ໄພງຽບ “ໝາກໄມ້” ກິນຜິດວິທີຊີວິດປ່ຽນ ກາຍເປັນກັບດັກສຸຂະພາບ ນ້ຳໜັກຂຶ້ນ ໄຂມັນພອກຕັບບໍ່ຮູ້ຕົວ

ຫຼາຍຄົນເຊື່ອວ່າການກິນໝາກໄມ້ຫຼາຍໆ ຈະຍິ່ງດີຕໍ່ສຸຂະພາບ ເພາະໝາກໄມ້ມີວິຕາມິນ ໄຟເບີ ແລະ ສານຕ້ານອະນຸມູນອິດສະລະ ແຕ່ແພດຜູ້ຊ່ຽວຊານດ້ານສຸຂະພາບຈາກໄຕ້ຫວັນ ດຣ.ຫລິວ ປ໋ອເຫິນ (Dr. Liu Bo-Ren) ອອກມາເຕືອນວ່າ ໝາກໄມ້ອາດກາຍເປັນ “ກັບດັກສຸຂະພາບ” ໄດ້ເຊັ່ນກັນ

ໝາກໄມ້ເປັນແຫຼ່ງຂອງຄາໂບໄຮເດຣດຊະນິດໜຶ່ງ ຊຶ່ງມີນ້ຳຕານຟຣຸກໂຕສເປັນສ່ວນປະກອບ ເມື່ອຮ່າງກາຍຮັບເຂົ້າໄປຫຼາຍເກີນໄປ ຕັບຈະປ່ຽນນ້ຳຕານຟຣຸກໂຕສເຫຼົ່ານີ້ໄປເປັນໄຂມັນ ເຮັດໃຫ້ເກີດພາວະໄຂມັນພອກຕັບ ພາວະດື້ຕໍ່ອິນຊູລິນ ຫຼືແມ້ກະທັ້ງນ້ຳໜັກຕົວເພີ່ມຂຶ້ນ

ຕົວຢ່າງກໍລະນີຈາກຊີວິດຈິງ ມີຍິງອາຍຸໃກ້ 60 ປີຄົນໜຶ່ງທີ່ກັບໄປກວດສຸຂະພາບ ແລະ ຍອມຮັບວ່າ ນ້ຳໜັກຕົວເພີ່ມຂຶ້ນຢ່າງເຫັນໄດ້ຊັດ ແຕ່ນາງບອກກັບໝໍວ່າ:

“ຂ້ອຍມັກກິນໝາກໄມ້ຫຼາຍ ມື້ໜຶ່ງກິນຕັ້ງ 5-6 ຊະນິດ ລວມແລ້ວປະມານ 5-6 ສ່ວນຕໍ່ມື້ ແບບນີ້ຖືວ່າຫຼາຍໄປບໍ?”

ນາງຄິດວ່າໝາກໄມ້ທຸກຊະນິດລ້ວນມີປະໂຫຍດ ແລະ ຖ້າບໍ່ກິນກໍ່ຄືກັບຂາດຫາຍແມ່ນຫຍັງໄປ

ດຣ.ຫລິວຊີ້ແຈງວ່າ ໝາກໄມ້ມີປະໂຫຍດເພາະອຸດົມດ້ວຍວິຕາມິນ C, A, E ແລະ ສານຕ້ານອະນຸມູນອິດສະລະ ແຕ່ບໍ່ຄວນເບິ່ງຂ້າມວ່າໝາກໄມ້ກໍ່ຄືແຫຼ່ງນ້ຳຕານເຊັ່ນກັນ ຖ້າກິນຫຼາຍເກີນໄປ ຈະສົ່ງຜົນເສຍຕໍ່ສຸຂະພາບ

ໂດຍສະເພາະຢ່າງຍິ່ງ ໝາກໄມ້ທີ່ມີນ້ຳຕານສູງແລະຄ່າ GI (ດັດຊະນີນ້ຳຕານ) ສູງ ເຊັ່ນ: ກ້ວຍ ອະງຸ່ນ ໝາກນັດ ໝາກມ່ວງ ຫາກກິນຄັ້ງລະຫຼາຍໆ ຫຼື ກິນຕອນທ້ອງວ່າງ ຫຼື ກິນເປັນຂອງຫວານຫຼັງອາຫານທັນທີ ຈະເຮັດໃຫ້ລະດັບນ້ຳຕານໃນເລືອດພຸ່ງຂຶ້ນຢ່າງວ່ອງໄວ ສ່ຽງຕໍ່ບັນຫາສຸຂະພາບໄລຍະຍາວ

