ຫຸງເຂົ້າແບບນີ້ ໂປຣຕີນເທົ່າກັບກິນຊີ້ນງົວ 100 ກຣາມ ແຕ່ດີກວ່າຕອນບໍ່ເພີ່ມໄຂມັນອິ່ມຕົວ ເຮັດງ່າຍ ສຸຂະພາບດີ

ເຂົ້າແມ່ນອາຫານຫຼັກຂອງຄົນລາວ ແລະ ຫຼາຍປະເທດໃນເອເຊຍ ແຕ່ຮູ້ຫຼືບໍ່ວ່າ “ການໃສ່ຖົ່ວ” ລົງໄປຂະນະຫຸງເຂົ້າ ສາມາດເພີ່ມຄຸນຄ່າທາງໂພຊະນາການໄດ້ຢ່າງໜ້າປະຫລາດໃຈ! ຫຼ້າສຸດຜູ້ຊ່ຽວຊານດ້ານສຸຂະພາບ ແລະ ອາຍຸຍືນຈາກສະຫະລັດ ແນະນຳໃຫ້ທຸກບ້ານຫັນມາໃສ່ຖົ່ວໃນເຂົ້າຈ້າວ ເພື່ອຍົກລະດັບສານອາຫານທີ່ໄດ້ຮັບໃນແຕ່ລະມື້

“Dan Buettner” ນັກວິໄຈຊື່ດັງດ້ານອາຍຸຍືນຈາກສະຫະລັດ ແລະ ຜູ້ສຶກສາ “Blue Zones” ຫຼື ພື້ນທີ່ທີ່ມີຄົນອາຍຸຍືນທີ່ສຸດໃນໂລກ ເປີດເຜີຍວ່າ ການຫຸງເຂົ້າພ້ອມກັບຖົ່ວຫຼາກຊະນິດ ເຊັ່ນ: ຖົ່ວແດງ ຖົ່ວດຳ ຖົ່ວຂຽວ ຊ່ວຍເພີ່ມປະລິມານໂປຣຕີນ ເສັ້ນໃຍ ແລະ ວິຕາມິນໃຫ້ກັບມື້ອາຫານຢ່າງເຫັນໄດ້ຊັດ

ໂດຍເຂົ້າຖົ່ວ 1 ຖ້ວຍສາມາດ ໃຫ້ໂປຣຕີນໃນລະດັບເທົ່າກັບການກິນຊີ້ນງົວ 100 ກຣາມ ແຕ່ບໍ່ມີໄຂມັນອິ່ມຕົວທີ່ເປັນອັນຕະລາຍຕໍ່ຫົວໃຈ ນອກຈາກນີ້ຍັງອຸດົມໄປດ້ວຍສານອາຫານສຳຄັນ ເຊັ່ນ: ໃຍອາຫານປະມານ 3 ກຣາມ, ໂຟເລດ (ວິຕາມິນ B9) 64% ຂອງປະລິມານທີ່ຄວນໄດ້ຮັບຕໍ່ວັນ, ວິຕາມິນ B1, ແມກນີຊຽມ, ແມງການີສ ແລະ ທາດເຫຼັກໃນປະລິມານສູງ

“ເຂົ້າຖົ່ວ” ວິທີເຮັດງ່າຍໆ 

1. ລ້າງເຂົ້າຕາມປົກກະຕິ ໃສ່ຖົ່ວລ້າງສະອາດລົງໄປ (ເຊັ່ນ: ຖົ່ວແດງ ຖົ່ວດຳ ຫຼື ຖົ່ວຂຽວ)
2. ເຕີມນ້ຳ ແລະ ຫຸງຕາມປົກກະຕິ ອາດໃສ່ເກືອຫນ້ອຍໜຶ່ງ ຫຼື ສະໝຸນໄພເພື່ອເພີ່ມລົດຊາດ
3. ຈະໃຊ້ຫມໍ້ຫຸງເຂົ້າໄຟຟ້າ ຫຼື ຫມໍ້ຕົ້ມກໍ່ໄດ້

 4 ເຫດຜົນທີ່ຄວນໃສ່ຖົ່ວລົງໄປໃນເຂົ້າ

• ຊ່ວຍຫຼຸດນ້ຳໜັກ – ເລັ່ງການເຜົາຜານ ໂປຣຕີນ ແລະ ກົດອະມິໂນຈຳເປັນໃນຖົ່ວຊ່ວຍກະຕຸ້ນການເຜົາຜານ ເພີ່ມຄວາມຮູ້ສຶກອິ່ມ ຫຼຸດຄວາມຢາກອາຫານ ແລະ ຊ່ວຍຮັກສາມວນກ້າມເນື້ອໃຫ້ແຂງແຮງ ງານວິໄຈພົບວ່າ ການກິນຖົ່ວມື້ລະ 250 ກຣາມຕໍ່ເນື່ອງ 6 ອາທິດ ຊ່ວຍຫຼຸດນ້ຳໜັກໄດ້ຫຼາຍກວ່າກຸ່ມທີ່ບໍ່ກິນຖົ່ວເຖິງ 0.34 ກິໂລກຣາມ

