄາະຮ່ວມກັບສານກັນບູດມີພຶດຕິກຳໄຮເປີຫຼາຍຂຶ້ນ ມີອາການຄ້າຍສະມາທິສັ້ນ (ADHD) ໂດຍສີທີ່ພົບຕະຫຼອດເຊັ່ນ: ສີແດງເບີ 40 (Red 40), ສີເຫຼືອງເບີ 5 ແລະ 6 ຖືກລະບຸວ່າກ່ຽວຂ້ອງກັບພຶດຕິກຳທີ່ຜິດປົກກະຕິໃນເດັກນ້ອຍບາງຄົນ

ດ້ານຄວາມສ່ຽງຕໍ່ໂລກຮ້າຍແຮງ ເຊັ່ນ: ມະເຮັງ ງານວິໄຈໃນສັດທົດລອງພົບວ່າ ສີແດງເບີ 3 (Red No.3 ຫຼື Erythrosine) ອາດເພີ່ມໂອກາດການເກີດເນື້ອງອກໃນຕ່ອມໄທຣອຍດ໌

ເຖິງແມ່ນໃນມະນຸດຍັງບໍ່ມີຂໍ້ສະຫຼຸບຊັດເຈນ ແຕ່ຫຼາຍປະເທດ ເຊັ່ນ: ສະຫະລັດອາເມລິກາ ແລະ ສະມາຊິກສະຫະພາບເອີຣົບ ເລີ່ມຈຳກັດຫຼືຫ້າມໃຊ້ສີຊະນິດນີ້ໃນອາຫານແລ້ວ

ນອກຈາກນີ້ ຍັງມີງານວິໄຈທີ່ເລີ່ມຄົ້ນພົບຄວາມເຊື່ອມໂຍງລະຫວ່າງສີປະສົມອາຫານກັບການເຮັດວຽກຂອງລຳໄສ້ ໂດຍສະເພາະ Red 40 ທີ່ອາດສົ່ງຜົນຕໍ່ຈຸລິນຊີໃນລຳໄສ້ ເຮັດໃຫ້ເກີດການອັກເສບເຮື້ອຮັງ ແລະ ອາດເປັນປັດໄຈສ່ຽງຕໍ່ໂລກບໍ່ຕິດຕໍ່ເຮື້ອຮັງ (NCDs)

ດ້ວຍຫຼັກຖານທີ່ເພີ່ມຂຶ້ນເລື້ອຍໆ ຫຼາຍລັດໃນສະຫະລັດ ເຊັ່ນ: ແຄລິຟໍເນຍ ໄດ້ເລີ່ມສັ່ງຫ້າມສີປະສົມອາຫານບາງຊະນິດໃນໂຮງຮຽນ ແລະ ອອກກົດໝາຍໃຫ້ຜູ້ຜະລິດຕ້ອງຕິດປ້າຍເຕືອນ ໃນຂະນະທີ່ບໍລິສັດຜູ້ຜະລິດລາຍໃຫຍ່ ເຊັ່ນ: Kraft Heinz ແລະ Nestlé ກຳລັງຄ່ອຍໆເຊົາໃຊ້ສີສັງເຄາະໃນຜະລິດຕະພັນຂອງຕົນພາຍໃນປີ 2027

ເຖິງແມ່ນສີຈາກທຳມະຊາດຈະຖືກເບິ່ງວ່າ “ປອດໄພກວ່າ” ແຕ່ຢ່າງໃດກໍຕາມ ຜູ້ຊ່ຽວຊານເຕືອນວ່າບັນຫາສຳຄັນຍັງຢູ່ທີ່ໂຄງສ້າງຂອງ “ອາຫານແປຮູບຂັ້ນສູງ (Ultra-processed Foods)”

ທີ່ຖືກອອກແບບໃຫ້ດຶງດູດເກີນຈິງ ກະຕຸ້ນຄວາມຢາກອາຫານ ແລະ ມີຄຸນຄ່າທາງໂພຊະນາການຕ່ຳ ການບໍລິໂພກອາຫານທຳມະຊາດ ເຊັ່ນ: ຜັກ ໝາກໄມ້ ທັນຍະພືດບໍ່ຂັດສີ ແລະ ການອ່ານປ້າຍໂພຊະນາການຈຶ່ງຍັງຄົງເປັນແນວທາງທີ່ດີທີ່ສຸດໃນການປ້ອງກັນຄວາມສ່ຽງ