ເພື່ອປ້ອງກັນກັບດັກສຸຂະພາບຈາກໝາກໄມ້ ດຣ.ຫລິວແນະນຳ 2 ຫຼັກການສຳຄັນ ທີ່ຄວນຈື່ໄວ້ສະເໝີ:

1. ຄຸນນະພາບສຳຄັນກວ່າປະລິມານ ເລືອກຊະນິດໝາກໄມ້ທີ່ດີຕໍ່ສຸຂະພາບ ເຊັ່ນ: ບລູເບີຣີ, ກີວີ, ໝາກສີດາ ຊຶ່ງມີຄ່າ GI ຕ່ຳ ແທນການກິນຫຼາຍໆ ໂດຍບໍ່ເລືອກຊະນິດ
2. ຮູ້ຈັກຄວບຄຸມແລະພິຈາລະນາຕົນເອງ ຖ້າການກິນໝາກໄມ້ເລີ່ມກາຍເປັນຄວາມເຄີຍຊິນຫຼືການເສບຕິດ ຕ້ອງຍ້ອນກັບມາທົບທວນວ່າເຮົາກຳລັງກິນເພື່ອສຸຂະພາບແທ້ຫຼືບໍ່

ທັງນີ້ ດຣ.ຫລິວແນະນຳໃຫ້ກິນໝາກໄມ້ມື້ລະປະມານ 2-3 ສ່ວນ ກໍ່ພຽງພໍແລ້ວ ໂດຍຫຼີກລ້ຽງການກິນໝາກໄມ້ປະລິມານຫຼາຍໃນເທື່ອດຽວ

ໝາກໄມ້ 1 ສ່ວນຄືແມ່ນຫຍັງ?

ໝາກໄມ້ 1 ສ່ວນ ໝາຍເຖິງ ປະລິມານໝາກໄມ້ທີ່ໃຫ້ພະລັງງານປະມານ 60 ກິໂລແຄລໍລີ ຫຼື ຄາໂບໄຮເດຣດປະມານ 15 ກຣາມ ຊຶ່ງພຽງພໍຕໍ່ຄວາມຕ້ອງການຂອງຮ່າງກາຍໃນແຕ່ລະມື້ໂດຍບໍ່ສົ່ງຜົນຕໍ່ລະດັບນ້ຳຕານໃນເລືອດຫຼາຍເກີນໄປ

ປະລິມານ 1 ສ່ວນຂອງໝາກໄມ້ແຕ່ລະຊະນິດມີຄວາມແຕກຕ່າງກັນຕາມຂະໜາດແລະປະເພດ ຕົວຢ່າງດັ່ງນີ້:

ຕົວຢ່າງປະລິມານໝາກໄມ້ 1 ສ່ວນ

• ໝາກໄມ້ຂະໜາດນ້ອຍ (ເຊັ່ນ: ອະງຸ່ນ ລອງກອງ ລຳໄຍ ລິ້ນຈີ່) 6-8 ໜ່ວຍ
• ໝາກໄມ້ຂະໜາດກາງ (ເຊັ່ນ: ກ້ວຍ ໝາກກ້ຽງ ໝາກຈຽງ ໝາກຂຽບ ໝາກເຟືອງ ກະທັນ ລະມຸດ ໝາກແອັບເປິນ ໝາກສາລີ້) 1-2 ໜ່ວຍ
• ໝາກໄມ້ຂະໜາດໃຫຍ່ (ເຊັ່ນ: ໝາກແຕງໂມ ໝາກນັດ ໝາກຫຸ່ງ ແຄນຕາລູບ) 6-8 ຊິ້ນຄຳ
• ໝາກໄມ້ອື່ນໆ

• • ໝາກເງາະະ 4 ໜ່ວຍ
  • ລິ້ນຈີ່ 4 ໜ່ວຍ
  • ໝາກມັງຄຸດ 4 ໜ່ວຍ
  • ໝາກມັງກອນ ¼ ໜ່ວຍ
  • ຖົ່ວລຽນ ¼ ເມັດກາງ
  • ໝາກສີດາ ½ ໜ່ວຍ
  • ໝາກມ່ວງ ½–¼ ໜ່ວຍ
  • ໝາກມີ້ 2 ຍວງ
  • ໝາກກ້ຽງໃຫຍ່ 2 ງີມ

ສະແດງຄຳຄິດເຫັນ