• ຫຼຸດຄວາມສ່ຽງໂລກຫົວໃຈ ແລະ ເບົາຫວານ ເຂົ້າຖົ່ວໃຫ້ໃຍອາຫານລະລາຍນ້ຳທີ່ຊ່ວຍຫຼຸດລະດັບໂຄເລັສເຕີຣອນຊະນິດບໍ່ດີ (LDL) ໄດ້ ງານວິໄຈຊີ້ວ່າ ການກິນຖົ່ວ 4 ຄັ້ງຕໍ່ອາທິດ ຊ່ວຍຫຼຸດຄວາມສ່ຽງໂລກຫົວໃຈໄດ້ເຖິງ 22% ນອກຈາກນີ້ ໃຍອາຫານຍັງຊ່ວຍຄວບຄຸມລະດັບນ້ຳຕານໃນເລືອດ ຫຼຸດຄວາມສ່ຽງເບົາຫວານຊະນິດທີ 2

• ເສີມພູມຄຸ້ມກັນ ລຳໄສ້ແຂງແຮງ ຫຼຸດຄວາມສ່ຽງມະເຮັງລຳໄສ້ ເຂົ້າຖົ່ວມີທັງໃຍອາຫານ ແລະ ແປ້ງຕ້ານການຍ່ອຍ (resistant starch) ທີ່ດີຕໍ່ລະບົບຍ່ອຍ ແລະ ແບັກທີເຣຍດີໃນລຳໄສ້ ເມື່ອຈຸລິນທຣີດີໃນລຳໄສ້ຍ່ອຍໃຍອາຫານເຫຼົ່ານີ້ ຈະຜະລິດກົດໄຂມັນສາຍສັ້ນຢ່າງ butyrate ຊຶ່ງມີຄຸນສົມບັດຕ້ານການອັກເສບ ແລະ ຊ່ວຍຫຼຸດຄວາມສ່ຽງມະເຮັງລຳໄສ້ໃຫຍ່

• ກິນເຂົ້າຖົ່ວເປັນປົກກະຕິ ຊ່ວຍຍືດອາຍຸ ຖົ່ວເປັນອາຫານຫຼັກຂອງຜູ້ຄົນໃນ “Blue Zones” ເຊັ່ນ: ໂຄສຕາຣິກາ ທີ່ນິຍົມກິນ “Casado” (ເຂົ້າ + ຖົ່ວດຳ + ສະລັດ + ເນື້ອສັດໜ້ອຍໜຶ່ງ) ແລະ ໂອກິນາວາ ປະເທດຍີ່ປຸ່ນ ທີ່ກິນເຂົ້າກັບຖົ່ວແດງເປັນປົກກະຕິ ຕາມງານວິໄຈລະບຸວ່າ ການເພີ່ມຖົ່ວພຽງມື້ລະ 20 ກຣາມໃນມື້ອາຫານ ມີສ່ວນຊ່ວຍໃຫ້ມີອາຍຸຍືນຍາວຂຶ້ນເຖິງ 8 ປີ

“ເຂົ້າຖົ່ວ” ເປັນທາງເລືອກເພື່ອສຸຂະພາບທີ່ງ່າຍ ລາຄາປະຫຍັດ ແຕ່ຄຸນຄ່າສູງ ເໝາະກັບທຸກຄົນໃນຄອບຄົວ ໂດຍສະເພາະຜູ້ທີ່ຕ້ອງການຫຼຸດນ້ຳໜັກ ຄວບຄຸມລະດັບນ້ຳຕານ ຫຼື ປ້ອງກັນໂລກຫົວໃຈ ແລະ ມະເຮັງລຳໄສ້

ດັ່ງນັ້ນ ລອງຫັນມາເລີ່ມກິນຖົ່ວມື້ລະໜ້ອຍ ຫ່າງໄກໂລກຮ້າຍອີກດົນ ເຄັດລັບສຸຂະພາບດີທີ່ທຸກບ້ານເຮັດໄດ້ງ່າຍໆ

ສະແດງຄຳຄິດເຫັນ