ຈຸດເນັ້ນຫຼັກຂອງການສຶກສາໃໝ່ທີ່ນຳໂດຍ Dunford ຄືການວັດການໃຊ້ສີສັງເຄາະໃນຜະລິດຕະພັນອາຫານ ແລະ ເຄື່ອງດື່ມ 39,763 ລາຍການ ທີ່ຈຳໜ່າຍໂດຍຜູ້ຜະລິດ 25 ອັນດັບທຳອິດ ໃນສະຫະລັດອາເມລິກາ ໂດຍໃຊ້ຂໍ້ມູນປີ 2020 ຈາກ Label Insight ທີ່ເປັນບໍລິສັດໃນເຄືອ NielsenIQ ສຳລັບຂໍ້ມູນເຊິງເລິກກ່ຽວກັບຜະລິດຕະພັນ

ນັກວິໄຈພົບວ່າຜະລິດຕະພັນ 1 ໃນ 5 ຫຼື ຮ້ອຍລະ 19 ມີສີສັງເຄາະລະຫວ່າງ 1 ຫາ 7 ຊະນິດ ສີສັງເຄາະທີ່ໃຊ້ຫຼາຍທີ່ສຸດຄືສີແດງໝາຍເລກ 40 ຮອງລົງມາຄືສີແດງໝາຍເລກ 3 ແລະ ສີຟ້າໝາຍເລກ 1

ໝວດໝູ່ອາຫານທີ່ມີການໃຊ້ສີຫຼາຍທີ່ສຸດ ໄດ້ແກ່ ເຄື່ອງດື່ມສຳລັບນັກກິລາ (79%) ເຄື່ອງດື່ມເຂັ້ມຂົ້ນ (71%) ແລະ ເຂົ້າໜົມຫວານ (54%) ຜູ້ຂຽນລະບຸວ່າ “ເຄື່ອງດື່ມອັດລົມມີສັດສ່ວນຍອດຂາຍຜະລິດຕະພັນທີ່ມີສີຍ້ອມສັງເຄາະຫຼາຍທີ່ສຸດ (30%) ເນື່ອງຈາກເປັນໝວດໝູ່ທີ່ມີຍອດຂາຍສູງສຸດ”

ທັງນີ້ເມື່ອບໍ່ເທົ່າໃດທີ່ຜ່ານມາ ລັດແຄລິຟໍເນຍໄດ້ເລີ່ມອອກກົດໝາຍຫ້າມໃຊ້ສີສັງເຄາະທີ່ເຮັດຈາກປິໂຕລຽມ ໂດຍອ້າງເຫດຜົນດ້ານສຸຂະພາບ ເຊັ່ນ: ຄວາມສ່ຽງຕໍ່ການເກີດມະເຮັງທີ່ເພີ່ມຂຶ້ນ ແລະ ບັນຫາທາງລະບົບປະສາດໃນເດັກແລະສັດ

ຜູ້ວ່າການລັດແກວິນ ນິວຊັມ ໄດ້ສັ່ງຫ້າມໃຊ້ສີແດງໝາຍເລກ 3 ໃນປີ 2023 ແລະ ຫ້າມໃຊ້ສີທົ່ວໄປອີກ 6 ຊະນິດໃນອາຫານຂອງໂຮງຮຽນໃນປີ 2024 ນັບແຕ່ນັ້ນມາ ລັດອື່ນໆ ອີກ 25 ລັດໄດ້ເດີນຕາມຮອຍຂອງລັດແຄລິຟໍເນຍດ້ວຍການອອກກົດໝາຍ ທີ່ບາງລັດໄດ້ລົງນາມເປັນກົດໝາຍ ແລະ ບາງລັດຍັງຄົງດຳເນີນການຢູ່ ໂດຍກົດໝາຍດັ່ງກ່າວຈະຫ້າມ ຈຳກັດການໃຊ້ ຫຼື ກຳນົດໃຫ້ຕິດປ້າຍສີປະສົມອາຫານ

ສະແດງຄຳຄິດເຫັນ