ໂດນັລດ໌ ທຣັມເຜີຍຈົດໝາຍແຈ້ງອັດຕາພາສີອີກຫຼາຍສະບັບ ໂດຍລາວກັບມຽນມາຖືກເອີ້ນເກັບຫຼາຍສຸດເຖິງ 40% ຂະນະທີ່ມາເລເຊຍຖືກໄປ 25%

ເມື່ອ 7 ກໍລະກົດ 2025 ສະຫະລັດເລີ່ມສົ່ງຈົດໝາຍເຖິງປະເທດຕ່າງໆ ເພື່ອແຈ້ງອັດຕາພາສີຕ່າງຕອບແທນທີ່ສະຫະລັດຈະບັງຄັບໃຊ້ກັບພວກເຂົາຕາມນະໂຍບາຍຂອງ ໂດນັລດ໌ ທຣັມ ແລ້ວ

ໂດຍທຣັມ ໂພສຕ໌ພາບຜ່ານ Truth Social ສະແດງໃຫ້ເຫັນຈົດໝາຍທີ່ສົ່ງເຖິງຫຼາຍປະເທດ ທັງຍີ່ປຸ່ນ, ເກົາຫຼີໃຕ້, ຄາຊັກສະຖານ, ມາເລເຊຍ, ລາວ ແລະ ມຽນມາ ນອກຈາກນັ້ນຍັງມີອາຟຣິກາໃຕ້ອີກດ້ວຍ

ໃນຕອນທຳອິດທຣັມໂພສຕ໌ພາບຈົດໝາຍທີ່ສົ່ງເຖິງຍີ່ປຸ່ນກັບເກົາຫຼີໃຕ້ກ່ອນ ໂດຍລະບຸວ່າຈະບັງຄັບໃຊ້ພາສີຕ່າງຕອບແທນໃນອັດຕາ 25% ກັບທັງສອງປະເທດ ເລີ່ມຕັ້ງແຕ່ 1 ສິງຫາ ເປັນຕົ້ນໄປ

ປະມານ 2 ຊົ່ວໂມງຕໍ່ມາ ທຣັມຈຶ່ງໂພສຕ໌ຈົດໝາຍທີ່ສົ່ງເຖິງ ຄາຊັກສະຖານ, ມາເລເຊຍ, ລາວ, ມຽນມາ ແລະ ອາຟຣິກາໃຕ້ ໂດຍທີ່ ຄາຊັກສະຖານກັບມາເລເຊຍຖືກຕັ້ງກຳແພງພາສີໃນອັດຕາເທົ່າກັນຄື 25% ຂະນະທີ່ອາຟຣິກາ ຖືກໄປ 30% ສ່ວນລາວກັບມຽນມາຖືກຮຽກເກັບກຳແພງພາສີສູງເຖິງ 40%

ຈົດໝາຍດັ່ງກ່າວມີເນື້ອຫາຄ້າຍຄືຈະເໝືອນກັນທຸກສະບັບ ໂດຍລະບຸວ່າເຫດຜົນທີ່ສະຫະລັດຕັດສິນໃຈຕັ້ງກຳແພງພາສີກັບປະເທດເຫຼົ່ານີ້ ຄືການທີ່ສະຫະລັດຂາດດຸນທາງການຄ້າຢ່າງມີໄນຍະສຳຄັນກັບປະເທດທີ່ຈົດໝາຍຖືກສົ່ງເຖິງ ພ້ອມທັງເຊື້ອເຊີນໃຫ້ພວກເຂົາສ້າງ ຫຼື ຜະລິດສິນຄ້າພາຍໃນສະຫະລັດ ເພື່ອຫຼີກເວັ້ນກຳແພງພາສີ

ເມື່ອອາທິດກ່ອນ ທຣັມກ່າວວ່າ ລາວໄດ້ລົງນາມຈົດໝາຍແຈ້ງອັດຕາພາສີຕ່າງຕອບແທນແລ້ວຈຳນວນໜຶ່ງ ແລະ ຈະສົ່ງມັນໃຫ້ກັບ 12 ປະເທດໃນວັນຈັນທີ່ 7 ກໍລະກົດ ແລະ ຈະສົ່ງເພີ່ມເຕີມຫຼັງຈາກນັ້ນ

ຂະນະດຽວກັນ ເບິ່ງຄືວ່າສະຫະລັດຈະເລື່ອນເສັ້ນຕາຍການບັງຄັບໃຊ້ມາດຕະການພາສີຕ່າງຕອບແທນ ຈາກວັນທີ່ 9 ກໍລະກົດ ໄປເປັນ 1 ສິງຫາ ຫຼັງຈາກໃນຊ່ວງ 3 ເດືອນທີ່ຜ່ານມາ ສະຫະລັດເຮັດຂໍ້ຕົກລົງການຄ້າໄດ້ພຽງ 3 ສະບັບເທົ່ານັ້ນ ຈາກທັງໝົດກວ່າ 90 ສະບັບທີ່ລັດຖະບານສັນຍາເອົາໄວ້

ສະແດງຄຳຄິດເຫັນ